JUDAS 1
1
1Judas naa na', la cui' tya'a Jacobo; cña laca na' cuentya ji'i̱ Jesucristo. Nscua na' quityi re cha' tsaa ca slo lcaa cu'ma̱ nu ndaquiya' ma̱ ji'i̱ ycui' Ndyosi Sti na, cha' cua ngusubi Ni ji'i̱ ma̱. Ycui' Ndyosi laca nu ngua'ni lubii ji'i̱ cresiya ji'i̱ ma̱, lo'o ña'a̱ ti tya cña'a̱si̱i̱ Ni ji'i̱ ma̱ juani xqui'ya Jesucristo. 2Tya'na tsa ti' ycui' Ndyosi ña'a̱ Ni ji'i̱ ma̱, bi' cha' ti̱ ti taca tyi'i̱ tyiquee ma̱, xqui'ya cha' cua jlo ti' ma̱ cha' ntsu'u tsa tyiquee Ni ña'a̱ Ni ji'i̱ ma̱. Jua'a̱ nti' na' cha' caca ji'i̱ ma̱ lcaa tsa̱.
Ntsu'u xi ñati̱ nu nclyu'u cha' cuiñi ji'i̱ ngu'
3Cu'ma̱ ngu' tya'a tso'o na nu tyaca'a tsa ma̱ 'na, nti' tsa na' scua na' quityi cha' tsaa ca slo ma̱, sca quityi nu chcui' ji'i̱ cha' tlyu nu ngua'ni Jesús cha' taca clyaá na ji'i̱ nu cuxi; pana ná ngua scua na' ji'i̱ yala ti. Lo'o nu juani nga'a̱ cha' scua na' quityi re cha' tsaa ca slo ma̱, cha' ta na' sca cui̱i̱ lo'o ma̱; nga'a̱ cha' cua'a ma̱ ji'i̱ cua ña'a̱ ca ngu' cuiñi, xqui'ya cha' ná jlya ti' ngu' ji'i̱ cha' liñi nu cua nda ycui' Ndyosi nu Xu'na na lo'o na, lcaa na nu ntsu'u cha' ji'na lo'o Jesucristo. Ná cua'a̱ jyaca̱ ma̱ tsiya' ti ji'i̱ cha' nu nchcui' ngu' cuiñi bi'. 4Ndu'ni cha' ca cuayá' ti' ma̱ cha' cua ndyatí̱ xi ñati̱ cuiñi bi' laja cu'ma̱, masi ná stu'ba cha' nu jlya ti' ma̱ lo'o ngu'. Cua sa'ni tsa nscua cha' lo quityi ji'i̱ ycui' Ndyosi cha' xcube' Ni ji'i̱ nu ngu' cuxi bi'; pana ná ndaquiya' ngu' bi' ji'i̱ cha' nu nchcui' ycui' Ndyosi tsiya' ti, ni ná ndube ti' ngu' bi' si ntsu'u tsa tyiquee Ni ña'a̱ Ni ji'i̱ ñati̱ chalyuu. Nacui̱ ngu' bi', cha' ná ndu'ni cha' masi cua'ni ngu' cha' suba', masi cua'ni ngu' lcaa lo cha' cuxi, cha' si ntsu'u tsa tyiquee Ni ña'a̱ Ni ji'na, ná xcube' Ni ji'na li', nti' ngu'. Cuiñi tsa ngu' bi', si'i ycui' Jesucristo laca xu'na ngu' bi'. Pana nu na ni, sca ti ycui' Jesucristo laca nu Xu'na na, sca ti ycui' Ni laca nu chañi cha' laca Ni loo ji'na.
