I Atannit 2
2
Davidib pijomajangita kingorlingat, toᴋungalo. Salomonib mallingninga tapsominga, idluarsainingalo nertornartok.
1Mânna nelliutok Davidib toᴋoviksanga kaglilermat; ernine Salomo perᴋova, oᴋarlunelo:
2Uvanga sillaksoarmiut ilûnnamasiatik apᴋotingat aiviginiarpara; tagva maksoalerit, angutaulutillo.
3Kamagikillo kamagijaksat Nâlegak Gûdit pivlugo, agvertarᴋovlutit tapsoma apᴋosiningine, kamatsiarᴋovlutillo illusioᴋojanginik, perᴋojanginiglo, idluarijanginiglo, kigligiudsininginiglo, sorlo aglaksimangmat Mosesib perᴋojangine, sillatôᴋovlutit piniarnerne ilûnnaine, namullo sangulervigijarne;
4Nâlegak oᴋautsiminik oᴋauserilauktaminik pivlunga nellautsititsiᴋovlugo, oᴋarame: ᴋitorngavit apᴋoserijatik udsertoromârpagit, sâmne nertornarlutik, omamullo tamânut, tarnemullo tamânut agvertarᴋovlugit; tagva angumik illingnit pijomik Israelib iksivautanganetomik ajoksartoᴋarniatsengimarikpok.
5ᴋaujimatsiarpotittauk sumik Joab Zerujab erningata pinniarvigilaungmanga, sunamik pinniarlauktanganik Israelib sorsuktuksaksoaᴋatigêᴋotingita angajoᴋagingnut, Abneremut Nerib erninganut, Amasamullo Jetherib erninganut, toᴋolauktamingnut, kovisilunelo unatadlarnerub aunganik, ullapirsauteᴋartillugo, unatadlarnerublo aunganik pititsivok tapseruteᴋotiminut, makkitimigut attorlauktaminut, itiggagutiminullo ittikaminelauktunut.
6Pinnialerit sillatonît malliklugo, nujangillo ᴋêrtojut ullapirsauteᴋarlutik unungaᴋoniarnagit toᴋungajut inninganut.
7Barsilaible Gileademiub ᴋitorngangit napᴋoarnermik pinniarvigijaksarvatit nerrimârᴋatauᴋovlugit nerrimarvingne. Taimailiorvigilaungmanga angajoat Absalome ᴋemâlaurapᴋo.
8Ahâglo najortigivat Simei, Gerab erninga, Jeminib erningata Bahurimemiok, oᴋarnerlotjilauktok uvamnik mamaitoâlungmik, nelliutome taipsomane aivigijamne Mahanaimemut. Taipsomale atersarlune pachrearlaukpânga Jordanemut. Tagva angermarilaukpara Nâlekame oᴋarlunga: Toᴋotsomangilagit saviksoarmut.
9MânNâle pasijaksaungitoᴋoniarnago, angutaugavit sillatôjok, ᴋaujimatsiarniarpotillo sunamik pinniarvigijaksarimangangne, nujangit kêrtojut aungmut unnungartilugit toᴋungajut inninganut piᴋovlutit.
10Taimâk Davide sinnisilerpok, ailune atâtagijaminut, illijartortaulunelo Davidib iglugasaksoaᴋotingine.
11Nelliutorle Davidib atanniovia Israelitinut Jâreôvut 40 git. Jârit 7 it nâlugit atanniolaukpok Hebroneme, Jârit 33 nâlugit Jerusaleme.
12Salomolo iksivavok atâtame Davidib iksivautakotingane, atannioningalo soᴋosijuilaukpok.
13Adoniale Hagithib erninga ᴋailaukpok kamunga Bathsebamut Salomob anânanganut. Tamnalo oᴋarpok: Ullapirsauteᴋarlutit tikkigalloarivît? Tamna oᴋarpok: Âhaila.
14Oᴋarlunelo: Oᴋausiksaᴋarpunga illingnut. Arnak oᴋarpok: Oᴋarit.
