Baatuli 1
1
Ba masika a Juda ni Simioni ba swala Adoni-Bezeki
1Joshua ha s'a shwile, batu ba Isilaele ba buza Muñ'a Bupilo, ba li, “Mwa masika a luna, ki lufi lusika lo lu swanezi ku y'o lwanisa Makanana pili?”
2Muñ'a Bupilo a ba alaba, a li, “Lusika lwa Juda ki lona lo lu ka kala pili, kakuli ni lu file zamaiso ya naha.”
3Ba lusika lwa Juda ba li ku ba lusika lwa Simioni, “A lu yeñi mwa naha ye lu filwe, lu y'o lwanisa Makanana hamoho. Ku zwa fo, lu ta ya ni mina mwa naha ye mu filwe.” Ba masika a Simioni ba eza cwalo. 4Juda ha ba y'o lwana, Muñ'a Bupilo a ba fa maata a ku tula Makanana ni Maperizi, mi kwa tulwa banna ba ba eza likiti ze lishumi kwa Bezeki. 5Ba y'o fumana Adoni-Bezeki kwateñi, mi ba lwana ni yena. Ba fenya Makanana ni Maperizi. 6Adoni-Bezeki a saba, kono ba mu matisa, ba mu swala, mi ba mu puma minwana ye mituna ya kwa mazoho ni kwa mahutu. 7Adoni-Bezeki a li, “Malena ba mashumi a supile, ba ba pumilwe minwana ye mituna ya kwa mazoho ni kwa mahutu, ne ba t'o nopanga bungululwa kwatas'a tafule ya ka. Mulimu u ni ezize mo ne ni ba ezelize.” Kiha ba mu isa kwa Jerusalema kw'a il'o shwela.
Ba lusika lwa Juda ba hapa Jerusalema ni Heberoni
8Cwale banna ba Juda ba lwanisa Jerusalema, mi ba u hapa. Ba bulaya batu ba mwateñi, mi ba cisa munzi. 9Ha ba zwa fo, ba y'o lwanisa Makanana ba ba ne ba pila mwa naha ya malundu, mwa Negeve ni mwa libala. 10Batu ba Juda ba yela Makanana ba ba ne ba pila mwa munzi wa Heberoni, o n'o bizwa Kiryati-Ariba. Ba y'o tula Sheshai, Akimani ni Talamai.
Otiniele u hapa munzi wa Debiri
(Josh 15.15-19)
11Ha ba zwa fo, ba yela ba munzi wa Debiri, o n'o bizwa Kiryati-Seferi. 12Kalebu a li, “Mutu ya ka kona ku hapa munzi wa Kiryati-Seferi ni ta mu fa mwan'a ka wa musizana, ya bizwa Akisa, a mu nyale.” 13Otiniele, mwan'a Kenazi munyan'a Kalebu, a hapa munzi. Cwale Kalebu a mu fa mwan'a hae Akisa kuli a mu nyale. 14Akisa ha s'a fitile, Otiniele a mu susueza kuli a y'o kupa simu ku ndat'ahe. Kih'a ya ku Kalebu, mi h'a tuluka fa mbongolo ya hae, ndat'ahe a mu buza s'a bata. 15Yena a alaba, a li, “Ni bata mpo! Ha u ni isize mwa Negeve, u ni fe liliba za mezi.” Cwale Kalebu a mu fa mawelu-welu a kwahalimu ni a kwatasi.
