2 Thessalonıca 1
1
1Goxı̨ Paul, Sılas eyıts'ǫ Tımothy, kǫ̀ta Thessalonıca ekǫ Nǫ̀htsı̨ wecheekeè Nǫ̀htsı̨-Gotà eyıts'ǫ Zezì-Krı xè agı̨ı̨t'ee sìı dıı nı̨htł'è gıts'ǫ̀ ts'ı̨ı̨tł'è hǫt'e.
2Nǫ̀htsı̨-Gotà eyıts'ǫ gots'ǫ̀ K'àowo Zezì-Krı naxıts'ǫ̀ sǫgı̨ı̨wǫ welè eyıts'ǫ naxıxè sìghà hòɂǫǫ̀ agııle.
Thessalonıca got'ı̨į̀ gha yats'ehtı
3Sèot'ı̨ı̨, denahk'e hòtł'ò naxıgha ehkw'ı-ahodıì aahde xè naxıdzeè t'à deɂǫ̀ǫ̀ ełeghǫnıahtǫ t'à t'aats'ǫǫ̀ naxıgha Nǫ̀htsı̨ masì wets'ı̨ı̨hwhǫ ha hǫt'e. 4Eyıì-le kǫ̀ta Nǫ̀htsı̨ wecheekeè, dànì danaxegį̀ı̨hɂa eyıts'ǫ naxıxè hoìla kò ı̨łaà naxıgha ehkw'ı-ahodı k'ę̀ę̀ aahdaa sìı ghǫ xàdahots'edì.
5Eyı hazǫǫ̀ weghàà Nǫ̀htsı̨ ehkw'ı naxısınìyaehtıı sìı wek'èts'eezǫ hǫt'e. Nǫ̀htsı̨ Wenàowoò k'ę̀ę̀ hòɂǫǫ sìı gha daahɂaà anaxììdlà t'à ekǫ goyaahde ha edegha deahnǫ k'ę̀ę̀ naxııtà. 6Nǫ̀htsı̨ sìı ehkw'ı dǫ sınìyaehtı hǫt'e. Dǫ naxıgha hoìla hogehtsı̨ı̨ sìı ek'èt'à gots'ǫ̀ hoìla hohtsı̨ ha hǫt'e, 7eyıts'ǫ naxıgha hoìlaa sìı naxıxè ts'èwhı̨į̀ hòɂǫǫ̀ ayele ha, goxı̨ sı goxè hagole ha. Gots'ǫ̀ K'àowo Zezì yak'e gots'ǫ wègoèht'į̀ nı̨dè goxè hagode ha. Ekò nı̨dè kǫ̀woò nàtsoo xè yak'eet'ı̨į̀ nàgetsoo wemǫǫ̀ gìgoèht'į̀ ha. 8Ekò nı̨dè dǫ Nǫ̀htsı̨ k'ègeezǫ-le xè gots'ǫ̀ K'àowo Zezì wegodıì nezı̨ı̨ k'èagı̨ı̨t'e-le sìı dagı̨ı̨ɂaà agole ha. 9Eyıt'à welǫ whìle ts'ǫ̀ dagı̨ı̨ɂa xè gıdıhołè ha, eyıts'ǫ gots'ǫ̀ K'àowo ts'ǫ̀ nıwà geèhkw'eè agedle ha. Nǫ̀htsı̨ enıìyah t'à nàtso xè t'asìı wegha dìì-le wehòhɂǫǫ sìı hogeɂį̀ hǫı̨lı̨ ha nıìle. 10Zezì jǫ nǫ̀ǫtłaa dzęę̀ k'e nı̨dè wets'ǫ dǫ degaı gıghàsǫedı ha, eyıts'ǫ dǫ gıgha ehkw'ı-ahodıı sìı gıxè enıìyah deè ha hǫt'e. Godı nezı̨ı̨ naxıts'ǫ̀ nèts'ı̨ı̨ɂǫǫ sìı naxıgha ehkw'ı-ahodı t'à naxı̨ sı naxıxè agode ha hǫt'e.
11Eyı weghǫ nànıts'edè xè t'aats'ǫǫ̀ naxıgha Nǫ̀htsı̨ ts'ǫ̀ yats'ehtı hǫt'e. Nǫ̀htsı̨ edets'ǫ̀ naxıkayaı̨htı gha dǫ nezı̨ı̨ aahłı̨ k'ę̀ę̀ naxııtà welì, eyıts'ǫ t'asìı wegha dìì-le t'à t'asìı wegha weghàlaahda ha dahwhǫǫ sìı hazǫǫ̀ naxıgha deghàà ayııle, eyıts'ǫ naxıgha ehkw'ı-ahodı k'ę̀ę̀ nezı̨į̀ eghàlaahdaa sìı hazǫǫ̀ naxıgha deghàà ayııle. 12Hanì naxıgha yats'ehtı, hanì-ı̨dè gots'ǫ̀ K'àowo Zezì-Krı weghàsǫhoedıì aahłe ha, eyıts'ǫ naxı̨ sı wexè naxıghàsǫhodı ha. Nǫ̀htsı̨ eyıts'ǫ gots'ǫ̀ K'àowo Zezì-Krı naxıts'ǫ̀ sǫgı̨ı̨wǫ t'à naxıxè hagode gha yats'ehtı hǫt'e.
Currently Selected:
2 Thessalonıca 1: DNT08
Highlight
Share
Copy
Want to have your highlights saved across all your devices? Sign up or sign in
Tlicho Genesis and New Testament © Canadian Bible Society 2003, 2008.