15Tamna oᴋarpok: Nellungilatit atanniovik nangminerilaurapᴋo, Israelitillo illuêngarlutik torarvigilaukpânga, uvanga ataniojuksaugama; mânNâle ataniovik sangutitaumavok, nukamnullo illingatitaumavok, Nâlekamit pigimava.
16Mânna tuksiarnek atausek ᴋenuarivara illingnit, kippilungniarnanga. Tamna arnak oᴋarpok: Oᴋalerit.
17Tamna oᴋarpok: Atannek Salomo oᴋarᴋatigilauruk, kippilungniangimatit, tunnijiᴋovlugo uvamnut Abisagemik Sunemiomik, nulliangoᴋovlugo uvamnut.
18Bathseba oᴋarpok: Taimaile, pivlutit atannek oᴋarᴋatigijomavara.
19Bathsebalo itterlune tikkipok ᴋammunga atannermut Salomomut, oᴋarᴋatigijomavlugo Adonia pivlugo. Atannerlo nikkovilerpok pachreartorpâlo, opigilugolo, ingilunelo iksivautaminut. Iksivautarlo ᴋaitaulaukpok atanniub anânanganut, ingilerᴋovlugo tapsoma tallerpianut.
20Tamnalo arnak oᴋarpok: Tuksiarârsungmik ᴋenuvunga illingnit, kippilungniangilarma. Atanniub oᴋautiva: Tuksiarit anânak, kippilungniangilagit.
21Tamna arnak oᴋarpok: Abisag Sunemiovinek tunnijaule angajungnut Adoniamut, nulliangoᴋovlugo tapsomunga.
22Tagva atannek Salomo kiovok, oᴋarlunelo anânaminut: Sôg Abisag Sunemiovinek ᴋenuariviuk Adoniamut? Atanioviktauk ᴋenuarigiuk tapsomunga, angajuklerpaungmat ᴋatangutimnit, illigijaulunelo Abjatharemut ajuᴋertuijomut, Joabemullo Zerujab erninganut.
23Atannerlo Salomo angermarikpok Nâlekame, oᴋarlunelo: Gûdib mattominga ipsomingalo pinniarvigilinga, Adonia oᴋalaungipat tamattominga akkerartorlune inôserminut.
24Mânnalo, sorlo Nâlegak mikseᴋârtomik inôngmat nakkitertok uvamnik, iksivakojijorlo uvamnik atâtama Davidib iksivautangane, iglomiglo sanalauktok uvamnut, sorlo oᴋalaungmat; Adonia uvlome toᴋotaujuksauvok.
25Atannerlo Salomo tilliklerpok taipsomunga Benajamik Jojadab erninganik; tapsoma ullimârpa toᴋodlugo.
26Ajuᴋertuijomullo Abjatharemut atannek oᴋarpok: Ailerit Anatotemut perorsêvikotingnut, toᴋotaksaugavit. Uvlomele toᴋotsomangilagit, Nâlekab iklervinga akjarlaurangne atâtama Davidib sivorngane, siorniorᴋataulauravillo atâtaga siorniudlartillugo.
27Taimâk Salomob ajuᴋertuijok Abjathar ajuktorpa, ajuᴋertuijokonnago Nâlekamut, nellautsiᴋovlugit Nâlekab oᴋausingit, oᴋauserilauktangit Elib iglomiokotingit pivlugit Silome.
28Tusaumajarlo tamânna pivok Joabemut; Joabib Adonia ungagilaungmago, Absalomeleungitok. Tagva Joabe ᴋemâvok Nâlekab tuppinganut, tigumiarpâglo Altarib nakjugik.
29Atannerlo Salomo oᴋautsaulerpok Joabe ᴋemâsimangmat Nâlekab tuppinganut; ahâglo nangerpok Altareme. Tagva Salomob Benaja Jojadab erninga tilliva, oᴋarlunelo: Ailerit ullimârlugolo.
30Benajalo Nâlekab tuppinganut pigame, oᴋautiva: Imâk atannek oᴋarpok: annit. Tamna oᴋarpok: Mâne toᴋojomavunga. Benajablo tamânna oᴋautigiva atannermut, oᴋarlunelo: Taimâk oᴋalaukpok, taimaglo kiolaukpânga.
