Jônasy 1
1
Nandà ny nanirahana azy i Jônasy
1Ary tonga tamin’i Jônasy zanak’i Amatì, ny tenin’i Iaveh, nanao hoe: 2«Mitsangana ianao, ka mankanesa any Niniva,#1,2 Niniva: renivohitr’i Asiria, miorina eo amoron’i Tigra avy eo ankavia, izay mifanandrify amin’ilay tanàna atao hoe Mosola ankehitriny. tanàna lehibe, hitory ny hamelezana azy, fa tafakatra hatraty Amiko ny haratsian’izy ireo».
3Dia nitsangana i Jônasy handositra ho any Tarsisa, lavitra ny tavan’i Iaveh#1,3 Lavitra ny tavan’i Iaveh: izany hoe, any amin’ny tany izay tsy mba anajana an’i Iaveh. Araka ny hevitra tao an-tsain’ny mpaminany, dia ny tany tsy mba onenan’ny Tompo, na tsy mba misy Fitoerana masina, izay voatokana ho fanompoana an’i Iaveh.. Nidina tany Jôpe#1,3 Jôpe: tanàna fitodian-tsambo ao amoron’i Mediteranea atsinanana, ary andrefan’i Palestina. Voalaza ao amin’ny Testamenta vaovao koa io tany io (Asa 9,36). Taloha ny anarany, dia natao hoe, Jafo, ary ankehitriny dia Jafà. izy, dia nahita sambo ho any Tarsisa, ka naloany ny saran-tsambo, dia niditra tao izy, hiaraka amin’izy ireo#1,3 Hiaraka amin’izy ireo: Izany hoe, hiaraka amin’ireo olona mpiantsambo. ho any Tarsisa, lavitra ny tavan’i Iaveh.
4Fa i Iaveh kosa nampifofofofo ny rivo-mahery teny amin’ny ranomasina, ka nisy tafio-drivotra teny amin’ny ranomasina; ny sambo efa nila ho vaky. 5Raiki-tahotra ny matilò ka samy nitaraina tamin’izay andriamaniny avy#1,5 Tamin’izay andriamaniny avy. Olona maro samy hafa fokom-pirenena no tao an-tsambo, ka samy nitalaho sy nibabababa tamin’izay noheveriny ho andriamaniny avy., sady nanary ny zavatra tao an-tsambo tany anaty ranomasina, mba hanamaivana azy; fa i Jônasy kosa nidina tao ambodi-sambo, dia nandry ka renoka natory tao. 6Avy nanatona azy ny kapitenin-tsambo, ka nanao taminy hoe: «Inona ity ataonao no matory foana? Mitsangàna antsoy ny Andriamanitrao#1,6 Antsoy ny Andriamanitrao: isam-pirenena dia samy nanana ny sampiny manokana avy, nefa samy nino sy nieky izy rehetra fa mba manana ny fahefany koa ireo andriamanitry ny firenena hafa, na iza na iza., ndrao mba mihevitra antsika Andriamanitra, ka tsy ho faty isika». 7Ary nifampilaza izy ireo nanao hoe: «Avia, hanao filokàna isika, mba hahafantarantsika izay mahatonga izao loza izao amintsika». Dia nanao filokana izy dia i Jônasy no voan’ny#1,7 I Jônasy no voa: lahatr’Andriamanitra no nahavoa azy: satria ho any Niniva no nanirahany azy, nefa nitady handositra any Tarsisa izy. filokana.
8Izay izy ireo nanao taminy hoe: «Lazao aminay re, izay mahatonga izao loza izao amintsika! Inona no raharahanao; avy aiza ianao; aiza no taninao; ary inona no firenenao?» 9Ka izao no navaliny azy ireo: «Hebrio aho, ary i Iaveh, Andriamanitry ny lanitra, izay nanao ny tany aman-dranomasina, no ivavahako». 10Dia raiki-tahotra mafy ireo olona ireo, ka nanao taminy hoe: «Inona izany ataonao izany!» Satria fantatr’ireo olona ireo fa nandositra lavitra ny tavan’i Iaveh izy, fa efa nambarany taminy izany. 11«Hataonay ahoana ianao, hoy ireo taminy, dia hitony amintsika ny ranomasina?» Fa mbola nihananonja, nihananonja mafimafy kokoa ny ranomasina. 12Ka hoy ny navaliny azy: «Raiso aho ka atsipazo any anaty ranomasina, ka hitony aminareo ny ranomasina; satria fantatro fa noho ny amiko, no mahatonga izao tafio-drivotra mafy izao aminareo».
13Nivory ny olona mba hitondra ny sambo hitody amin’ny tany maina, fa tsy afaka; satria nihananonja mafimafy kokoa nanohitra azy ny ranomasina. 14Koa dia niantso an’i Iaveh izy nanao hoe: «Endrey! ry Iaveh ô! aoka tsy ho faty noho ny amin’ny ain’ity lehilahy ity izahay na ataonao milonjo ny ra tsy manan-tsiny, satria Ianao no nanao araka izay sitrakao, ry Iaveh ô!» 15Dia noraisiny i Jônasy, natsipiny tany amin’ny ranomasina, ka nitony ny fisafoakan’ny ranomasina. Ary raiki-tahotra mafy an’i Iaveh ny olona, ka nanatitra sorona ho an’i Iaveh, sy raki-boady.
Currently Selected:
Jônasy 1: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.