2 Litaba 1
1
Mulena Salumoni u kupa butali
(1 Male 3.1-15)
1Salumoni, mwan'a Mulena Davida, a swala mubuso wa hae ka mazoho a mabeli. Muñ'a Bupilo, Mulimu wa hae, a mu fuyaula mi a mu fa maata a matuna.
2Salumoni a fa taelo kwa manduna ba hae kamukana ba ba zamaisa makolo a batu ba sikiti, ba mwanda, manduna kaufela ba muso, litoho za limba ni batu kamukana. 3A ba laela kuli ba ye ni yena kwa sibaka sa ku lapelela, ili kwa Gibioni. Ba ya kwateñi kakuli ki kona ko ne i tomilwe Tende ya Kopano, ye n'e ezizwe ki Mushe, mutang'a Muñ'a Bupilo, mwa lihalaupa. 4#2 Sam 6.1-17; 1 Lita 13.5-14; 15.25—16.1 Nihakulicwalo Likwati la Bulikani, lona, ne li li mwa Jerusalema, li bulukilwe mwa Tende y'a n'a tomile Mulena Davida h'a y'o li nga kwa Kiriati Jearimi. 5#Mut 38.1-7 Katala ka kopa ka ka ne ka ezizwe ki Bezalele, mwan'a Uri wa mushiku wa Hiri, ni kona ne ka li mwa Gibioni fapil'a Tende ya Kopano. Salumoni ni batu kaufela ba lapela Muñ'a Bupilo hona foo. 6Mulena a sebeleza Muñ'a Bupilo fapil'a Tende ka ku eza litabelo fa katala ka kopa. A bulaya limunanu ze sikiti mi a li ciseza fateñi mutumbi.
7Bona busihu bo, Mulimu a iponahaza ku Salumoni, mi a mu buza, a li, “U bata kuli ni ku fe sika mañi?”
8Salumoni a alaba, a li, “Kamita u bonisize lilato le lituna ku Davida, ndate, mi cwale u ni yolisize mwa situlo sa hae sa bulena. 9#Sim 13.16; 28.14 Mawee, Muñ'a Bupilo Mulimu, z'o n'o sepisize ndate li ezahalile. U ni ezize mulena wa batu ba bañata, ba ba si na palo. 10Cwale u ni fe butali ni zibo ya ku ba busa. Hakusicwalo ni ta kona cwañi ku busa sicaba se si kuma fa?”
11Mulimu a alaba Salumoni, a li, “U ketile hande. Bakeñisa ku keta liluwo, bufumu, libubo, kamba lifu la lila za hao, kamba mane ku pila nako ye telele, u kupile butali ni zibo kuli u kone ku busa batu ba, be ni ku ezize mulen'a bona. 12Ni ta ku fa butali ni zibo. Mi fahalimw'a zeo, ni ta ku fa bufumu bo buñata, liluwo ni libubo le lituna, ili limpo ze fita za mulena ufi ni ufi ya kile a ba teñi kamba ya ta ba teñi.”
Bufumu ni maata a Salumoni
(1 Male 10.14-29)
13Cwale Salumoni a zwa mwa sibaka sa ku lapelela mwa Gibioni, mo ne ku na ni Tende ye Kenile, a kutela kwa Jerusalema, mi a y'o busa sicaba sa Isilaele. 14#1 Male 4.26 A lukisa likoloi za mpi ze sikiti ka mianda ye mine, mi a kopanya lipizi ze likiti ze lishumi ka ze peli. Ze ñwi a li buluka mwa Jerusalema, mi ze n'e siyezi a li isa mwa minzi ye fapa-fapahani. 15Mwa puso ya hae, silivela ni gauda ne li swana sina macwe feela mwa Jerusalema, mi likota za sidare ne li ze ñata sina likota za sikomora feela. 16#Mul 17.16 Baleki ba lika za mulena ne ba leka lipizi kwa Musiri ni mwa Silisia. 17Ne ba leka ni likoloi kwa Egepita. Kihona ba t'o li lekisa kwa malena ba Mahiti ni ba Maasiria ka teko ya muwaya-waya wa silivela o eza mianda ye silezi fa koloi ni koloi, ni mwanda ka mashumi a ketalizoho fa pizi ni pizi.
Currently Selected:
2 Litaba 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.