5Cua jlo ti' ma̱ lcaa cha' nu nscua lo quityi ji'i̱ ycui' Ndyosi nu ngua sa'ni la, pana xa' cacha' na' xi cha' bi' ji'i̱ ma̱ juani: Ngua'ni lyaá ycui' nu Xu'na na ji'i̱ jyo'o cusu' ji'i̱ ngu' Israel, nu lo'o nguti'i̱ ngu' preso ca loyuu su cuentya Egipto; pana ca tiya' la ndyujuii ycui' Ni ji'i̱ lcaa jyo'o cusu' nu ná ndaquiya' ji'i̱ cha' nu cua nchcui' Ni lo'o ngu' bi'. 6Lo'o jua'a̱ tyi'u ti' ma̱ ji'i̱ xca̱ ji'i̱ ycui' Ndyosi nu ná ntaja'a̱ taquiya' ji'i̱ cña nu nda Ni ji'i̱ ngu' nu ngua sa'ni, bi' cha' nguxtyanu xca̱ bi' tyi ngu' ca slo ycui' Ndyosi. Pana juani cua ndu̱ xca̱ cuxi bi' ndyaaca̱' lo'o carena; ca su talya ña'a̱ tsiya' ti ndu̱ xca̱ cuxi bi', cha' preso ji'i̱ ycui' Ndyosi laca ngu' juani. Jua'a̱ ntsu'u cha' jatya xca̱ bi' ni jacua' tyalaa tsa̱ nu cua'ni cuayá' ycui' Ni ji'i̱ lcaa ñati̱. 7Lo'o jua'a̱ tyi'u ti' ma̱ ji'i̱ quichi̱ Sodoma lo'o quichi̱ Gomorra lo'o xa' la quichi̱ nu ndi'i̱ cacua ti; ñi'ya̱ ngua'ni ngu' xca̱ bi' cha' cuxi, jua'a̱ lye tsa ngua'ni cuxi nu jyo'o cusu' nu nguti'i̱ quichi̱ bi', hasta nu ngua'ni suba' ngu' lo'o tya'a qui'yu ti ngu'. Cua ndyujuii ycui' Ndyosi ji'i̱ lcaa ngu' quichi̱ bi' lo'o quii' tlyu ji'i̱ Ni li'. Jua'a̱ ca cuayá' ti' lcaa ñati̱ ña'a̱ cha' tlyu nu nchca ji'i̱ ycui' Ndyosi ndu'ni Ni; la cui' lo'o sca quii' tlyu nu ná nga'a̱ cha' tyubi' tsiya' ti, jua'a̱ xcube' Ni ji'i̱ lcaa ñati̱ nu ndu'ni cha' cuxi.
8Lo'o nu ngu' cuiñi bi' ni, ñi'ya̱ nu ngua'ni cuxi jyo'o cusu' bi', jua'a̱ ndu'ni ngu'; ñi'ya̱ si nchcui' xcalá ti ngu' bi', jua'a̱ laca cha' cuxi nu ndu'ni ngu'. Xña'a̱ tsa tyiquee ngu' bi', ndu'ni tsa ngu' cha' suba'; jua'a̱ ná ndaquiya' ngu' bi' tsiya' ti ji'i̱ cha' nu nchcui' cua ña'a̱ ca ngu' nu laca loo. Lo'o li' hasta nchcui' suba' ngu' bi' ji'i̱ xca̱ ji'i̱ ycui' Ndyosi nu ntucua nde cua̱. 9Pana si'i jua'a̱ ngua'ni Miguel nu laca loo ji'i̱ xca̱ ji'i̱ ycui' Ndyosi; nu lo'o ngusu̱u̱ tya'a nu Miguel bi' lo'o nu xña'a̱ xqui'ya jyo'o Moisés, ná nchcui' ni sca cha' cuxi lo'o nu xña'a̱ bi'. Ndi'ya̱ ti nchcui' lo'o: “Ycui' nu Xu'na na' ntsu'u cha' cua'a jinu'u̱”, nacui̱ Miguel ji'i̱ nu xña'a̱ bi' li'. 10Pana juani nchcui' nu ngu' cuiñi bi' cha' cuxi ji'i̱ cua ña'a̱ ca cha' ji'i̱ Jesús, masi ná nchca cuayá' ti' ngu' ji'i̱ cha' bi' tsiya' ti; ndyu'ni ñu'u̱ ngu' bi' ji'i̱ ycui' ca ngu', xqui'ya cha' ndu'ni ngu' ñi'ya̱ ndu'ni na'ni nu ná nchca culacua ti'.
