Yozue 1
1
Dios ta duna Yozue instrukshon
1Despues di morto di su sirbidó Moises, SEÑOR a bisa Yozue, yu di Nun i man drechi di Moises: 2‘Mi sirbidó Moises a muri, awor prepará bo pa krusa riu Yordan ku henter pueblo di Israel, pa bai e pais ku lo Mi duna nan. 3Manera Mi a primintí Moises, lo Mi duna boso tur lugá kaminda boso pone pia. 4Boso teritorio lo kore for di e desierto i e serunan aya di Libanon te na e riu grandi Eufrat. Henter e pais di e hetitanan, te na Laman Mediteráneo na parti wèst lo ta di boso. 5Tanten bo ta na bida niun hende lo no por resistí bo.#Deuteronomio 11:24-25 Lo Mi ta ku bo, meskos ku Mi tabata ku Moises. Hamas lo Mi laga bo ni bandoná bo.#Deuteronomio 31:6,8; Hebreonan 13:5 6Sòru pa bo ta fuerte i balente.#Deuteronomio 31:6,7,23 Bou di bó guia e pueblo akí lo heredá e pais ku Mi a hura di duna nan antepasadonan. 7Un kos sí: sòru pa bo ta hopi fuerte i balente. Atené bo na henter e lei ku mi sirbidó Moises a duna bo. Kumpli ku e lei sin desviá niun kaminda. E ora ei tur loke bo hasi lo bai bo bon. 8No stòp di lesa e buki di lei akí nunka; meditá riba dje di dia i anochi i hasi presis manera tin skibí den dje, pasobra e ora ei lo bo logra bo metanan i lo bo tin éksito. 9Kòrda ku Mi a bisa bo pa bo ta fuerte i balente. No tene miedu ni laga niun hende spanta bo, pasobra Ami, SEÑOR, bo Dios, lo ta ku bo unda ku bo bai.’
Yozue ta prepará pa konkistá Kanaan
10E ora ei Yozue a duna e lidernan di e pueblo òrdu: 11‘Pasa den kampamentu i bisa e hendenan: “Prepará kos pa kome na kaminda, pasobra denter di tres dia boso lo krusa riu Yordan i tuma e pais ku SEÑOR, boso Dios, lo duna boso komo propiedat.” ’ 12I Yozue a bisa tribu di Ruben, tribu di Gad i e mitar tribu di Manase: 13‘Kòrda loke Moises, sirbidó di SEÑOR, a ordená. El a bisa ku SEÑOR, boso Dios, a duna boso sosiegu den e pais akí. 14Boso kasánan, yunan i bestianan por keda atras den e pais ku Moises a duna boso e banda akí di riu Yordan. Pero tur e hende hòmbernan balente mester sali dilanti di nan rumannan, bon armá pa bai guera. Boso mester yuda boso rumannan 15te dia SEÑOR duna nan tambe sosiegu, meskos ku El a duna boso. Yuda nan te dia nan tambe tuma e pais ku SEÑOR, boso Dios lo duna nan komo propiedat. Despues boso por bini bèk na e pais ku Moises, sirbidó di SEÑOR, a duna boso pariba di riu Yordan, i keda biba aki definitivamente.’#Numbernan 32:28-32; Deuteronomio 3:18-20; Yozue 22:1-6
16Nan a kontestá: ‘Nos lo hasi tur loke bo ta ordená nos i bai unda ku bo manda nos. 17Meskos ku semper nos a tende di Moises, nos lo tende di bo tambe. Mare SEÑOR, bo Dios, por ta ku bo manera E tabata ku Moises. 18Tur esnan, ku nenga di obedesé bo òrdunan i keda surdu pa bo palabranan, ora bo manda nan hasi kiko ku ta, mester muri. Sòru sí pa bo ta fuerte i balente!’#Numbernan 27:20; Deuteronomio 34:9
Currently Selected:
Yozue 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013