Zakariya 1
1
DAALAM GE ZAKARIYA NE MA
(Zak 1—8)
Saŋge me ta ya mbi ta
1Swaga ge Dariyus ne ke del azi na gan zi go, saba ge tiimal go, Bage ɗiŋnedin jan anabi Zakariya ge Berekiya vya, ge Iddo baŋ go: 2Bage ɗiŋnedin ka ne tiiɗiya gḛ aŋ bá ma pal. 3Jya̰ nama go: «Bage ɗiŋnedin, Bage naa ge mbal pore ma ne jan go:
Gwa̰ me ya mbi ta, ka̰l ge Bage ɗiŋnedin, Bage naa ge mbal pore ma ne,
Mbi me, mbi mbo gwan’a aŋ ta,
Bage ɗiŋnedin, Bage naa ge mbal pore ma ne jya̰ ne.
4Ke me dimma ne aŋ bá ma go to, nama ge anabi ge dḛ zaŋgal ma ne ka waage nama go: Bage ɗiŋnedin, Bage naa ge mbal pore ma ne jan go: ‹Ya̰ me aŋ viya̰ mborra ge sone ma ne aŋ kaŋ kerra ge sone ma uzi›. Amma a be za̰ mbi to, a be gwan ne bama pala mbi fare janna ma pe se to, ka̰l ge Bage ɗiŋnedin ne. 5Aŋ bá ma ya le da ya ɗaa? Anabi ma me ɗe, a da ne pool kat ne ndwara ɗiŋnedin ɗaa? 6Mbi fare janna ma ne mbi eya ma ge mbi ne ya̰ nama mbi dore anabi ma wak zi, be det aŋ bá ma ta ya to ɗaa?
A saŋge ta ya se, a jya̰ no go: ‹Bage ɗiŋnedin, Bage naa ge mbal pore ma ne ke ne i dimma ne na ne dwá kerra go, i viya̰ mborra ma ne i kaŋ kerra ge sone ma pal.›»
Daalam ge zḛ ge: Tisi ma
7Swaga ge Dariyus ne ke del azi na gan zi go, dam wara azi para anda ge saba ge wol para ɗu ne zi, ndwara go saba Chebat, Bage ɗiŋnedin jan anabi Zakariya ge Berekiya vya, Iddo báŋ go:
8Ndi daalam ge mbi ne ɓó ɗaal zi no: Ndu son a̰me ndwa tisi káál sasaw pal, ka mḛya uwara Mirte#1:8: Mirte: Mirte a uwara ge ne don sore busur ge Israyela ma suwal go ne. ma buwal zi, baal pul se. Ne na go̰r ya tisi káál sasaw ma, ne ge bolo ma, ne ge saal ma mḛya me. 9Mbi ele swaga go: «A ma kaŋ ma ne go ɗaa, Bageyal?» Maleka ge ne ka jan mbi fare jan mbi go: «Mbi ben mo na pe zum.» 10Ndu ge ne mḛ́ ne uwara Mirte ma buwal zi jan go: «A nama ge Bage ɗiŋnedin ne teme nama mbo anna suwar pal se ma ne.» 11A jan maleka ge Bage ɗiŋnedin ne, ge ne mḛ́ ne uwara Mirte ma buwal zi go: «I á̰ suwar pal pet, suwar pet ya halas zi, a̰me ge iigiya to.» 12Maleka ge Bage ɗiŋnedin ne jan go: «Bage ɗiŋnedin, Bage naa ge mbal pore ma ne, a ma swaga go dḛ mo laar ba gá be ge hotɗa suwal Ursalima ma ne suwal ge Yuda ne ma pal, nama ge del ma̰ no wara ɓyalar mo laar ne hot ne nama pal ma ɗaa#Irm 25:11, 29:10.?» 13Bage ɗiŋnedin gwan ne maleka ge ne ka jan fare ne mbi fare ge kwaɗa, ne fare ge iyal laar. 14Maleka ge ne ka jan fare ne mbi jan mbi go: «Oy go: ‹Bage ɗiŋnedin, Bage naa ge mbal pore ma ne jan go:
Mbi da ne yil gḛ ne suwal Ursalima ma ne njal Siyona pe.
15Mbi da ne laar vḛneya gḛ ge pehir ge ɗogle ma
ge a ne ndi ta mbyatɗa ma pal,
ago mbi laar hó mbi naa pal ŋgeɗo baŋ,
amma nama sḛ ma a é mbi naa ma njot yál waɗeya›.
16‹Ne no pe, Bage ɗiŋnedin jan no go:
Mbi mbo gwan ŋgay kwa a̰se ge mbi ne Ursalima ta,
a mbo gwan sin mbi zok digi,
Ka̰l ge Bage ɗiŋnedin, Bage ge naa ge mbal pore ma ne,
a mbo gwan sin suwal Ursalima digi›.
17Oy digi uwale go:
‹Bage ɗiŋnedin, Bage naa ge mbal pore ma ne jan go:
Mbi suwal ma mbo gwan wi ne kaŋ kwaɗa ma,
Bage ɗiŋnedin mbo gwan iyal Siyona laar,
mbo gwan tal Ursalima›.»
Currently Selected:
Zakariya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.