Naa ge kun sarya ma 1
1
KATƊA GE ISRAYELA MA NE KANAN GO NE SIYA GE JUSWA NE
(1:1—3:6)
Katɗa ge Israyela vya ma ne suwal Kanan go
1Go̰r siya ge Juswa ne go, Israyela vya ma ele Bage ɗiŋnedin go: «A pehir ge daage ne i buwal zi é pe mbo det Kanan ma ne ɗaa?» 2Bage ɗiŋnedin jan nama go: «A pehir ge Yuda ne mbo ne, mbi ɓyan suwal ya na tok go.» 3Pehir ge Yuda ne jan pehir ge Simeyon ne, na ge na ná vya go: «Mbo ya nee ɓá̰ dagre mbo det Kanan ma ndwara ame mbi swaga joo ge a ne va mbi, nee mbo ɓan dagre mbo ame mo swaga joo me.» Pehir ge Simeyon ne mbo dagre ne nama.
4Yuda ma mbo det Kanan ma ne Pereziya ma. Bage ɗiŋnedin ɓyan nama nama tok go. A hun naa dudubu wol ge suwal Bezek go. 5A ɓol gan Adoni-Bezek ge suwal Bezek go, a det na, a hál Kanan ma, ne Pereziya ma. 6Adoni-Bezek syat na pe só, nama sḛ ma yan na pe, a wan na, a kun na tok-gwaɗega̰l ma ne na koo-gwaɗega̰l ma uzi. 7Adoni-Bezek jan go: «Gan ma wara ɓyalar ge mbi ne kṵ nama tok-gwaɗega̰l ma ne nama koo-gwaɗega̰l ma, a ka toɗe mbi kaŋzam pe ge ne det ne mbi tabul pala digi se ma, Dok pó mbi kaŋ ge mbi ne ke.» A mbo ne na suwal Ursalima ya, su na go.
8Naa ge Yuda ne ma det Ursalima, a ame na, a á naa ge ne suwal diŋ ma uzi hunna kakaɗak, a til suwal mbe uzi. 9Go̰r go, a mbo det Kanan ma ge ne ka ne njal pala digi ma, ne nama ge ne suwal le mbii ma, ne nama ge ne ka ne babur pul go ma. 10A mbo det Kanan ma ge ne ka ne suwal Hebron go ma. Ago suwal Hebron dḭl zaŋgal ka Kiryat-Arba. A hál pehir ge Chechay ne, ne pehir ge Ahiman ne, ne pehir ge Talmay ne me. 11Ne swaga mbe go, a mbo det naa ge suwal Debir ma. Suwal Debir dḭl zaŋgal ka Kiryat-Sefer. 12Kaleb jan go: «Ndu ge ne mbo ya mbo det suwal Kiryat-Sefer, ame na, mbi mbo hon na mbi vya ge gwale Aksa kat yàl.» 13Otniyel ge Kaleb ná vya ge jyale Kenaz vya, ame na. Kaleb hon na nà vya Aksa kat yál. 14Swaga ge Aksa ne ya̰ ya Otniyel ta ɗe, jan Otniyel go, na jya̰ na bá, na ho̰ na gaaso pul. Aksa kan na koo ne kwara pala digi ya se, Kaleb ele na go: «Mo ɓyare da ɗaa?» 15Aksa jan na go: «Kwa mbi a̰se, ne jo̰ mo ho̰ mbi suwal ge mbii ge, ho̰ mbi baal ma me.» Kaleb hon na baal ge digi ma ne ge seɗe ge ma me. 16Keni ge Musa tisi vya ma, a ɗage ne suwal ge tumur ma ne ya dagre ne Yuda vya ma, a mbo kat ge babur ge suwal Yuda ne go, suwal Arad le ge mbii ge go.
