YouVersion Logo
Search Icon

2 Samuel 1

1
David ta haña notisia di Saul su morto
1Despues di morto di Saul,#1 Samuel 31 ora David a kaba di derotá e amalekitanan,#1 Samuel 30 el a bolbe Siklag i keda dos dia ei. 2Ma riba e di tres dia a yega un hòmber for di kampamentu di Saul; su pañanan tabata tur kibrá i e tabatin tera riba su kabes. Ora el a yega serka David, el a bùig te na suela pa demostrá rèspèt. 3David a puntr'é: ‘Di unda bo a bini?’ El a kontestá: ‘Mi a logra skapa for di kampamentu di Israel.’ 4‘Ta kiko a pasa antó?’ David a bolbe puntra. ‘Bisa mi!’ ‘T'asina ku e sòldánan a hui for di bataya i hopi di nan a muri; Saul i su yu Yonatan tambe a muri,’ e hòmber a rospondé. 5E ora ei David a puntra e hóben ku a trese e notisia akí p'e: ‘Kon bo por sa ku Saul i su yu hòmber a muri?’ 6E hóben a kontestá: ‘Pa puru kasualidat mi tabata riba seru Guilboa. Mi a mira kon Saul tabata lèn riba su lansa i kon e garoshinan di guera i e sòldánan riba kabai tabata bini riba dje. 7Na e momento ei el a bira wak patras i a mira mi. El a yama mi. Mi a rospond'é: “Na rei su òrdu.” 8Despues el a puntra mi ken mi ta i mi a kontest'é ku mi ta un amalekita. 9E ora ei el a bisa mi: “Bini serka i mata mi, pasobra ounke mi ta na bida, mi ta sinti ansha di morto.” 10Asina ta, ku mi a aserk'é i mat'é, pasobra mi a realisá ku lo e no por a keda biba mas despues di su kaida. Mi a kita e diadema for di su kabes i e armbant for di su brasa, pa mi trese nan pa bo, mi shon.’#1 Samuel 31:1-6; 1 Krónikanan 10:1-6
11E ora ei David i tur esnan ku tabata kompañ'é a sker nan paña di fèrdrit. 12I te ora nochi a sera nan a lamentá, yora i yuna pa Saul i su yu Yonatan i pa e israelitanan, e pueblo di SEÑOR, pasobra nan tur a kai víktima di spada. 13Despues David a puntra e hóben ku a trese e notisia: ‘Di unda bo ta?’ El a rospondé: ‘Mi ta yu di un amalekita, di un strañero ku a bin biba aki.’ 14‘Kon bo por a riska hisa bo man pa e rei ku SEÑOR mes a skohe i mat'é?’ David a bisa. 15David a yama un di su sirbidónan i a orden'é: ‘Bini aki, hinka e hòmber akí mata.’ E sirbidó a hinka e amalekita mata. 16David a bisa: ‘Bo mes ta responsabel pa bo morto, pasobra bo mes a deklará ku bo ta kulpabel ora bo a konfesá ku bo a mata SEÑOR su rei skohí.’
David ta lamentá morto di Saul i Yonatan
17David a kanta e lamento akí pa Saul i su yu Yonatan. 18E Kantika di Bog akí ta pará den e Buki di Hustu pa siña e hendenan di Huda.#Yozue 10:13
19‘O, Israel, mira bo orguyo tumbá riba bo serunan!
Ai, e héroenan a kai!
20No bai konta na Gat,
no anunsi'é den kaya di Ashkelon,
pa e muhénan di e filisteonan no sinti nan gosá i e muhénan pagano ei no grita di legria.
21Serunan di Guilboa,
mare ni serena ni áwaseru no kai mas riba boso,
ni kunuku fértil tapa boso.
Pasobra ei e eskudo di e héroenan a mancha,
e eskudo di Saul, no mas ku vèt huntá.
22Sin sanger di víktima
ni vèt di héroe
nunka e bog di Yonatan sa bini bèk;
spada di Saul nunka sa bolbe sin a logra su meta.
23Saul i Yonatan, tan stimá i simpátiko,
nunka separá, ni den bida ni den morto,
mas lihé ku águila, mas fuerte ku leon.
24Muhénan di Israel, yora Saul
ku a bisti boso rikamente ku paña kostoso
i ku a dòrna boso bistí ku prenda di oro!
25Ai, e héroenan a kai den kayente di bataya!
Yonatan, tumbá riba bo serunan.
26Bo morto tin mi tristu, Yonatan, mi ruman,
mi a stima bo hopi!
Mi tabata mas enkantá ku bo amor
ku mi tabata ku e amor di hende muhé.
27Ai, e héroenan a kai!
E armanan a bai pèrdí!’

Currently Selected:

2 Samuel 1: BPK13

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy