Irmiya 1
1
1Fare janna ma ge Irmiya ge Hilkiya vya ne, na ge ne hir ge naa ge ke tuwaleya ma ne zi. Irmiya ka kat suwal Anatot, ge ne Bayami vya ma suwal go. 2Bage ɗiŋnedin jya̰ na fare zaman ge Yozias ge Amon vya, gan ge suwal Yuda ne zi. A swaga ge Yozias ne ke del wol para ataa na gan zi go. 3Bage ɗiŋnedin gwan jan na fare ne zaman ge Yoyakim ge Yozias vya, gan ge suwal Yuda ne ya, ɗiŋ mbo del wol para ɗu wak aya ge zaman ge Sedekiyas ge Yozias vya, gan ge suwal Yuda ne zi, ɗiŋ mbo ya palla ge naa ge Ursalima ma ne go, saba ge anuwa̰y pul zi.
FARE WAAGEYA GE MULUK GE YUDA NE PAL
(1:4—25:13)
Tolla ge anabi Irmiya ne
4Mbi za̰ fare ge Bage ɗiŋnedin ne jan mbi go:
5«Tek ge mbi gale ne be mbwat mo mo ná laar zi to, mbi kwa mo,
tek ge mo gale ne be tol ne mo ná laar zi ya se to, mbi mbege mo,
mbi e mo go mo ka anabi ge pehir ge ɗogle ma ne#Isa 49:1, Gal 1:15..»
6Mbi jan go: «Ayay! Bageyal, Bage ɗiŋnedin, ndi, mbi kwar fare janna to, ago, mbi bool ne baŋ.» 7Bage ɗiŋnedin jan mbi go:
«Kaage mo jan go: ‹mbi bool ne baŋ› to.
Swaga ge daage pet ge mbi ne mbo teme mo ya go,
mo mbo mbo go,
fare ge daage pet ge mbi ne mbo hon mo wak ya,
mo mbo jan na.
8Sya nama ndwara vo to,
ago, mbi poseya ne mo, ndwara zur mo.»
Ka̰l ge Bage ɗiŋnedin ne.
9Bage ɗiŋnedin tyare na tok, dabe mbi wak, jan mbi go:
«Ndi, mbi yá̰ mbi fare ma ya mo wak zi.
10Kwa go, ma̰ no mbi ho̰ mo temel
muluk ma ne suwal ma ta, ne da pe,
mo mbugi, mo gú se,
mo vḛne, mo burmi uzi,
mo sḭ digi, mo gwan ɗḭ me.»
Irmiya kwa uwara amande ma ne kaja̰le daalam zi
11Mbi za̰ fare ge Bage ɗiŋnedin ne jan mbi go: «Irmiya, mo kwa ne go da ɗaa?» Mbi gwan ne na janna go: «Mbi kwa ne go uwara amande tok.» 12Bage ɗiŋnedin jan mbi go: «Mo ndi kwaɗa, ago mbi ka kat jejew ndwara wi fare ge mbi ne ma wak.»
13Mbi za̰ fare ge Bage ɗiŋnedin ne gwan jan mbi ge ndwara azi go: «Mo kwa ne go da ɗaa?» Mbi jan na go: «Mbi kwa ne go kaja̰le zetɗa, na wak sooleya le kuu ya.» 14Bage ɗiŋnedin jan mbi go:
«Yál ge ne mbo detɗa naa ge ne suwal mbe no go ma pal
mbo mbo da ne le kuu ya.»
15Ndi, mbi mbo tol naa ne suwal ge ne kuu ya ma ya pet.
Ka̰l ge Bage ɗiŋnedin ne,
a mbo mbo ya,
ndu ge daage mbo kat na pe na hool gan pal
ge Ursalima viya̰ wak ga̰l ma go,
a mbo ver na gulum ga̰l se,
a mbo det Yuda suwal ma pet pore mballa.
16Go no, mbi mbo pot naa ge ne ka
ne suwal mbe ma go ya̰l ge a ne ke ma pet.
Ne jo̰ a saŋge mbi bama go̰r,
a mbo tyare tuwaleya hon dok ge ɗogle ma no,
a mbo uware dok ge bama ne ke nama ne bama tok zi ma.
17Mo ɗe, vwa mo pul ne bit, ɗage digi,
mbo jan nama fare ge mbi ne é na mo wak zi ma pet.
Kaage mo ŋgwabe tene nama ndwara se to,
ne da pe, na kaage mbi sḛ mbi ŋgwabe mo nama ndwara se to.
18Ndi ma̰ no, mbi saŋge mo ya
dimma ne suwal ge ne ve ver ne gulum ga̰l go,
dimma ne uwara zok pul ge walam go,
ko dimma ne gulum ga̰l ge fool ŋgirma go,
ge naa ge ne suwal mbe go ma pet ndwara zi,
ge gan ge suwal Yuda ne ma ndwara zi,
ge naa ga̰l ge temel ma ndwara zi,
ge na naa ge ke tuwaleya ma ndwara zi,
ne ɓase ge suwal ne ma ndwara zi pet me.
19A mbo mbal mo pore,
amma a mbo hal mo to bat.
Ago mbi poseya ne mo,
ka̰l ge Bage ɗiŋnedin ne,
mbi mbo zur mo.
Currently Selected:
Irmiya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.