Juwel 1
1
1No a fare ge Bage ɗiŋnedin ne jya̰ Juwel ge Petuwel vya ne.
Tere baktar ma ne baktar
2Zá̰ me fare mbe ma no, aŋ naa ga̰l ma,
aŋ ge ne suwal go ma pet, so me aŋ togor.
Kaŋ ge go mbe pe no, ke ya go aŋ zaman go,
ko zaman ge aŋ bá ma ne go ɗu’a?
3Wá̰ me aŋ vya ma na pe,
aŋ vya ma me, nama wá̰ nama vya ma na pe,
nama vya ma me, nama wá̰ nama vya kon ma na pe.
4Kaŋ ge ɗay ma ne yá̰ na pe,
tere baktar ma zam na ya ya,
kaŋ ge tere baktar ma ne yá̰ na pe,
njḛḛ ma zam na ya ya,
kaŋ ge njḛḛ ma ne yá̰ na pe,
tere ma zam na ya ya.
5Kore me digi, aŋ ge ne fere ma, fya me digi,
sṵ́ me ta, aŋ pet ge ne njot oyo̰r jiya̰l ma,
ne da pe, a ndage oyo̰r jiya̰l ge giya̰l ya ne aŋ wak zi uzi.
6Ago wagal ma mbwatɗa lulum a mbo ja det mbi suwal pore mballa,
nama pool gḛ, a ɓase gḛ ge be isiya.
Nama kiya̰r ma dimma ne sonne pool kiya̰r ma go,
nama gasa-kal ma dimma ne sonne gwale gasa-kal ma go.
7A vḛne mbi gaaso oyo̰r ya uzi,
a karge mbi fere ma ya ne digi kakarak,
a ɗar nama go̰r ma ya uzi tatafat,
uwara kal ma ga mḛya saal ne ɗeŋgo.
8Ke me kḭḭmi dimma ne gwale giya̰l ne kan kasigir na ta
ndwara fyal na obe ge pul soy go.
9Ndu ge gwan gene kaŋ wak ge swara ma ne oyo̰r jiya̰l ne ya zok
ge Bage ɗiŋnedin ne zi to.
Go no me, naa ge ke tuwaleya ma,
nama ge ne ke Bage ɗiŋnedin temel ma ya kḭḭmi kerra zi.
10Gaaso ma vḛne ya uzi,
suwar ya kḭḭmi zi.
Gḛme ma vḛne ya uzi,
oyo̰r jiya̰l ge giya̰l á ya go,
num á ya go me.
11Naa ge gar kaŋ ma ndwara su ya leɗet,
naa ge gar oyo̰r ma yo̰re ta,
ne gḛme, ma ne gḛme ge fogor ma pe,
ne da pe, a̰me ge syatɗa to.
12Oyo̰r ma fya̰ ya go,
fere ma looɗe ya go,
uwara grenad ma, ne tumur ma, ne uwara pom ma,
ne uwara ge ne ful pul zi ma pet, a fya̰ go.
Laar saal be gwan ga ne naa dasana ma zi to.
Tol ta ke kaɗeya ne asiyam Bage ɗiŋnedin ndwara se
13Naa ge ke tuwaleya ma, ká̰ me kasigir ma aŋ ta, ke me kḭḭmi!
Aŋ ge ne ke temel ge twal tuwaleya ne ma, sṵ́ me ta, fya me digi,
mbo me ya dwamma ne kasigir ma kanna aŋ ta,
aŋ ge ne ke Dok temel ma!
Ago, ndu ge gwan gene kaŋ wak ge swara ma ne oyo̰r jiya̰l ma ya
zok ge aŋ Dok ne zi to.
14Hé me dam ne asiyam kerra pe,
tó me koteya ge ga̰l,
kote me naa ga̰l ma,
ne naa ge ne suwal diŋ ma ya se pet ge
zok ge Bage ɗiŋnedin, Dok ge aŋ ne zi,
kaɗe me Bage ɗiŋnedin na sya aŋ ko̰r.
Dam ge Bage ɗiŋnedin ne
15Yi, a ma dam ne go ɗaa!
Dam ge Bage ɗiŋnedin ne ga gwa,
dam mbe mbo ya go dimma ne bage vḛne kaŋ ge Bage pool pet
ne teme na ya vḛne kaŋ ma go#2:1-2,11, 3:4, 4:14, Isa 13:6-9, Eze 30:2-3, Amo 5:18..
16A abe nee kaŋzam ma ya swaga nee ndwara go gegel.
Laar saal ne sḛ tuli fafa̰y be gwan ga ne zok ge nee Dok ne zi to.
17Kaŋ hir ma hubi ya uzi veger ma pe se ya,
hal ma pul ga ya pṵṵl,
zok koy swara ma gulla se,
gḛme be gwan ga to.
18Ndi me yál njotɗa ge kavaar ma ne gale!
Nday ma gondoŋge anna swaga ma go pet,
zám ne nama pe to.
Ko gii ma puy, a ya yál njotɗa mbe zi.
Kaɗeya ge anabi ne
19O Bage ɗiŋnedin, mbi fyal mo ta!
Ol til sugur ya ne babur pul go uzi kakaɗak,
ol ɗaabe uwara ma ya ne ful ma pul zi uzi kakaɗak.
20Ko kavaar ge ful zi ma puy, a fyal mo pal.
Mam tok ma fya̰ ya digi,
ol me til sugur ge ne babur pul go ma ya uzi kakaɗak.
Currently Selected:
Juwel 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.