Ku tula kwa masika a Juda ni Benjamine
16Ba lusika lwa mukwenyan'a Mushe wa Mukeni, ba ya ni ba Juda ku zwa mwa munzi wa Mikoma ku ya mwa lihalaupa la Juda kwa mboela wa Arada. Kwateñi ba y'o yaha ni Maamalekiti. 17Ba lusika lwa Juda ba ya ni ba lusika lwa Simioni, mi hamoho ba y'o fenya Makanana ba mwa munzi wa Zefati. Ba u kuta, mi ba u sinya. Kiha ba u beya libizo la Horoma. 18Ha ba si ka hapa Gaza, Ashikeloni, Ekeroni ni manaha a i potolohile. 19Muñ'a Bupilo a tusa batu ba Juda, mi ba hapa naha ya kwa malundu. Kono ha ba si ka kona ku leleka batu ba ba ne ba pila fa munanga, kakuli batu bao ne ba na ni likoloi za lisipi. 20#Josh 15.13-14 Sina mw'a n'a laelezi Mushe, Kalebu a fiwa Heberoni, mi a lelekisa bana ba Anaki ba balalu. 21#Josh 15.63; 2 Sam 5.6; 1 Lita 11.4 Kono batu ba lusika lwa Benjamine ha ba si ka leleka Majebusi ba ba ne ba pila mwa Jerusalema. Majebusi ba ina mwa Jerusalema ni ba lusika lwa Benjamine ku fitela ni la kacenu le.
Ba lusika lwa Josefa ba hapa Betele
22Batu ba lusika lwa Josefa ba y'o lwanisa munzi wa Betele. Muñ'a Bupilo a ba tusa. 23Ba lumela matwela ku ona munzi wo, o n'o bizwa Luzi kale. 24Matwela bao ba bona mutu ya n'a zwa mwateñi, mi ba li ku yena, “Ha u lu bonisa mo lu ta konela ku kena mwa hae, ha lu na ku ku eza se siñwi.” 25Kiha s'a ba bonisa. Ba bulaya batu kaufela mwa munzi wo haisi yena mutu yo ni lubasi lwa hae kaufela. 26A ya mwa naha ya Mahiti, a y'o yaha mwateñi munzi, mi a u biza Luzi. I sa li libizo la ona ni ka nako ye.
Makanana ha ba piliswa
27 #
Josh 17.11-13
Ba lusika lwa Manase ha ba si ka leleka batu ba ba ne ba pila mwa minzi ya Beti-Sheani, Taanaki, Doro, Jibileami, Megido ni ba minzi ye fakaufi. Makanana ba siyala ba nze ba ipilela mwateñi cwalo. 28Maisilaele ha ba se ba na ni maata, ba hapeleza Makanana ku ba sebeleza kono ha ba si ka ba leleka kamukan'a bona.
29 #
Josh 16.10
Ba lusika lwa Eferaimi ha ba si ka leleka Makanana ba ba ne ba pila mwa munzi wa Gezeri, mi ba zwelapili ku pila ni bona cwalo.
30Ba lusika lwa Zebuloni ha ba si ka leleka Makanana ba ba ne ba yahile mwa minzi ya Kitironi ni Nahalele. Makanana bao ba pila ni bona, mi ba ba sebeleza.
31Ba lusika lwa Asere ha ba si ka leleka batu ba mwa Ako, Sidoni, Akilabi, Akizibi, Heliba, Afiki ni Rehobo. 32Batu ba Asere ba yaha ni Makanana ba ba ne ba inzi mo, kakuli ne ba si ka lelekwa.
33Ba lusika lwa Nafetali ha ba si ka leleka batu ba ba ne ba yahile mwa minzi ya Beti-Shemeshi ni Beti-Anati. Kono ni bona ba yaha ni Makanana ba sibaka seo, mi ba ba hapeleza ku ba sebeleza.
34Maamori ba kutiseza ba lusika lwa Dani mwa naha ya malundu, mi ha ba si ka ba lumelela ku taha mwa libala. 35Maamori ba pila cwalo mwa malundu a Hari-Heresi, Ajaloni ni Shaalabimi, kono ba busiwa ki ba lusika lwa Josefa, mi ba ba sebeleza.
36Mululwani wa Maamori n'o zwa kwa Akarabimi mi n'o zamaya cwalo, mane ku y'o kambamela kwa Sela.
Currently Selected:
Baatuli 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.