1Bitrus 1
1
Wak sanna
1A Bitrus, bage temeya ge Jeso Kris ne njaŋge maktub hon naa ge talla ge a ne ɓarse ne suwal Pontus go ma, ne suwal Galatiya go ma, ne suwal Kappadokiya go ma, ne suwal Asiya go ma, ne suwal Bitiniya go ma. 2Dok, Bá tá aŋ ne ge laar ɓyareya ge na ne ge ne pe eya ya day zi, mbege aŋ ne ne O̰yom ta, ne da pe aŋ gwa̰ ne aŋ pala Jeso Kris pe se, ndwara na ba hat aŋ harcal ne swama ge na ne ta. Kwa a̰se, ne halas ka ne aŋ zuliya ceɗed.
Uwareya hon Dok ne máya ge nee ne pe
3Uwareya hon Dok ge nee Bageyal Jeso Kris Bá, na ge kwaɗa kerra ge na ne ge ɓaŋlaŋ zi e nee tol tolla ge giya̰l ne tanna ge ne ta̰ Jeso Kris ne naa ge siya ma buwal zi digi go, na ge ne hon nee jobreya ge hatal, 4ne joo ge ne hubi to pe, ge ne hat seŋgre to pe, ge ne ɓocome to pe, na ge Dok ne koy na ne digi zi ya ne aŋ pe. 5Aŋ ge a ne koy aŋ ne pool ge Dok ne zi ma, ne hon fareba ge detɗa ya máya go ta, ge ne go jejew ge ba dyan ya zum dam pe aya go.
6Ne no pe, ke me laar saal, ko ne jo̰ ne se no aŋ gale ya kḭḭmi zi dam ma swak ne pe herra hir ge daage. 7Dinar ge ne vḛne uzi a ɗyage na ɗyage ol zi. Uwale, hon fareba ge aŋ ne a siŋli waɗe dinar, a kugi na kugi ndwara kwa siŋli ge na ne, go no aŋ ba ɓol uwareya, ne doreya, ne hormo dam dyanna ge Jeso Kris ne ya go. 8Na ge aŋ laar ne wa̰ na be ge aŋ kwa na to, na ge ne se no, aŋ gale ne kwa na ne aŋ ndwara to, aŋ ne ho̰ fareba na ta#Yoh 20:29., aŋ ke laar saal ge ɓaŋlaŋ ge be pe wanna to no. 9Laar saal mbe aŋ ke na da ne aŋ ne má pe. No a potɗa ge aŋ ne ɓo na ne hon fareba ge aŋ ne zi ne.
10Ne máya mbe no pe ɗe, anabi ma ge a ne waage bobo ge aŋ ne ɓo na mbe no fare, a hale na pe ne ɓyareya lelet. 11A ɓyare go bama kwa swaga ma ne fare ma ge O̰yom ge Kris ne ge ne ka bama zi ne ka ŋgay bama na, na ge ne ŋgay nama zḛ tek yál njotɗa ge Kris ne, hormo ge Kris mbo ɓol na#Kmb 22, Isa 53, Luk 24:25-26.. 12Ke nama na kwarra go na da ne nama pe to, amma ne aŋ pe, a ka zwagre fare ge ma̰ no naa ge oy fare ge kwaɗa ma ne waage aŋ na ne O̰yom ge mbegeya ta na ge a ne teme na ne digi zi ya. Maleka ma sḛ puy, a ɓyare go bama kwa na.
Moɗegeya ne katɗa mbegeya uzi cat pe
(1Tes 5:8-9, Tit 2:11-14)
13Ne da pe no ɗe, ka me yaŋyaŋ, wa̰ me ta kaŋ ma zi pet, ka me ne jobreya ge hatal ge bobo ge aŋ ne mbo ɓol na ya dam dyanna ge Jeso Kris ne ya go. 14Dimma ne vya ge za̰ wak ma go, bole me aŋ ene ge zaŋgal ge aŋ ne ka ke nama kwarra to zi ma to. 15Amma, dimma ne na ge ne tó aŋ ya a mbegeya go, aŋ sḛ ma, ka me mbegeya kaŋ kerra ge aŋ ne ma zi pet. 16Ago a njaŋge go: «Aŋ mbo kat mbegeya, ne da pe, mbi mbegeya#Lev 19:2..» 17Kadɗa aŋ tol Báá, na ge ne kun sarya kaŋ kerra ge ndu ge daage ne pal be vareya ɗe, ke me mborra ne vo ge dam ma ge a ne ya̰ aŋ katɗa suwar pal no zi. 18Ka me ne kwarra go a be zur aŋ ne aŋ kaŋ kerra ge sone ge aŋ ne ame na ne aŋ bá ma ta da ne kaŋ ma ge ne hubi uzi, fool kaal, ko dinar to, 19amma ne swama ge ye gḛ ge Kris ne#Kol 1:20., dimma ne tame vya ge be fatɗa, ge be saaso go. 20Dok tá na ne dunya pe dolla ndwara zḛ ya day, dya̰ na ya dam ge hṵsi ma zi no ne aŋ pe. 21Ne na ta, aŋ hon fareba Dok ta no, na ge ne ta̰ na ne naa ge siya ma buwal zi digi, ho̰ na hormo no, ne da pe hon fareba ge aŋ ne, ne jobreya ge aŋ ne ka Dok pal.
22Swaga gwan ne aŋ pala fareba pe se, aŋ há harcal no, ne da pe aŋ laar wa̰ aŋ ná vya ma be mbuɗiya. Aŋ laar wa̰ ta ne dulwak ɗu. 23Ne jo̰, aŋ tó tol giya̰l, be ne kaŋ hir ge hubiya ta to, amma ne kaŋ hir ge be hubiya, ndwara go fareba ge ndwara ge ɗiŋnedin ge Dok ne. 24Ago
«Ndu dasana ge daage a dimma ne sugur go,
hormo ge nama ne a dimma ne sugur wak ɓoyya go,
sugur looɗe, na wak ɓoyya det se#Isa 40:6-8.,
25amma fare ge Bageyal ne ya go ɗiŋnedin.»
Fare mbe a fare ge kwaɗa ge a ne waage aŋ na.
Currently Selected:
1Bitrus 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.