11Tya'na tsa nu ngu' cuiñi bi'. Cua ngusñi ngu' tyucui̱i̱ cuxi nu ngulu'u jyo'o Caín ji'i̱ ñati̱; cua ndu'utsu' ngu' ji'i̱ tyucui̱i̱ tso'o cha' caja cñi ji'i̱ ngu' ñi'ya̱ ngua'ni jyo'o Balaam, nu lo'o ngusñi yu caya' cuentya ji'i̱ cña cuxi nu cua cua'ni ti yu nu ngua sa'ni. Ntsu'u cha' cajaa nu ngu' cuiñi bi' tsiya' ti, ñi'ya̱ cua ngujuii jyo'o Coré nu lo'o lye tsa ngusu̱u̱ tya'a yu lo'o ycui' nu Xu'na na. 12Masi cuxi tsa ndu'ni nu ngu' cuiñi bi', ná ntyuju'u ti' ngu' tsiya' ti cha' ndi'i̱ ngu' lo'o ma̱ nu lo'o ndyu'u ti'i̱ ma̱ cha' cacu ma̱ si̱i̱ lo'o tya'a ma̱, xqui'ya cha' ngusñi ma̱ cha' ji'i̱ Jesucristo. Quiña'a̱ tsa ndacu ngu' bi' li', quiña'a̱ tsa ndyi'yu ngu', cha' tsa bi' ti cha' nti' ngu' ndya'a̱ ngu' slo ma̱; ná ndube ti' ngu' bi' tsiya' ti. Ñi'ya̱ laca sca xu'na xlya' nu ná ña'a̱si̱i̱ tso'o ji'i̱ xlya' ji'i̱, jua'a̱ laca ngu' bi'; ñi'ya̱ nti' coo btyi nu nxna lijya̱ lo'o cui'i̱ ti masi ná ca'ya tyo, jua'a̱ nti' nu ngu' cuiñi bi'; ñi'ya̱ laca sca yaca si'yu nu ná nda si'yu, jua'a̱ laca ngu' bi'. Pana sca yaca nu cua ngüityi, ntsu'u cha' xcua̱a̱ na ji'i̱, cha' nga'aa ntsu'u juersa ji'i̱ cha' cu'ú la li'; cua ndye ngujuii yaca bi'. 13Ñi'ya̱ nxasu clyoo' tyujo'o, nchcua̱a̱ clyoo' ngo' cuu' ca to' hitya, jua'a̱ laca cña cuxi nu ndyu'ni ngu' bi'; ñi'ya̱ laca sca cuii nde cua̱ nu ngusna ndyaa xa' tyucui̱i̱ cha' nga'aa ta xee nde talya, jua'a̱ laca ngu' cuiñi bi'. Pana cua ngua'ni cho'o ycui' Ndyosi sca se'i̱ su ná ntsu'u xee tsiya' ti su tyaa nu ngu' cuiñi bi'.
14Cua sa'ni tsa nchcui' jyo'o Enoc ñi'ya̱ nu caca ji'i̱ ngu' cuiñi nu ndu'ni jua'a̱. Cua ndya'a ca'yu latya sñi' ste' jyo'o Adán, lo'o li' ngula nu Enoc nu ngua tu'ba ji'i̱ ycui' Ndyosi cha' chcui' Ni lo'o ñati̱ nu ngua sa'ni. Ndi'ya̱ nchcui' Enoc bi': “Cua na'a̱ na' ji'i̱ ycui' nu Xu'na na, cha' lijya̱ Ni lo'o tyu̱u̱ tsa tya'a mil xca̱ ji'i̱ ycui' Ni, 15cha' cua'ni cuayá' Ni ji'i̱ lcaa ñati̱. Li' xcube' Ni ji'i̱ lcaa ñati̱ cuxi xqui'ya cha' cuxi nu cua ngua'ni ngu', xqui'ya cha' suba' nu cua nchcui' ngu' ji'i̱ ycui' Ndyosi.” Jua'a̱ nacui̱ jyo'o Enoc bi'. 16Nu ngu' cuiñi bi' ni, xcui' na chi̱i̱ nti' ngu' bi' ndi'i̱ ngu' chalyuu; ná sca na ná ndiya ti' ngu' bi' tsiya' ti, cha' chiya'a̱ ti nchcui' ngu' ji'i̱ lcua ti cha'. Xcui' ndiya la ti' ngu' bi' lcaa lo cha' cuxi nu ntsu'u tyiquee ngu' ji'i̱. Lye tsa nchcui' tyucuaa ti' ngu' bi' lo'o tya'a ngu', pana xcui' tso'o tsa nchcui' ngu' bi' ji'i̱ ñati̱ si xtyucua ngu' ji'i̱ ngu' bi' lo'o sca cña cuxi.
Cña nu nga'a̱ cha' cua'ni ñati̱ nu ntsu'u cha' ji'i̱ lo'o Jesucristo
17Cu'ma̱ ngu' tya'a tso'o na nu tyaca'a tsa ma̱ 'na, nga'a̱ cha' tyi'u ti' ma̱ cha' nu nchcui' ñati̱ lo'o na, nu ñati̱ nu cua ngua tsa'a̱ ji'i̱ Jesucristo nu Xu'na na tya clyo. 18“Tyu'u tucua xi ñati̱ cuiñi lo'o cua tye ti chalyuu”, nacui̱ ngu' bi' ji'na. “Xtyí lo'o ngu' cuiñi bi' ji'i̱ lcaa cha' tso'o nu ntsu'u ji'i̱ ycui' Ndyosi, jua'a̱ cua'ni ngu' cua ña'a̱ ca cha' cuxi nu ndiya ti' ngu' ji'i̱”, nacui̱ ngu' bi' ji'na. 19Cua'ni nu ngu' cuiñi bi' cha' nga'aa stu'ba cha' nu culacua ti' ma̱ lo'o tya'a ma̱. Ndiya tsa ti' ngu' bi' lcaa cha' cuxi nu ntsu'u chalyuu, cha' ná ndyanu Xtyi'i ycui' Ndyosi ne' cresiya ji'i̱ ngu' bi' tsiya' ti.
