Luka 1
1
Fare pala hageya
1Ne jo̰ naa gḛ a ɓyare njaŋge kaŋ ge fare ge ne ke nee buwal zi ma pal. 2A zwagre na njaŋgeya dimma ne naa ge a ne kwa na ne bama ndwara ma ne wa̰ i na pe go, nama mbe ma no a saŋge naa ge waage fare ge Dok ne ma. 3Mbi me, swaga hale fare ma pe ne bama pe dolla ya day go, mbi dwa go na ke ya kwaɗa, mbi njaŋge mo nama ne bama viya̰ go me, o ndu ga̰l ge ɓaŋlaŋ Tewfilus. 4Ne da pe, mo kwa go fare ge a ne wa̰ mo na pe, na fare ge fareba ne.
Waageya ne tolla ge Yohanna bage ke naa baptisma ne pe
5Dam ma ge Herodus, gan ge suwal Yahudiya ne pul zi, bage ke tuwaleya a̰me na dḭl Zakariya, ka varra ge Abiya ne zi. Na gwale hir ge Aaron ne ne, na dḭl Elizabet. 6Nama sḛ ma jwak, a ka naa ge dosol ma Dok ndwara se, a ka ke mborra wak honna ma ne wak yuwaleya ma ge Bageyal ne pal ne dulwak ɗu. 7Amma a ka be vya, ne da pe Elizabet ba̰ gisil, nama sḛ ma jwak a hatɗa sabar.
8Dam a̰me ɗu, Zakariya ne swaga ke na temel ge tuwaleya ne Dok ndwara se go, dimma ne a ne hon ta kerra go. 9Ha̰leya ge naa ge ke tuwaleya ma ne pal, a tal na ne uusi baare ta, na mbo til dukan zok ge mbegeya ge Bageyal ne zi. 10Ɓase ma ka tabeya zum ke kaɗeya swaga tyare dukan go. 11Maleka ge Bageyal ne dyan na ta, mḛya twal til dukan le matoson go. 12Swaga ge Zakariya ne kwa na, iigi, vo wan na. 13Amma maleka jan na go: «Zakariya, sya vo to, ago a za̰ mo kaɗeya go. Mo gwale Elizabet mbo tol mo vya, mo mbo tol na dḭl Yohanna. 14Mbo kat kaŋ laar saal ge be to ne mo pe, naa gḛ a mbo ke laar saal ne tolla ge na ne pe me. 15Ago mbo kat ɓaŋlaŋ Bageyal ndwara se, mbo njot oyo̰r jiya̰l, ko jiya̰l a̰me ge pore to bat. O̰yom ge mbegeya mbo wi na ne na ná laar zi ya day. 16Mbo saŋge Israyela vya ma gḛ ya Bageyal Dok ge nama ne ta. 17Mbo ka mborra na ndwara se ne o̰yom ma ne pool ge Iliya ne, mbo saŋge bá ma dulwak ya bama vya ma pal, mbo e naa ge za̰ wak to ma ɓol zwama ge naa ge dosol ma ne, ndwara nṵsi naa ge mbyatɗa ma ne Bageyal pe.» 18Zakariya jan maleka go: «Mbi kwa ma̰ gyana ɗaa? Ago mbi hatɗa sabar, mbi gwale doŋ kale go.» 19Maleka jan na go: «A mbi Gabriyel ne, mbi bage ne mḛ Dok ndwara se ne na temel pe ne, a teme mbi ya mo ta ndwara waage mo fare ge kwaɗa mbe no. 20Ndi, mo mbo ŋgele, mo mbo gwan far wak to ɗiŋ dam ge kaŋ mbe ma ke. Ne da pe mo be hon fareba mbi fare janna ma pal to, ago nama wak mbo wi bama swaga ma go tem.»
