Filippimiunut 1
1
Paulusib Rômame parngnanairsortaujub ᴋujalininganik tuksiarutjininganiglo. Ilinganinganik ᴋanoᴋ maksuaninganiglo. Kaiblaininganik, Filippimiuttauᴋ taimailerᴋovlugit.
1Pauluse Timôteuselo, Jêsusib Kristusib kivgâgik, ivjornaitunut tamainut Kristuse Jêsuseme Filippimêtunut, ajoᴋertuinerôjunullo (illagêllo) kivganginut.
2Gûdib Atâtapta, Nâlekablo Jêsusib Kristusib saimarsautingata ullapirsautingatalo illagilisetôᴋ!
3Gûde ᴋujagivara ilûnâne erᴋaumajarangapse,
4(Taimak pitsainartunga tuksiarnimne ilûnase pivluse, tuksiarnerlo ᴋuviasuklunga pivara)
5Oᴋautsinut tussarnertunut illagêguteᴋarnise pivlugo, uvlormit sivorlerpâmit mâna tikidlugo.
6Tamattomingalo sungertûteᴋarvikpunga, ajungituliamik pigialauᴋtub ilupsingne, tâpsoma nâmaksitiniarivâ Jêsusib Kristusib uvluksangata naliuniksanga tikidlugo.
7Taimâk idluarmat, tamattominga issumaᴋariaᴋarpunga ilûnase pivluse, ômatimninapse ovane parngnanairsorsimanimne, akiornimnelo oᴋautsit tussarnertut kigligiutigilugit aulajungnangertinapkit, ilipse ilûnase saimarsauteᴋaᴋatigigapse.
8Gûdib ila ᴋaujimavânga, ᴋanoᴋ ômamut angijomik ungagigapse tamapse, Jêsusib Kristusib nagligasungnersoangane.
9Tamannalo tuksiarutigivara, naglingnise pigannerpaliavlunelo aglivaliarᴋovlugo sunatuinarnik illisimanermiglo tukkisinermiglo:
10Kiglisiniarungnarᴋovluse suna ajunginerpaungmangât; nelâgôrᴋovluse, sinaungaᴋonaselo Kristusib uvluksangata naliuniksanga tikidlugo.
11Idluarnerub perortitanginik ilumertauluse, Jêsuse Kristusikut (ilupsingne) pijunik, Gûde nertortauᴋovlugo nakoridlartauᴋovlugolo.
12Nalojungnaitipapsele ᴋatangutikka naglingnartose, ilingatitaunera tamanna sunaubva oᴋautsit tussarnertut aglivaliajutigivât.
13Imâk: ataniviksûb iglunganêtunut tamainut ᴋaujijaulerpoᴋ, ᴋelarutikka Kristuse pivlugo pingmatta;
14Katangutillo Nâlekame unuktut ᴋelarutimnut tatiksarsivut, sivôranatik oᴋauseᴋ oᴋautigivlugo ilerasugatik.
15Illangitale Kristuse oᴋâlatigivât ômisungnermut ᴋaningaumajarnermullo; illangitale issumaᴋaloringnermut.
16Ipkoa Kristuse oᴋâlautigivât ᴋaningaumajârnermut nalagôrlugatiglo, ᴋelarutikka kappianartomik illajomavlugit issumaᴋaramik.
17Ukkuale naglingnermut pivut, ᴋaujimagamik, oᴋautsit tussarnertut akiorutigivlugit ovanêtitaugama.
18Kanorle tagvâ? Kristuse sunamullônêt oᴋautigijautuinarpat, ilungertunginermullônêt, ilungertornermullônêt, tamanna ᴋuviasûtigivara, ᴋuviasûtigijomavaralotauᴋ.
19Nalunginama, tamanna piulijaujutiginiarapko tuksiarnipsingnut, Jêsusiblo Kristusib Anerningata ikajorninganut.
20Taimâk utakᴋivlunga ᴋilanâdlarlungalo neriukama, kangusuktitaunianginama sunalônêt pivlugo; (nerriukpungale) ilerasuktinanga, ilusiptut tamât mânatauᴋ aglât Kristuse angijomik timipkut nertortauniarmat, inôgumalônêt toᴋogumalômêt.
21Kristuse inôgutigigapko, toᴋonerlo piksaᴋautigivara.
22Uviningmele inôniarnera atornarnersaukpat: naliak tagva pijomanersarivlugo, uvanga nalovunga.
23Tamarmik ilungertûtigigapkik: kajungilârpunga avilunga tamângat, Kristuselo najoromavlugo; tamanna ila angijomik ajunginersaungmat;
24Uviningmêtuarnerale pijariaᴋarnersauvoᴋ ilipse pivluse.
25Tamattomingalo ᴋaujimavlunga nakimarningilanga, ilipsingnêniarama ilûnapsingne, pivaliatitaujutiksapsingnut, ᴋuviasûtiksapsingnullo okpernipsingne.
26Nertôtiksarsiluarᴋovluse Kristuse Jêsuseme uvanga pivlunga, uterniarnimnut ilipsingnut.
27Arvertaritsele Kristusib oᴋausingit tussarnertut malitsiarlugit; tikigumalônêt takoluse, apsimalungalônêt tussarᴋovlunga, sôngolernipsingnik atautseme anernerme, atautsemik tarneᴋarluse sorsugiaᴋatigilutalo okperneᴋ oᴋautsinut tussarnertutnut pivlugo.
28Koaᴋsângatailititselo akkerartortunut sunalônêt pivlugo; tamanna nalunaikutauvoᴋ pidlartaujomârmatta taipkoa, ilipsele piulijaujomârapse, tamadalo Gûdemit pivoᴋ.
29Kristuse pivlugo tunitjiviogapse, okpervigilugo kissianeungitoᴋ, kappiasuktitaujutigilugoletauᴋ.
30Uvaptut siorniorapse, sorlo tautulaurapsinga, sorlolo mâna tussaumagapsinga.
Currently Selected:
Filippimiunut 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.