20Pana nu cu'ma̱ ngu' tya'a tso'o na ni, xa' ña'a̱ cua'ni ma̱; nga'a̱ cha' xtyucua ma̱ ji'i̱ ngu' tya'a ma̱ cha' lcaa ma̱ talo ma̱ cua'ni ma̱ cña ji'i̱ ycui' Ndyosi. Taca talo ma̱ xqui'ya cha' ngusñi tso'o ma̱ cha' ji'i̱ ycui' Ni. Lo'o jua'a̱ ta Xtyi'i ycui' Ndyosi juersa ji'i̱ ma̱ cha' taca chcui' ma̱ lo'o Ni. 21Bi' cha' lacua, cua'a ma̱ ji'i̱ ycui' ca ma̱; cui'ya ma̱ cuentya ñi'ya̱ nu cua'ni ma̱ nde chalyuu, cha' jlo ti' ma̱ cha' ntsu'u tsa tyiquee ycui' Ndyosi ña'a̱ Ni ji'i̱ ma̱. Jatya ma̱ ni jacua' tyalaa tsa̱ lo'o ta ycui' Jesucristo nu Xu'na na chalyuu nu ná nga'a̱ cha' tye tsiya' ti ji'na, cha' tya'na tsa ti' Ni ña'a̱ Ni ji'na.
22Cua'ni tya'na ti' ma̱ ji'i̱ lcaa ngu' tya'a ma̱ nu bilya xñi tso'o cha' ji'i̱ Jesucristo, lo'o jua'a̱ culu'u tso'o la ma̱ ji'i̱ ngu' bi'. 23Cua'ni lyaá ma̱ ji'i̱ ngu' nu cua tyumi̱' ti lo quii' ji'i̱ nu xña'a̱, culo ma̱ ji'i̱ ngu' bi' ya' nu xña'a̱. Ña'a̱ ti tya cua'ni tya'na ti' ma̱ ji'i̱ ngu' nu xcui' cha' cuxi ndu'ni; ña'a̱ ti xtyucua ma̱ ji'i̱ ngu' bi', cha' taca ca cuayá' tso'o la ti' ngu' cha' liñi ji'i̱ ycui' Ni, masi cutsi̱i̱ ma̱ xi ji'i̱ cha' cuxi nu ndu'ni ngu', ñi'ya̱ si cojolaqui nu cha' cuxi bi' ji'i̱ ma̱.
Ndyu'ni tlyu Judas ji'i̱ ycui' Ndyosi
24-25Sca ti ycui' Ndyosi ntsu'u chalyuu. Taca cua'ni lyaá Ni ji'na xqui'ya Jesucristo nu Xu'na na; sca ti ycui' Ni nchca ji'i̱ Ni ña'a̱si̱i̱ Ni ji'na, laja lo'o ndya'a̱ na tyucui̱i̱ tso'o nu ngulu'u Ni ji'na. Xtyucua Ni ji'na cha' ná tyeje sna quiya' na, cha' ná tyu'utsu' na ji'i̱ tyucui̱i̱ bi', ña'a̱ cuayá' nu tyalaa na tso'o ti ca su ndubi tsa ña'a̱ xee, ca su ntucua ycui' Ndyosi. Lubii tsiya' ti caca cresiya ji'na lo'o cua ndyalaa na ca slo Ni, lo'o jua'a̱ caca chaa tsa ti' na li'. Bi' cha' juani cua'ni tlyu na ji'i̱ ycui' Ndyosi nu ntucua ca su tlyu nde cua̱, cha' sca ti ycui' Ndyosi ntsu'u nu tlyu tsa laca Ni; sca ti ycui' Ni laca Ni loo ji'i̱ lcaa lo na nu ntsu'u chalyuu, jua'a̱ sca ti ycui' Ni nchca ji'i̱ Ni cua'ni Ni lcaa lo cña tonu tsiya' ti. Lu'ú ycui' Ndyosi tya lo'o bilya tya' chalyuu, lo'o jua'a̱ lu'ú Ni juani; ná nga'a̱ cha' tye tyempo cha' lu'ú Ni ca nde loo la. Jua'a̱ laca cha' lacua.
Currently Selected:
JUDAS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.