21Swaga mbe go, ɓase ma ka da̰re Zakariya, a ke ajab ne na ne ke ya kaal zok ge mbegeya zi ya pe. 22Swaga ge ne wá ya zum, be day jan nama fare to. A kwa go na ɓó daalam ne zok ge mbegeya zi ya. Ŋgeleya ge na ne zi, gá kar nama na tok. 23Swaga ge na dam temel ma ne á, gwan’a. 24Dam ma kwaɗa lwak go̰r go, na gwale Elizabet her emel. Woy tene ɗiŋ saba anuwa̰y, ka jan tene go: 25«No a kaŋ ge Bageyal ne ke ne mbi ne: dam ge ne saŋge na ndwara ya mbi pal, ndage saaso ne mbi pal uzi naa dasana ma buwal zi.»
Waageya ne tolla ge Jeso ne pe
26Saba ge myanaŋgal go, Dok teme maleka Gabriyel mbo Nazaret ge suwal Galile ne ya, 27ge vya kale a̰me, na ge Yusuf ge ne pehir ge Dawda ne zi ne sare na ta. Vya kale mbe dḭl Maryam. 28Maleka wat ya na ta diŋ, jan na go: «Ke laar saal, mo ge ne ɓo kwa a̰se! Bageyal a poseya ne mo.» 29Swaga ge ne za̰ fare mbe, iigi ge be to. Ele tene go na ma wak sanna ge go pe ne de. 30Maleka jan na go: «Maryam, kaage mo sya vo to! Ago Dok kwa mo a̰se. 31Ndi, mo mbo her emel, mo mbo tol vya son, mo mbo tol na dḭl Jeso. 32Mbo kat ɓaŋlaŋ, a mbo tol na Bage ne digi zi ya vya, Bageyal Dok mbo hon na hool gan ge na bá Dawda ne. 33Mbo ke muluk pehir ge Yakub ne pal ɗiŋnedin, na muluk pe mbo á to bat.» 34Maryam jan maleka go: «Ke ma̰ gyana, ne jo̰ mbi gale be kwa ndu son to!» 35Maleka gwan ne na janna go: «O̰yom ge mbegeya mbo sugi ya mo pal, pool ge Bage ne digi zi ya ne mbo kulbi mo se, ne pe no, vya ge mo ne mbo tol na ya a mbo tol na Mbegeya ge Dok ne, Dok vya me. 36Ndi, mo sele Elizabet, sabar ge na ne zi, da ne emel ge vya son ne. Na ge ne ba̰ gisil, se no ya na saba ge myanaŋgal zi. 37Ago a̰me ge waɗe Dok to#Pe 18:14..» 38Maryam jan go: «Mbi kale ge Bageyal ne ne, na ke fare janna ge mo ne!» Maleka yá̰ na.
Mborra ge Maryam ne ya Elizabet ta
39Dam mbe ma pul zi, Maryam ɗage avun cap, mbo ge swaga njal ma ya, suwal a̰me ge Yuda ne ya. 40Wat Zakariya diŋ, san Elizabet wak. 41Swaga ge Elizabet ne za̰ wak sanna ge Maryam ne ɗe, na vya ɗage mbyale na, O̰yom ge mbegeya wi Elizabet, 42ndage na ka̰l janna go: «Ne naa zaab ma buwal zi, mo da ne wak busu, ge ne mo laar zi da ne wak busu. 43Mbi wuɗi koko ge mbi Bageyal ná ba mbo ya mbi go ɗaa? 44Ndi, swaga ge mbi ne za̰ mo wak sanna, vya ge ne mbi laar zi ɗage mbyale mbi ne laar saal. 45Bage ne ho̰ fareba go, fare ge Bageyal ne jya̰ na wak mbo wi da ne laar saal.»
Kaŋ mballa ge Maryam ne
46Maryam jan go:
«Mbi uware Bageyal!
47Mbi da ne laar saal ne Dok, mbi Bage máya pe,
48ne na ne dó na ndwara na kale ge be a̰me pe to pal pe.
Ago doŋ pe ma mwaɗak a mbo ga tol mbi bage laar saal.
49Ago Bage pool pet ke mbi kaŋ ge ɓaŋlaŋ.
Na dḭl mbegeya.
50Kwa a̰se ge na ne, a doŋ pe ma ne doŋ pe ma
ge nama ge a ne sya na vo ma ta.
51Ŋgay pool ge na ne,
ɓarse naa ge pala ga̰l ma se.
