Fanisana 1
1
FANISANA
1. FANISAM-BAHOAKA
(Jereo 26,1-51; 2Sam 24)
1Any an’efitra Sinaia, tao an-trano lay fihaonana, tamin’ny andro voalohany amin’ny volana faharoa, taona faharoa taorian’ny nivoahana tany amin’ny tany Ejipta, dia niteny tamin’i Môizy i Iaveh nanao hoe; 2«Alao isa ny fiangonan’ny zanak’i Israely rehetra, araka ny fianakaviany#1,2 Fianakaviany. Isam-poko dia nizarazara ho antokony vitsivitsy atao hoe fianakaviana; ary ny fianakaviana indray nisy fitsinjarany ho trano, izany hoe fitambaran’ny fianakaviana maromaro, izay iray fototra na razana niaviana. Ny hoe fokom-pianakaviana dia milaza ny antokom-pianakaviana iray fototra niaviana. sy ny fokom-pianakaviany avy, ka ny anaran’ny lehilahy rehetra isam-batan’olona no hisaina tsirairay avy, 3hatramin’ny roapolo taona no ho miakatra, dia ny lehilahy rehetra amin’i Israely izay mahatàm-piadiana. Ianao sy i Aarôna no hanisa azy araka ny isan-tokony avy; 4ary lehilahy iray avy, amin’ny isam-pokony, izay filohan’ny fokom-pianakaviany avy, no hiaraka aminareo.»
Ireo tendrena hanao ny fanisana
(Jereo 10,13-28)
5«Ireto no anaran’ny lehilahy hiaraka aminareo: Ny amin’i Robena: Elisora zanak’i Sedeora; 6ny amin’i Simeôna: Salamiela zanak’i Sorisadaia; 7ny amin’i Jodà: Nahasôna zanak’i Aminadaba; 8ny amin’i Isakara: Natanaely zanak’i Soara; 9ny amin’i Zabolôna: Eliaba zanak’i Helona; 10ny amin’ny terak’i Josefa: ny amin’i Efraima: Elisamà zanak’i Amioda; ny amin’i Manase: Gamaliela zanak’i Fadasora: 11ny amin’i Benjamina: Abidàna zanak’i Jedeôna; 12ny amin’i Dana: Ahiesera zanak’i Amisadaia; 13ny amin’i Asera: Fegiela zanak’i Okràna; 14ny amin’i Gada: Eliafasa zanak’i Doela; 15ny amin’i Neftalì: Ahira zanak’i Enàna. 16Ireo no voafidy tamin’ny fiangonana. Lohan’ny firenena avy amin’ny razany izy sy mpifehy arivo#1,16 Mpifehy arivo. Ny atao hoe arivo amin’i Israely dia fizaran’ny foko izay misy lohafianakaviana arivo eo ho eo. amin’i Israely.»
17Nalain’i Môizy sy i Aarôna ireo olona izay efa voatendry amin’ny anarany avy, 18dia nanaika ny fiangonana rehetra izy, ho amin’ny andro voalohan’ny volana faharoa, ka ny hatramin’ny roapolo taona no ho miakatra rehetra, dia samy nosoratana araka ny fianakaviany sy ny fokony, ary noisaina ny anarany isam-batan’olona. 19Araka ny nandidian’i Iaveh an’i Môizy; dia nataony ny fanisana tany an’efitra Sinaia.
Ny fanisana ny vahoaka
20Ny tera-dRobena lahimatoan’i Israely, ny taranak’ireo araka ny fianakaviany sy ny fokom-pianakaviany avy, no nisainy araka ny anarany isam-batan’olona, ny lehilahy rehetra hatramin’ny roapolo taona no ho miakatra, ny lehilahy rehetra mahatàm-piadiana, 21dia nisy 46.500 no voasoratra ho isan’ny fokon-dRobena.
22Ny terak’i Simeôna, ny taranak’ireo araka ny fianakaviany sy ny fokom-pianakaviany avy, ny voasoratra ho isan’ireo, rehefa nisaina ny anarany isam-batan’olona, ny lehilahy rehetra hatramin’ny roapolo taona no ho miakatra, ny lehilahy rehetra mahatàm-piadiana, 23dia nisy 59.300 no voasoratra ho isan’ny fokon’i Simeôna.
24Ny taranak’i Gada, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 25dia nisy 45.650 no voasoratra ho isan’ny fokon’i Gada.
26Ny terak’i Jodà, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 27dia nisy 74.600 no voasoratra ho isan’ny fokon’i Jodà.
28Ny terak’i Isakara, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy mahatàm-piadiana, 29dia nisy 54.400 no voasoratra ho isan’ny fokon’i Isakara.
30Ny terak’i Zabolôna, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 31dia nisy 57.400 no voasoratra ho isan’ny fokon’i Zabolôna.
32Ny zanak’i Josefa: ny taranak’i Efraima, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 33dia nisy 40.500 no voasoratra ho isan’ny fokon’i Efraima.
34Ny terak’i Manase, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 35dia nisy 32.200, no voasoratra ho isan’ny fokon’i Manase.
36Ny terak’i Benjamina, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 37dia nisy 35.400 no voasoratra ho isan’ny fokon’i Benjamina.
38Ny terak’i Dana, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 39dia nisy 62.700 no voasoratra ho isan’ny fokon’i Dana.
40Ny terak’i Asera, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 41dia nisy 41.500 no voasoratra ho isan’ny fokon’i Asera.
42Ny terak’i Neftalì, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana, 43dia nisy 53.400 no voasoratra ho isan’ny fokon’i Neftalì.
44Ireo no voaisa nisain’i Môizy sy i Aarôna, mbamin’izy 12 lahy, filohany amin’i Israely, lehilahy iray avy isam-pokony. 45Ny zanak’i Israely rehetra izay nisaina araka ny fokom-pianakaviany avy, hatramin’ny roapolo taona no ho miakatra, ny lehilahy rehetra amin’i Israely izay mahatàm-piadiana, 46ny voaisa rehetra dia nisy 603.550.
47Tsy mba nisaina niaraka tamin’ireo ny Levita araka ny fokom-pianakaviany.
Fanoratana manokana ny Levita
48Niteny tamin’i Môizy i Iaveh nanao hoe: 49«Aza mba isaina ny fokon’i Levỳ, ary aza mba alaina isa miaraka amin’ny zanak’i Israely izy. 50Fa apetraho aminy kosa ny fikarakarana ny Fonenan’ny vavolombelona mbamin’ny fanaka aman-javatra rehetra momba azy. Izy ireo no hitondra ny Fonenana mbamin’ny fanaka rehetra momba azy; izy no hanao ny fanompoana ao aminy; ary izy no hitoby manodidina ny Fonenana. 51Rehefa hifindra ny Fonenana dia ny Levita no hangorona azy; rehefa hiorin-dasy indray ny Fonenana, izy koa no hanangana azy; fa raha olon-kafa no manakaiky eo, dia hohelohin-ko faty. 52Ny zanak’i Israely, dia samy hiorin-dasy ao amin’ny anjara tobiny samy manakaiky ny fanevany araka ny isan-tokony avy. 53Fa ny Levita kosa dia hitoby manodidina ny Fonenan’ny vavolombelona, mba tsy hipoahan’ny hatezerako ny fiangonan’ny zanak’i Israely, ary ny Levita no hiambina ny Fonenan’ny vavolombelona.»
54Dia notanterahin’ny zanak’i Israely avokoa izay rehetra nandidian’i Iaveh an’i Môizy; nataony izany.
Currently Selected:
Fanisana 1: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.