Tito 1
1
Saludo
1Esaki ta karta di Pablo, sirbidó di Dios i apòstel di Hesu-Kristu. Mi ta apòstel pa hiba e eskohidonan di Dios na fe i na un konosementu real di e bèrdat ku ta kuadra ku fe kristian, 2i tambe pa hende por tin speransa riba bida eterno. Dios, ku no ta gaña, a primintí e bida eterno ei promé ku kuminsamentu di tempu. 3I awor, na e momento adekuá, Dios a manifestá su promesa pa medio di predikamentu di e bon notisia; ta E mes, nos Salbador, a enkargá mi pa mi predik'é.
4E karta akí ta pa Tito,#2 Korintionan 8:23; Galatanan 2:3; 2 Timoteo 4:10 mi yu berdadero den e fe ku nos tur dos tin en komun.
Dios Tata i Kristu-Hesus, nos Salbador, duna bo grasia i pas.
Tito su trabou na Kreta
5Mi a laga bo atras na Kreta pa bo kaba di regla e kosnan ku ainda tabata falta i nombra ansiano di iglesia den kada pueblo, manera mi a enkargá bo. 6Un ansiano mester ta ireprochabel. E mester ta fiel na su kasá#1:6 fiel na su kasá por nifiká tambe ku e ansiano no a divorsiá nunka òf kasa ku mas ku un hende i su yunan mester ta kreyente; e yunan no mester karga nòmber di ta hende ku ta biba un bida parotin òf di ta indisipliná. 7Sí, un lider di iglesia ta manehá asuntu di Dios, p'esei mes e mester ta ireprochabel. E no mester ta arogante, kla pa rabia, bisiá na biña, buskadó di pleitu òf hende ku ta kore tras di ganashi deshonesto. 8Pero e mester ta hospitalario, hende ku ta stima loke ta bon, prudente, hustu, dediká na Dios, i disipliná. 9Mester ta un hende ku ta tene duru na e mensahe berdadero ku el a siña, ya e por kurashá otro ku e siñansa sano i refutá argumento di e kontrinkantenan.#1 Timoteo 3:2-7 10Pasobra tin hopi, spesialmente e hudiunan ku a bira kristian, ku ta rebeldiá kontra outoridat den iglesia, kana papia kos di loko i despistá otro hende. 11Ta nesesario pa tapa nan boka; pa ganashi deshonesto nan ta bruha famia henter siñando nan loke no ta kuadra. 12Un hende di Kreta mes, un di nan mes profetanan, a bisa:
‘Hende di Kreta semper ta gaña;
nan ta mal bestia, floho i goloso!’
13Loke el a bisa ta bèrdat! P'esei refutá nan fuertemente pa sana loke nan ta kere, 14ya nan no ta sigui pone atenshon na fábula hudiu i mandamentu inventá pa hende ku a bira lomba pa bèrdat.
15Pa esnan puru, tur kos ta puru, pero pa esnan impuru i ku no ta kere, nada no ta puru, pasobra asta nan mente i nan konsenshi mes no ta puru. 16Nan ta deklará ku boka ku nan konosé Dios, pero loke nan ta hasi ta mustra lo kontrario. Nan ta hende ku den bista di Dios ta detestabel, hende rebelde ku no ta sirbi pa hasi niun bon obra.
Currently Selected:
Tito 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013