Jeremia 1
1
1Buka ye, ki ya litaba ze bulezwi ki Jeremia. N'e li mwan'a Hilikia, yo muñwi wa baprisita ba mwa munzi wa Anatota, ili mwa naha ya Benjamine. 2#2 Male 22.3—23.27; 2 Lita 34.8—35.19 Ka silimo sa bulishumi ka ze talu Josiasi mwan'a mulena Amoni ha n'a li mulena mwa Juda, Muñ'a Bupilo a bulela ku Jeremia. 3#2 Male 23.36—24.7; 24.18—25.21; 2 Lita 36.5-8, 11-21 A bulela hape ni yena, Jojakimi mwan'a Josiasi ha n'a li mulena. Mwamulaho a fo, a bulela ni yena hañata ku fitela batu ba Jerusalema ba hapiwa ka kweli ya buketalizoho mwa silimo sa bulishumi ka si li siñwi, Zedekia mwan'a Josiasi ha n'a li mulena.
Jeremia wa bizwa
4Muñ'a Bupilo a li ku na,
5“U si ka fiwa kale bupilo
ne ni ku supile.
Mi u si ka pepwa kale
na ku sumekela.
Na ku keta ku ba mupolofita
wa macaba.”
6Cwale na li, “Mawee, Muñ'a Bupilo, ha ni zibi ku bulela. Ni sa li yo munyinyani hahulu.”
7Kono Muñ'a Bupilo a li ku na,
“U si ke wa li u yo munyinyani
hahulu,
kono u ye feela kwa batu
ko ni ku luma,
mi u y'o ba bulelela
ze ni ku laela kamukana.
8U si ke wa ba saba,
kakuli ni ta ba ni wena
ku ku sileleza.
Ni bulezi, na, Muñ'a Bupilo!”
9Cwale Muñ'a Bupilo a otolola lizoho, a swala fa milomo ya ka, mi a li,
“Bona, cwale ni ku fa litaba
z'o ka bulela.
10Kacenu ni ku fa maata fahalimw'a
macaba ni mibuso,
ku kumula ni ku lutulula,
ku sinya ni ku shandaula,
ku yaha ni ku suña.”
11Muñ'a Bupilo a ni buza, a li, “Jeremia, u bona sika mañi?”
Na alaba, na li “Ni bona mutai wa kota ya alumondi.”
12Cwale Muñ'a Bupilo a li ku na, “U nepile, mi ni talimezi ku bona kuli manzwi a ka a ezahala.”
13Muñ'a Bupilo a bulela ni na hape. A buza, a li, “Se siñwi hape s'o bona ki sifi?”
Na alaba, na li, “Ni bona piza ye bila kwa mutulo, mi i bata ku suluhela kwanu.”
14A li ku na, “Ku shandauka kwa batu kaufela ba ba inzi mwa naha mo ku ta zwelela kwa mutulo. 15Utwahe ze ni bulela, ni li, ‘Ni biza macaba kamukana a kwa mutulo kuli a tahe. Malen'a ona ba ka t'o ina mwa mabona a bona kwa minyako ya Jerusalema ni ku potoloha mamota a ona, hamohocwalo ni a minzi ye miñwi ya Juda. 16Wo ki ona mukwa o ni ka nata ba ba ezize sibi ka ona, ba ba ni fulalezi, mi ba y'o ciseza milimu i sili insense, ni ku lapela maswaniso a ba ikezelize.’
17“Tiya pilu, Jeremia. Zamaya, u y'o ba bulela ze ni ku laezi kamukana. Cwale u si ke wa saba. Ha u ka saba, na, ni ta ku eza kuli u ba sabe hahulu ha u inzi ni bona. 18Teeleze, Jeremia! Kacenu, ni ta ku eza kuli u kone ku itamulela ku bona. U ta swana sina munzi o beilwe mwa lukwakwa lo lu tiile ili wa misumo ya lisipi ni mamota a kopa, ye lwanisa batu kaufela ba mwa naha mo, ili malena ba Juda, manduna, baprisita ni batu kaufela. 19Ba ka mi lwanisa kono ha ba na ku ku koma, kakuli ni ta ba ni wena ku ku sileleza. Ni bulezi, na, Muñ'a Bupilo.”
Currently Selected:
Jeremia 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.