17Pehir ge Yuda ne ma ɓanna ne bama ná vya pehir ge Simeyon ne ma, a det Kanan ma ge ne ka ne suwal Sefat go ma, a burmi nama uzi kakaɗak, a syal suwal mbe dḭl Horma. 18Yuda ma gwan ame suwal Gaza ne na suwal lew ma, ne suwal Askalon ne na suwal lew ma, ne suwal Ekron ne na suwal lew ma me. 19Bage ɗiŋnedin ka dagre ne Yuda ma, a ame suwal ge ne swaga njal go ma, amma a be day ame suwal ge ne babur pul go ma to, ago naa mbe ma ka da ne pus pore ge walam ma. 20A hon Kaleb suwal Hebron, dimma ne Musa ne jya̰ go. Kaleb ame suwal ge Anak vya ge ataa ma ne ka ne go.
21Bayami vya ma be hál Yebus ma ge a ne ka ne suwal Ursalima go ma to. A ne Yebus ma gá katɗa ne suwal Ursalima go ne ɗiŋ ma̰ no.
22Hir ge Yusuf ne mbo det suwal Betel. Bage ɗiŋnedin kat dagre ne nama. 23A teme naa mbo ndil suwal Betel. Ago suwal Betel dḭl ka zaŋgal dḛ Luz. 24Naa ge a ne teme nama kwa ndu a̰me ne watɗa ne suwal diŋ ya zum, a jan na go: «Ŋgay i viya̰ ge wat suwal diŋ, i mbo kwa mo a̰se.» 25Na sḛ ŋgay nama viya̰ ge wat suwal diŋ. A burmi naa ge ne suwal mbe go ma uzi kakaɗak, amma a ya̰ ndu mbe ma ne na vya ma mwaɗak mborra. 26Ndu mbe mbo suwal ge Hittitiya ma ne ya. Sin suwal a̰me, hon na dḭl Luz, suwal mbe dḭl go no ɗiŋ ma̰ no.
27Manasa ma be hál naa ne suwal Bet-Cheyan ma, ne Taanak ma, ne Dor ma, ne Yibleyam ma, ne Megido ma, ne nama suwal lew ma to. Kanan ma gá katɗa dagre ne nama suwal mbe ma go. 28Swaga ge Israyela ne há pool gḛ ɗe, a é Kanan ma ke temel mo̰r, amma a be day yan nama to.
29Pehir ge Efrayim ne be hál Kanan ma ge ne ka suwal Gezer go to, a ne Kanan ma gá katɗa ne suwal Gezer go ne.
30Pehir ge Zabulon ne be hál naa ge ne ka suwal Kitron ma ne Nahalol go ma to, Kanan ma gá katɗa pehir ge Zabulon ne ma buwal zi. Ɗaŋ ɗe, a é nama ke bama temel mo̰r.
31Pehir ge Aser ne be hál naa ge suwal Akko ma, ne Sidon ma, ne Alab ma, ne Akzib ma, ne Helba ma, ne Afik ma, ne Rehob ma to. 32Pehir ge Aser ne ma gá katɗa dagre ne Kanan ma, naa ge suwal pe ma. Ago a be day hál nama to.
33Pehir ge Neftali ne ma be hál naa ge suwal Bet-Chemes ma, ne Bet-Anat ma to, a gá katɗa dagre ne Kanan ma, naa ge pe suwal ma. Ɗaŋ ɗe a é naa ge Bet-Chemes ma poseya ne naa ge Bet-Anat ma ke bama temel mo̰r.
34Amoriya ma a yan pehir ge Dan mbo njal ma pala digi ya. A be ya̰ nama viya̰ ge mbo ya babur pul se to. 35Amoriya ma gá katɗa ge suwal Har-Heres, ne Ayalon, ne Chaalbim go. Amma swaga ge pehir ge Yusuf ne ne ɓó pool ɗe, a é nama ke temel mo̰r no. 36Warbe ge Amoriya ma ne ɗage da ne haal pala ge Akrabbim ne ya, ne Sela go ɗiŋ kale mbo digi ya.
Currently Selected:
Naa ge kun sarya ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.