Temel Kerra ge Levi vya ma ne 1
1
EYA MA NE TUWALEYA MA PE
(Wat 1—7)
Tuwaleya ge tilla uzi
1Bage ɗiŋnedin tol Musa ne gúr swaga ɓol ta zi ya, jan na go 2na jya̰ Israyela vya ma go: Kadɗa ndu a̰me ne aŋ buwal zi ɓyare tyare kavaar tuwaleya hon Bage ɗiŋnedin, na tyare nday, ko gii. 3Kadɗa na tyare nday tuwaleya ge tilla uzi, na tyare nday pool ge be sáso. Mbo gene na ya gúr swaga ɓol ta wak go, ba tyare na, go no Bage ɗiŋnedin ba ame na tuwaleya. 4Mbo e na tok ge kavaar ge ne tuwaleya ge tilla uzi pe pal, go no Bage ɗiŋnedin ba ame na tuwaleya, ba pore na me. 5A mbo vyan nday pool mbe Bage ɗiŋnedin ndwara se. Aaron vya ma, naa ge ke tuwaleya ma, a mbo tyare na swama, a cigi na koŋleya twal tuwaleya ge ne gúr swaga ɓol ta wak go ta. 6A mbo sol nday mbe, a por na se. 7Aaron vya ma, naa ge ke tuwaleya ma, a mbo nṵsi uwara ma twal tuwaleya pal, a e na ol digi. 8A mbo nṵsi nday mbe duur ma, ne na pala ma, ne na num fegem uwara mbe pal digi. 9A mbo usi na laar zaaso ma, ne na koo ma, bage tuwaleya ba til nama mwaɗak twal tuwaleya pal a ba gá ɗusiya. Mbo kat tuwaleya ge tilla uzi, kaŋ ge hur tuli ne Bage ɗiŋnedin pe.
10Kadɗa ndu tyare gii tuwaleya ge tilla uzi, a tyare tame vya, ko ɓiya̰, na ka ge son, ge be sáso. 11A mbo vyan na twal tuwaleya le ge kuu ge go, Bage ɗiŋnedin ndwara se. Aaron vya ma, naa ge ke tuwaleya ma mbo cigi na swama ge twal tuwaleya ta, koŋleya se. 12A mbo por na se. Bage ke tuwaleya mbo abe na duur ma, ne na pala ma, ne na num fegem, mbo nṵsi nama uwara ol pal, twal tuwaleya pala digi. 13A mbo usi na laar zaaso ma, ne na koo ma, bage tuwaleya ba til nama mwaɗak twal tuwaleya pal a ba gá ɗusiya. Mbo kat tuwaleya ge tilla uzi, kaŋ ge hur tuli ne Bage ɗiŋnedin pe.
14Kadɗa ndu tyare njoole tuwaleya ge tilla uzi hon Bage ɗiŋnedin, na tyare maale ko tuk vya. 15Bage tuwaleya mbo gene na ya twal tuwaleya ta, mbo kun na pala ne na tok guwa̰r, mbo til na twal tuwaleya pal a ba gá ɗusiya, mbo cigi na swama twal tuwaleya ta koŋleya se me. 16Mbo ndage na ka̰l-zám, tur na uzi me, mbo kan nama ge twal tuwaleya le ge ham ge go, swaga ge a ne kan siim ge num ma ne go. 17A mbo hase na ne na ganwak pal go se, amma a mbo siɗi na se to. Bage ke tuwaleya mbo dol na uwara ol pal ge twal tuwaleya pala digi, mbo til na uzi a ba gá ɗusiya. No a tuwaleya ge tilla uzi, kaŋ ge hur tuli ne Bage ɗiŋnedin pe ne.
Currently Selected:
Temel Kerra ge Levi vya ma ne 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.