2 Ar-ari 1
1
Da Elias ken Ari Ahazias
1Kalpasan ti ipapatay ni Ahab nga ari ti Israel, immalsa ti pagilian ti Moab a maibusor iti Israel.
2Natnag ni Ahazias nga ari ti Israel manipud iti balkon ti akingngato a kuarto ti palasiona idiay Samaria. Gapu ta nakaro dagiti sugatna, nangibaon kadagiti mapan makiuman ken ni Baalzebub a dios ti Ekron a siudad dagiti Filisteo, tapno ammoenda no maimbagan pay wenno saan. 3Ngem binilin ti maysa nga anghel ni Yahweh ni profeta Elias a taga-Tisbe a sabtenna dagiti imbaon ni Ari Ahazias ket saludsodenna, “Apay a mapankayo makiuman ken ni Baalzebub a dios ti Ekron? Gapu kadi ta ipagarupyo nga awan ti Dios iti Israel? 4Ibagayo iti ari a kastoy ti sao ni Yahweh, ‘Saanka a maimbagan kadagiti sugatmo, ipataymonto la ketdi dagita!’”
Tinungpal ni Elias ti imbilin ti Apo. 5Idi nagsubli dagiti naibaon, sinaludsod ti ari, “Apay a nagsublikayo?”
6Insungbatda, “Nasabatmi ti maysa a lalaki a nangibaga nga agsublikami ket sawenmi kenka ti sao ti Apo, ‘Apay a mangibaonka kadagiti mapan makiuman ken ni Baalzebub a dios ti Ekron? Gapu kadi ta ipagarupmo nga awan Dios ti Israel? Saanka a maimbagan iti sugatmo; awan duadua a matayka!’”
7“Ania ti langa ti lalaki?” sinaludsod ti ari.
8“Dutdotan#Mat. 3:4; Mar. 1:6. ti pagan-anayna ken#8 Dutdotan…ken; wenno Dutdotan a tao ken. nagbarikes iti lalat,” insungbatda.
“Isu ni Elias!” impukkaw ti ari.
9Nangibaon iti maysa a kapitan ken 50 a soldado a mangala ken ni Elias. Nasarakanda ni Elias nga agtugtugaw iti tapaw ti maysa a turod. Kinuna ti kapitan kenkuana, “Tao ti Dios, paayabannaka ti ari.”
10“No#Luc. 9:54. taonak ti Dios,” kinuna ni Elias, “agtudo koma iti apuy ket puorannaka agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.
11Nangibaon manen ti ari iti maysa a kapitan ken 50 a soldado; napan#11 napan, kuna ti maysa a kadaanan a patarus; insungbatna, kuna ti Hebreo. ken ni Elias ket kinunana kenkuana, “Tao ti Dios, imbilin ti ari nga umayka a dagus.”
12“No taonak ti Dios,” kinuna ni Elias, “agtudo koma iti apuy ket puorannakayo agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.
13Nangibaon manen ti ari iti maysa a kapitan ken 50 a soldado. Simmang-at iti turod, sa nagparintumeng iti sangoanan ni Elias ket impakpakaasina, “Tao ti Dios, kaasiannak agraman dagiti tattaok. Dinakam papatayen! 14Natay ti dua a kapitan ken dagiti soldadoda iti apuy a naggapu iti langit; ngem pangngaasim ta kaasiannakami!”
15Kinuna ti anghel ni Yahweh ken ni Elias, “Kumuyogka kenkuana a bumaba ket dika agbuteng.” Kimmuyog ni Elias iti kapitan a napan iti ari. 16Kinuna ni Elias iti ari, “Kastoy ti sao ti Apo: ‘Gapu ta nangibaonka kadagiti mapan makiuman ken ni Baalzebub a dios ti Ekron—a kasla ti Dios iti Israel a pakiumanam, saanka a maimbagan. Dikanto makabangon iti iddam ket ditanton ti pakatayam!’”
17Natay ni Ahazias kas kinuna ni Yahweh ken ni Elias. Gapu ta awan lalaki nga anak ni Ahazias, ni Joram a kabsatna#17 ni Joram a kabsatna, kuna ti sumagmamano a kadaanan a patarus. Awan daytoy iti Hebreo. ti simmukat kenkuana nga ari. Nagturay iti maikadua a tawen a panagturay ni Jehoram nga anak ni Jehosafat nga ari ti Juda.
18Nailanad iti Pakasaritaan dagiti Ari ti Israel ti dadduma a pasamak iti panagturay ni Ari Ahazias.
Currently Selected:
2 Ar-ari 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society