Daniel 1
1
Daniel i su amigunan na Bábel
1Den e di tres aña ku Yoyakim tabata rei di Huda, Nebukadnèsar, rei di Babilonia, a bai Herusalèm i a sitia e siudat.#2 Reinan 24:1; 2 Krónikanan 36:5-7 2SEÑOR a entregá Yoyakim den man di Nebukadnèsar i a laga Nebukadnèsar bai ku un parti di e artíkulonan ku ta usa den tèmpel. El a hiba nan Shinar#1:2 Shinar: un otro nòmber pa Babilonia. den tèmpel di su dios. Aya el a warda nan den kamber di tesoro.
3-4Nebukadnèsar a ordená Ashpenaz, hefe di e funshonarionan na palasio, pa skohe for di famia real i famianan prominente israelita, algun hóben, ku despues di tempu lo por a drenta sirbishi na palasio real. Nan mester tabata hóbennan ku bon tipo, yen di sabiduria riba tur tereno, sin niun defekto físiko. Tambe nan mester tabata bon den siensia. Mester a siña nan literatura i idioma di Babilonia.#2 Reinan 20:17-18; 24:10-16; 2 Krónikanan 36:10; Isaías 39:7-8 5Rei a fiha ku tur dia nan mester a haña e mes kuminda i e mes biña ku tabata sirbi rei. I despues di un edukashon di tres aña, nan por a drenta den su sirbishi.
6Entre esnan ku nan a skohe tabatin Daniel, Hananías, Mishael i Azarías, hóbennan for di Huda. 7E hefe di funshonarionan a duna nan nòmbernan di Babilonia. El a yama Daniel: Belteshasar, Hananías: Shadrak, Mishael: Meshak i Azarías: Abed-Nego. 8Daniel a disidí di no hasi su mes impuru ku e kuminda i ku e biña ku rei tabatin kustumber di gasta. P'esei el a pidi e hefe pa no oblig'é hasi su mes impuru.#Judit 12:2; Ester 4:17x 9Dios a laga e petishon di Daniel kai den bon tera serka e hefe. 10Pero tòg e hefe a bisa Daniel: ‘Mi tin miedu ku aworó shon rei por haña ku boso no ta mustra mes salú ku e otro hóbennan di boso edat i ku e ta kulpa ami di esei. Pasobra ta e mes a fiha loke boso mester kome i bebe.’ 11E ora ei Daniel a bisa e mayordomo, ku e hefe di funshonarionan a pone pa kuida e i su amigunan: 12‘Por fabor, hasi un prueba ku bo sirbidónan: duna nos dies dia largu bèrdura so pa kome i awa so pa bebe; 13kompará nos aspekto físiko e ora ei ku esun di e hóbennan ku sí ta kome e kuminda di rei. Segun resultado di e prueba, bo ta disidí kiko bo ta hasi ku nos.’ 14El a bai di akuerdo ku e hóbennan i a hasi e prueba dies dia largu. 15Ora e dianan akí a pasa, nan tabata mustra mas mihó i mas salú ku e otro hóbennan. 16For di e dia ei e mayordomo tabata kita e kuminda i e biña ku Daniel i su amigunan mester a haña i e tabata duna nan bèrdura. 17Dios a duna e kuater hóbennan akí inteligensia, konosementu di tur sorto di literatura i tambe hopi sabiduria. Ademas Daniel tabatin e don pa komprondé tur sorto di vishon i soño.
18Despues ku e tempu ku rei a fiha pa nan edukashon a pasa, e hefe di e funshonarionan a hiba e hóbennan serka rei. 19Ora rei a papia ku nan, Daniel i su amigunan a hasi un mihó impreshon riba dje ku tur e otronan i nan a drenta den su sirbishi. 20I den tur kaso ku el a pidi nan konseho, nan a resultá dies bia mas sabí i inteligente ku tur miradó di destino i eksorsista den henter reino.
21Daniel a keda na palasio te den e promé aña ku Korèsh tabata rei.#Esdras 1:1
Currently Selected:
Daniel 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013