Zefania 1
1
1 #
2 Male 22.1—23.30; 2 Lita 34.1—35.27 Ki a manzwi a Muñ'a Bupilo a n'a file Zefania ka nako yeo Josiasi, mwan'a Amoni, n'a li mulena wa Juda. Zefania n'a simuluhile ku mulena Ezekiasi, ku ta ku bo Amaria, Gedalia ni Kushi.
Lizazi la ku halifa kwa Muñ'a Bupilo
2Muñ'a Bupilo a li, “Ni ka felisa lika kamukana mwa lifasi. 3Ni ka felisa batu kaufela ni lifolofolo, linyunywani ni litapi. Ni ka sinya ba ba maswe. Ni ka timeza batu kaufela, ku tokwa ni a li muñwi ya ka siyala mwa lifasi. Ku bulela, na, Muñ'a Bupilo.
4“Ni ka pyata batu ba Juda ni ba Jerusalema kaufela. Ni ka sinya lisupo za sebelezo ya Baale ze sa siyezi mwateñi, hamoho ni libizo ni ze sa hupulisa baprisita kaufela ba ba ne ba mu sebeleza, bubeli bwa bona baprisita ba sihedeni ni baprisita ba ka. 5Ni ka timeza mañi ni mañi ya ka pahama fa situwa ku y'o lapela lizazi, kweli ni linaleli. Ni ka sinya ni bao ba ba ni lapela ni ku tiisa buniti ku na, kono hape ba konka ka libizo la mulimu ya bizwa Milikomo. 6Ni ka timeza bao kaufela ba ba kwenuhezi ku sili mi ba hana ku ni latelela, ba ba sa tahi ku na kamba ku ni kupa kuli ni ba etelele.”
7Mu kuze fapil'a Muñ'a Bupilo kakuli lizazi la katulo li fakaufi. Muñ'a Bupilo u itukiseza ku bulaya batu ba hae inge litabelo. 8Muñ'a Bupilo u li, “Ka lona lizazi leo la mafu a mañata ni ka fa manduna mulatu, bana ba malena, ni ba ba latelela mikwa ya bazwahule. 9Ni ka fa mulatu ku ba ba lapela sina bahedeni, ba ba uzwa ni ku bulaya, ni ku taza tempele ya mulimu wa bona ka ze ba amuha batu.”
10Muñ'a Bupilo u li, “Ka lona lizazi leo mu ka utwa mulumo wa mukosi kwa Munyako wa Litapi wa mwa Jerusalema. Mu ta utwa ba ba ka lila ba kwa neku le linca la muleñeni, ni mulumo o mutuna hahulu mwa malundu. 11Mu bokolole ni ku lila ha mu utwa cwalo, mina mu pila mwa matuko a muleneñi, kakuli balekisi kamukana ba shwile!
12“Ka yona nako yeo ni ka nga lampi ni bate Jerusalema. Ni ka fa batu mulatu ba ba sa isi pilu ku Mulimu, ba ba isepile. Ba li, ‘Ha ku na taba niha lu eza cwalo, Muñ'a Bupilo h'a na ku eza se siñwi.’ 13Bufumu bwa bona bu ka ngiwa, ni mandu a bona a ka sinyiwa. Ha ba na ku pila mwa mandu a ba yaha, kamba ku nwa waine ya kwa miselo ya kwa likota za veine ze ba cala.”
14Lizazi le lituna la Muñ'a Bupilo li fakaufi, li se li atumezi, mi li taha ka bubebe! Ka lona lizazi leo nihaili masole ba ba bundume hahulu ba ka lila ka ku felelwa ki sepo! 15I ka ba lizazi le li sabisa, la likozi ni maswabi, la matota ni sinyeho, la lififi ni manyando, lizazi la malu ni liñungwa. 16I ka ba lizazi le li tezi mulumo wa litolombita za ndwa ni ku huwa kwa masole ha ba lwanisa mileneñi ye silelelizwe ni manangelelo a matelele.
17Muñ'a Bupilo u ize, “Ni ka tisa likozi ze cwalo kwa batu kuli ba te ba bubutele sina libofu. Ba ni foselize, mi cwale mali a bona a ka sululwa sina mezi, ni mibili ya bona i ka bolela fafasi.”
18Silivela ya bona kaufela ni gauda ha li na ku ba tusa ka zazi leo Muñ'a Bupilo a ka bonisa bunyemi bwa hae bo bu sabisa. Lifasi kaufela li ka timezwa ka mulilo wa bunyemi bwa hae. U ka tisa mafelelezo a sipundumukela ku mañi ni mañi ya pila mwa lifasi.
Currently Selected:
Zefania 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.