1Korinte ma 1
1
Wak sanna
1Bulus, na ge ne ɓo tolla go na ka bage temeya ge Jeso Kris ne ne laar ɓyareya ge Dok ne ta, poseya ne ná vya Sosten me. 2I njaŋge maktub hon ɓase ge Dok ne ma ge ne suwal korinte diŋ, ne nama ge mbegeya Kris Jeso zi ma, nama ge Dok ne tó nama go nama ka mbegeya ma, poseya ne nama ge swaga ge daage go pet a ne tol dḭl ge nee Bageyal Jeso Kris ne ma, ndwara go nama Bageyal ne ge nee ne me, 3Kwa a̰se ne katɗa halas ge Dok ge nee Bá ne, ne ge Bageyal Jeso Kris ne na ka poseya ne aŋ.
4Mbi gwan ne gugu ɗaɗak hon Dok ge mbi ne ne aŋ pe, ne ɓolla ge aŋ ne ɓo kwa a̰se ge Dok ne Kris Jeso zi pe. 5Ago na zi, aŋ ɓo kaŋ kwaɗa ge daage pe pet, fare janna zi pet, ne kwarra zi pet me, 6ne jo̰ sayda ge Kris pal wak wi aŋ pal, 7go no aŋ be woɗege ne bobo ge O̰yom ne a̰me to, swaga da̰re dyanna ge nee Bageyal Jeso Kris ne ya no go. 8A na sḛ mbo e aŋ mḛya diŋ ne mbo pe aya dab, ne da pe na kaage a wa̰ aŋ ne fare a̰me ge sone dam gwanna ge nee Bageyal Jeso Kris ne ya go to. 9Dok, na ge tó aŋ ya go aŋ ká ba̰a̰n ne na vya Jeso Kris nee Bageyal, na sḛ a Dok ge ne mbya ndu hon fareba na ta ne.
Varseya naa ge hon fareba ma buwal ma zi
10Ná vya ma, mbi moɗege aŋ dḭl ge nee Bageyal Jeso Kris ne zi: Ka me ne fare janna ge ɗu, varseya a̰me na ka aŋ buwal zi to bat, amma ka me ne dwatɗa ge ɗu, ne haŋgal ge ɗu me.
11Ná vya ma, Klowe naa ma waage mbi go gaage ya aŋ buwal zi. 12Mbi zá̰ go, ne aŋ buwal zi, ndu ge daage jan go: «Mbi ge Bulus ne ne! Mbi ge Apollos ne ne! Mbi ge Kefas ne ne! Mbi ge Kris ne ne!» 13Kris varse varse ɗaa? A pé Bulus kaŋgre pal ne aŋ pe ɗaa? Ko a ke aŋ baptisma dḭl ge Bulus ne zi ɗaa? 14Mbi gwan ne gugu hon Dok ne mbi ke ndu a̰me baptisma ne aŋ buwal zi to pe, mbi ke Krisbus ma ne Gayus ɗeŋgo. 15Ne pe no ɗe, ndu a̰me ne pool ge jan go a ke aŋ baptisma dḭl ge mbi ne zi to. 16Uwale, mbi ke naa ge ne Estefanas diŋ ma baptisma me. Ne naa ge ne gá ma, mbi kwa go mbi be gwan ke ndu ge ɗogle baptisma to. 17Ago Kris be teme mbi mbo ke naa baptisma to, amma ne waage fare ge kwaɗa pe, a be ne zwama ge naa dasana ma ne fare janna ta to, ne da pe na kaage pool ge kaŋgre ge Kris ne na saŋge kaŋ baŋ to.
Zwama ge dunya ne, ne zwama ge Dok ne
(1Kor 3:18-20, Mat 11:25-27)
18Fare ge kaŋgre ne, a fare ge daal ne nama ge ne mbo banna zi ma pe, amma ne nama ge ne máya zi ma pe, a pool ge Dok ne ne. 19Ago a njaŋge go:
«Mbi mbo burmi zwama ge naa ge zwama ma ne uzi,
mbi mbo ban kwarra ge naa ge kwarra ma ne uzi#Isa 29:14..»
20Ndu ge zwama ya da ɗaa? Ndu ge ne hate naa eya ma ya da ɗaa? Ndu ge ɗaŋgre fare ge doŋ pe mbe no zi ya da ɗaa? Dok te be saŋge zwama ge dunya ne dale to’a?
21Ago, ne jo̰ dunya, ne zwama ge na ne ta be day ge kwa Dok ge zwama ge Dok ne zi to, a go no Dok vḭ tene no go na má naa ge hon fareba ne daal ge fare oyya ne ta. 22Ago Yuda ma ɓyare kaŋ ŋgayya ma, Grek ma ɓyare zwama me. 23Amma nee waage Kris na ge ne pé pel kaŋgre pal, kaŋ syal koo ne Yuda ma pe, kaŋ daal ne pehir ge ɗogle ma ta me. 24Amma ne nama ge a ne tó nama ma pe, Yuda ma ne Grek ma, Kris pool ge Dok ne ne, a zwama ge Dok ne ne me. 25Ago daal ge Dok ne waɗe zwama ge naa dasana ma ne waɗe, taŋgay ge Dok ne waɗe pool ge naa dasana ma ne waɗe me.
26Ná vya ma, ndi me gale, aŋ ne ɓo tolla ge Dok ne ma, aŋ buwal zi naa ge zwama le duur go ma gḛ to, naa ge pool ma gḛ to, naa ge pe pool ma gḛ to me, 27Amma kaŋ ge daal ge ne dunya zi, Dok tá na ndwara kan saaso naa ge zwama ma pal, kaŋ ge taŋgay ge ne dunya zi, Dok tá na ndwara kan saaso naa ge pool ma pal, 28kaŋ ge pala kwaya̰l go to ge ne dunya zi, ne kaŋ ge ne mbya senna, kaŋ ge be a̰me pe to, Dok tá na ndwara saŋge kaŋ ge ne go, a̰me pe to, 29ne da pe na kaage kaŋ dolla a̰me uware tene Dok ndwara se to. 30Amma ne na ta aŋ ɓo viya̰ ɓanna ne Kris Jeso no, na ge ne saŋge ne nee pe zwama ge ne mbo ne Dok ta ya. Ne na ta Dok há nee dosol no, mbege nee no, zu nee no me. 31Ne da pe, dimma ne a ne njaŋge go: «Ndu ge ne uware tene, na uware tene Bageyal zi#Irm 9:23..»
Currently Selected:
1Korinte ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.