1Tesalonika ma 1
1
Wak sanna
1Bulus, Silvanus, Timotawus, a nama njaŋge maktub hon ɓase ge Dok ne ma ge ne suwal Tesalonika go ne, na ge ne Dok ge nee Bá zi, ne Bageyal Jeso Kris zi me. Kwa a̰se ma ne katɗa ge halas ka poseya ne aŋ.
Hon fareba ge Tesalonika ma ne
2I gwan da ne gugu ɗaɗak hon Dok ne aŋ pe pet, swaga ge i ne dwat ne aŋ kaɗeya ge i ne ma zi ɗaɗak go. 3Ge Dok ge nee Bá ndwara se, i ka dwat da ne hon fareba ge aŋ ne ge ne e aŋ ke temel, ne laar wanna ge aŋ ne ge ne e aŋ ke temel, ne jobreya ge aŋ ne ge ndaar kaka nee Bageyal Jeso Kris zi. 4Ná vya ge laar wanna ma, i da ne kwarra go Dok tá aŋ tal. 5Ago swaga ge i ne waage aŋ fare ge kwaɗa go, be kat fare janna zi ɗeŋgo to, amma pool zi, ne O̰yom ge mbegeya zi, ne kwarra go na fare ge fareba ne zi me. Uwale, aŋ kwa gyana gyana ge i ne ka aŋ buwal zi ne kwaɗa ge aŋ ne pe. 6Swaga ame fare ge yál njotɗa ma gḛ zi, ne laar saal ge O̰yom ge mbegeya ne hon zi me, aŋ bole i, ne Bageyal me. 7A go no, aŋ saŋge kaŋ koo-pul ge naa ge hon fareba ge ne suwal Makedoniya ma ne Akaya go no pet. 8Ago ne aŋ ta, fare ge Bageyal ne be det suwal Makedoniya ma ne Akaya go ɗeŋgo to, amma hon fareba ge aŋ ne Dok ta na fare dasare swaga ge ne aŋ ziyar go ma ta pet, a ge be ge i gwan jan na jan to. 9Ago naa pet a wan ameya ge aŋ ne ame i pe ya go, ne saŋgeya ge aŋ ne saŋge ta ya dorgoloŋ Dok ta, aŋ ya̰ kaŋ sḭḭm ma uzi no ndwara ke Dok ge ndwara ge fareba temel mo̰r no, 10ndwara da̰re na Vya ge ne mbo ne digi zi ya, na ge ne ta̰ na ne naa ge siya ma buwal zi, ndwara go Jeso, na ge ne zu nee ne pore ge ne mbo mbo ya go.
Currently Selected:
1Tesalonika ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.