31Atanniub oᴋautiva: Pinniarit oᴋauserilauktangatut, ullimârlugolo, illijartorlugolo; aungmik, Joabib sullinane kovilauktanganik pêjaiᴋovlutit uvamnit, atâtamalo iglomioᴋotinginit.
32Nâlekablo akkiniarutigiliuk aunganik niaᴋoanut, angutik toᴋolaungmagik, idluarkijagik, namakijagiglo, inuarlaukpâglo saviksoarmut, atâtaga Davide nellotillugo tamattominga, Abner, Nerib erninga, Israelitit sorsuktuksaksoaᴋatigêngita angajoᴋangat, Amasalo Jetherib erninga, Judakut sorsuktuksaksoaᴋatigêngita angajoᴋangat.
33Tapᴋoa augik akkiniarutigijauᴋovlugik Joabib niaᴋoanut, kinguvângitalo soraijuitomik; Davidele kinguvângillo, iglungalo, iksivautangalo, ullapirsauteᴋarᴋovlugit soraijuitomik Nâlekab sângane.
34Benajalo Jojadab erninga majorarpok, ullimârpâlo toᴋolâlo. Illijartortauvorlo iglomine sunaᴋajuitome.
35Atanniublo Benaja Jojadab erninga angajoᴋangortipa sorsuktuksanut, taipsoma inninganut; Zadokelo ajuᴋertuijok, atanniub pitipa Abjatharib inigilauktanganut.
36Atannerlo tilliklerpok, Simeilo ᴋaikᴋojauᴋova, oᴋautivâlo: Igloliorit igluksarnik Jerusaleme, nunaᴋarlutillo tagvane, anniniarnaglo tagvangat, ikkungalonêt taikungalonêt.
37Uvlut nelliane anniviginiartarne kôb Kidronib akkianut, tagva ᴋaujimalerit toᴋotaujuksaugavit; aut niaᴋungnut pile.
38Simei oᴋarpok atannermut: Oᴋarnît idluarpok; sorlo Nâlegara atannek oᴋalaungmat, kivgait taimailiorniarpok. Taimâk Simei nunakalaukpok Jerusaleme akkunît.
39Pijoᴋarlaukporle jârit pingasut kingorngane Simeib kivgagik ᴋemângmannik Achisemut Maechab erninganut Gathemiut atanninganut. Simeilo oᴋautsaulerpok: Ahâk, kivgakotitik Gathemêpuk.
40Tagva Simei parngnailerpok, siuteᴋoktôjoᴋotinelo iksivaviktariva aularlunelo Gathemut Achisemut, kivgane ᴋeneromavlugik. Tagvungalo tikkiname kivgane âpâk Gathemit.
41Salomolo oᴋautsauvok Simei aularlaungmat Jerusalemit Gathemut, uttersimangmallo.
42Tagva atannek tilliklerpok, ᴋaikᴋojauᴋolâlo, oᴋautilugolo: Angermarilaungilagit Nâlekame, kigligiudsivigilutillo, oᴋautilutillo, uvlut nelliane aularajarvingne ikkunga, taikungalonêt ᴋaujijuksaugavit toᴋotaksaunernik? Igvillo oᴋautilaukparma: Oᴋautsitit tusartakka idluartôvut.
43Sôgle Nâlekab angermaringninga, perᴋojarlo tunnilauktara illingnut, mallilaungipigik?
44Atannerlo oᴋarpok Simeimut: Nellungilet kassênek tamât, omativit ᴋaujimajanga, pinniarlauktat atâtamnut Davidemut; Nâlekab kassênît akkiniarutigimava niaᴋungnut.
45Atannerlo Salomo pitsartutitaumavok, Davidiblo iksivautanga soᴋosijuijomârpok Nâlekab sângane sorairane.
46Atanniublo Benaja Jojadab erninga perᴋova, tamna annivok ullimârpâlo toᴋolugo. Atannioviglo aulajuititaulaukpok Salomob agganginut.
Currently Selected:
I Atannit 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.