Jodà 1
1
Fiarahabana
1Izaho Jodà, mpanompon’i Jesoa Kristy, sy rahalahin’i Jakôba, mamangy ireo olom-boafidy izay malalan’Andriamanitra Ray, sy voatahiry ho an’i Jesoa Kristy; 2ho feno anie ny famindram-po sy fiadanana ary ny fitiavana nomena anareo.
Anton’ny taratasy
3Ry malala, noho ny faniriako mafy hanoratra aminareo ny amin’ny famonjena iombonantsika, dia voatery hanoratra ity taratasy ity ho anareo aho, mba hamporisika anareo hikely aina hiaro ny finoana, izay natolotra ny olo-masina indray mandeha monja. 4Fa misy olona sasany tafiditra an-tsokosoko aminareo, dia olona voasoratra hatry ny ela fa hanamelo-tena amin’izany, olona ratsy fanahy, mamadika ny fahasoavan’Andriamanitra ho fahalotoana, sady mandà an’i Jesoa Kristy, Andrian-tokana sy Tompontsika.
Ireo mpampianatra sandoka sy ny sazy miandry azy
5Tiako ny hampahatsiaro anareo ny zavatra efa renareo taloha, fa nony efa novonjen’ny Tompo#5 Ny Tompo, ny Zanak’Andriamanitra; misy vakiny hafa hoe, Jesoa. ho afaka tany Ejipta ny vahoakany, dia naringany indray izay tsy nino tatỳ aoriana. 6Ary ny Anjely tsy nahatana ny fiamboniany fa nitsoa-ponenana, dia tanany am-patorana mandrakizay ao anatin’ny haizina, sy tahiriziny ho amin’ny andro fitsarana lehibe. 7Toy izany i Sôdôma sy i Gômôra, mbamin’ny tanàna manodidina izay nijangajanga toa azy koa sy nanao ratsy tamin’ny nofo hafa, ka indro miampatra eo ho fananarana, miaritra ny afo mandoro azy mandrakizay.
Faniratsirana ataony
8Ireo olona ireo koa, milentika amin’ny redirediny, ka mandoto ny nofony toy izany, manamavo ny fahandrianana, ary manevateva ireo Voninahitra#8-9 Todiho ny Epistola faharoan’i Md. Piera 2,10-11.. 9Kanefa na i Misely Arkanjely aza, raha niady tamin’ny devoly, nifanditra taminy ny amin’ny fatin’i Môizy#9 Ny amin’ny fatin’i Môizy, sns. Ny fasan’i Môizy dia lazain’ny Soratra Masina (Deter 34, 6) fa «tsy misy olona mahalala azy»; fa tsy lazainy velively ilay adin’i Misely sy ny demony ny amin’ny fatiny, ka tokony ho lovantsofina fantatry ny olona, matoa lazain’i Md. Jodà tsotsotra toy izany, Toy izao no vinany nataon’ny sasany ny amin’izany: dia te haka ny fatin’i Môizy ny demony mba ho tongany hivavahan’Israely, fa nosakanan’i Misely Arkanjely mpiaro ny vahoakan’Andriamanitra., dia tsy sahy nanameloka azy tamin’ny teny fanozonana, fa izao fotsiny no nataony: Hofaizin’ny Tompo anie ianao. 10Fa ry zareo ireo kosa, sady manevateva ny zavatra tsy fantany fotsiny izao toy ny biby tsy manan-tsaina. 11Mila loza ireo, fa tafiditra amin’ny lalan’i Kaina izy, sy tafahitsoky ny tamby amin’ny hadisoan’i Balaama#11 Balaama. Todiho 2Pier 2,15-16. Kôre, ilay nikomy tamin’i Môizy (Fanis 16)., ary nanary tena amin’ny fikomian’i Kôre.
Haratsiam-panahiny
12Amin’ny sakafo iarahanareo mihinana, dia ireo no vato manafintohina, miletra tsy aman-kenatra, tsy mihevitra afa-tsy ny hamoky tena. Rahona tsy misy rano ireo, ka avoivoin’ny rivotra befahatany; hazo fararano, ka sady tsy am-boa no indroa maty sy voaongotra; 13onjan-dranomasina misamboaravoara, mandoa vorin’ny fahafaham-baràka ho azy; ary kintana mirenireny, fiandrin’ny haizim-pito mandrakizay.
14Ireo koa no efa novinanin’i Enôka, ilay fahafito#14 Fahafito. Fahafito izy tamin’ny taranak’i Adama tamin’i Seta (Jen 5). avy amin’i Adama, hoe: «Indro avy ny Tompo, omban’ny olo-masiny tsy tambo isaina, 15hitsara ny olona tsy an-kanavaka: hampiharihary ny halozan’ny asa ratsy rehetra nataon’ny ratsy fanahy, sy ny haratsian’ny teny rehetra nanevatevan’ny mpanota mankahala ny fivavahana an’Andriamanitra» 16Olona mpimonjomonjo lava izy ireo, tsy mionona amin’ny anjarany na oviana na oviana, manaraka ny danin’ny kibony hatrany hatrany, miavonavom-piteny izaitsizy, ary mandoka ny sasany mba hahazoany vola.
Famporisihana ny mpino
Ny fampianaran’ny Apôstôly
17Fa ianareo kosa, ry malala, dia tsarovy ny teny voalazan’ny Apôstôlin’i Jesoa Kristy Tompontsika fahiny, 18izay nanambara taminareo fa amin’ny andro farany dia hisy olona mpamitaka, handeha araka ny filàn-dratsiny mahamenatra, 19hitarika fitokotokoana, dia olona ara-batana, fa tsy mba manana ny Fanahy.
Ny adidy ara-pitiavana
20Aoka ianareo, ry malala, hiorina mafy amin’ny fototry ny finoanareo masina indrindra, hivavaka amin’ny alalan’ny Fanahy Masina, 21hitahiry tena amin’ny fitiavana an’Andriamanitra, ary hiankina amin’ny famindram-pon’i Jesoa Kristy Tompontsika, mba hahazo ny fiainana mandrakizay. 22Amindrao fo ny sasany izay miahanàhana; 23afaho amin’ny afo no famonjy ny sasany#23 Afaho amin’ny afo, sns., izany hoe, amin’ny loza hanjò (toy ny ho very finoana); na angamba amin’ny fahaverezana mandrakizay.; ary ny sasany indray amindrao fo, fa amin-tahotra, ka ankahalao na hatramin’ny akanjo voaloton’ny nofo aza.
Fiderana an’Andriamanitra
24Ary aoka anie ho an’Ilay manam-pahefana hiaro anareo tsy ho lavo, sy hampiseho anareo ho tsy manan-tsiny amam-peno haravoana eo anatrehan’ny fiandrianany, 25dia ho an’Andriamanitra tokana Mpamonjy antsika, amin’ny alalan’i Jesoa Kristy Tompontsika, ny voninahitra sy ny fiamboniana, ary ny hery sy ny fanjakana, hatrizay hatrizay, sy ankehitriny ary mandrakizay doria. Amen.
Currently Selected:
Jodà 1: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.