52Ndage gan ma uzi ne bama hool gan ma pal,
hé naa ge be a̰me pe to ma pala digi.
53Wi naa ge woɗegeya ma ndwara ne kaŋ kwaɗa ma,
yá̰ naa ge tok pool ma gwanna tok baŋ.
54Sya na dore Israyela ko̰r,
dwá da ne kwa a̰se ge na ne,
55ge na ne ŋgay na i bá ma ta,
ge Abraham ma ne na hir ma ta ɗiŋnedin.»
56Maryam gá katɗa Elizabet ta mbo kaŋ ge saba ataa go, ba ɗage gwan na ya.
Tolla ge Yohanna bage ke naa baptisma ne
57Swaga ge dam ge Elizabet tolla ne mbya ɗe, tol vya son. 58Na naa ge gulum pala ma, ne na sele ma, swaga ge a za̰ go Bageyal ŋgay kwa a̰se ge na ne ge baŋlaŋ na ta ɗe, a ke laar saal dagre ne na. 59Dam ge tiimal go, a mbo ya kun vya jyale ba̰y. A ɓyare go bama tol na dḭl Zakariya, na bá ta. 60Na ná jan go: «To, a tol na Yohanna.» 61A jan na go: «Ndu a̰me ne aŋ hir zi ge a ne tol na dḭl mbe go to.» 62A kar bama tok ele na bá go na ɓyare go a tó vya mbe dḭl gyana de. 63Jan go a ho̰ na gwal, njaŋge go: «Na dḭl Yohanna.» Nama sḛ ma pet, a ke ajab. 64Swaga mbe go, na wak hage, na ɗel sá, gá far wak, gá uware Dok. 65Vo wan naa ge a ne nama ne ka ne swaga ge ɗu go ma pet, naa ge ne ka ne suwal Yuda swaga njal go ma pet, a ka wan ta fare mbe pe. 66Naa ge a ne ka za̰ fare mbe ma a ka koy na bama dulwak zi, a ka jan go: «Vya mbe mbo kat dḛ gyana ɗaa?» Pool ge Bageyal ne kat ne na me.
Kaŋ mballa ge Zakariya ne
67Zakariya ge vya bá, O̰yom ge mbegeya wi na, ɗage waage fare go:
68«Bageyal, Dok ge Israyela ne dḭl ɓo uwareya,
ne na ne sya na ɓase ma ko̰r pe,
ne na ne zu na pe.
69Teme Bage zurra ge pool ya ne i pe,
ge vuwal pe ge na dore Dawda ne zi.
70Dimma ne na dḛ ne waage na
na anabi ge mbegeya ma wak zi go,
71ndwara zur i ne i naa ge ho̰l ma tok go,
ne naa ge a ne kwane i ma tok go.
72Ŋgay kwa a̰se ge na ne i bá ma ta,
be vyale ne na wak tuli ge harcal to,
73wi guniya ge na ne guni tene ne i bá Abraham
wak i ta ma̰ no,
74ndwara zur i ne i naa ge ho̰l ma tok go,
ne da pe i ba gá ke na temel mo̰r be vo,
75harcal zi, ne dosol zi,
na ndwara se i dam ma zi mwaɗak.
76Mo, vya jyale, a mbo tol mo anabi ge Bage ne digi zi ya ne,
mo mbo mbo Bageyal ndwara zḛ ndwara nṵsi na viya̰ pul#Mal 3:1.,
77ndwara ŋgay na ɓase ma go, Dok mbo má nama
da ne nama sone ma poreya ta,
78Dok ge i ne a wiya ne laar wanna ma ne kwa a̰se,
ne pe no mbo e kwaya̰l zenna i pal dimma ne gyala go,
79ndwara hon kwaya̰l ge naa ge ne tṵ zi, ge ne siya ma táál zi ma ta,
ndwara ɗame i mbo viya̰ pul ge halas go#Isa 9:1..»
80Vya ka donna, hat pool O̰yom zi. Gá ful pul zi ɗiŋ dam ge ne mbo ya dyan tene Israyela vya ma ta go.
Currently Selected:
Luka 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.