SAN JUAN 19
19
1Li' ngulo Pilato cña cha' tyaa lo'o ngu' ji'i̱ Jesús, cha' ti'í tsa quiji'i̱ ngu' ji'i̱ yu lo'o juata. 2Ngüiñá ngu' sendaru sca sne' quiche' cha' sta ngu' hique Jesús, li' nda ngu' sca late' cuaa ña'a̱ cha' cacu' yu, ñi'ya̱ ña'a̱ si laca yu rey. 3Li' lu'ba ti, lu'ba ti ndyaa ngu' slo yu cha' chcuicha' ngu' ji'i̱ yu; na cuiñi ti ngu' cha' ndyu'ni chi̱ ngu' loo yu.
―Tso'o ti tyi'i̱ nu'u̱, cusu', cha' nu'u̱ laca rey nu laca loo ji'i̱ ngu' judío ―ndu'ni ngu' ji'i̱ Jesús li'.
Lo'o li' ngujui'i̱ ya' ngu' loo Jesús.
4Chaca quiya' ngutu'u Pilato ni'i̱ ndyaa su ndi'i̱ ngu' judío.
―Cua lijya̱ yu jua ―nacui̱ Pilato―, lijya̱ lo'o na' ji'i̱ yu jua slo ma̱ chaca quiya', cha' caca cuayá' ti' ma̱ cha' ná ntsu'u qui'ya ji'i̱ yu cuentya jna'.
5Li' ngutu'u Jesús lo'o sne' quiche' ntucua hique yu, lo'o late' cuaa ña'a̱ lacu' yu.
―Ña'a̱ ma̱ ji'i̱ yu cua ña'a̱ ―nacui̱ Pilato li'.
6Lo'o sti jo'ó nu laca loo lo'o msu ji'i̱ ngu' ni, cui̱i̱ ngusi'ya lo'o ngu' ji'i̱ Pilato lo'o na'a̱ ngu' ji'i̱ Jesús lijya̱.
―¡Cujuii clya ma̱ ji'i̱ yu! ¡Cujuii clya ma̱ ji'i̱ yu jua! ―nacui̱ ngu' ji'i̱.
Nchcui' Pilato lo'o ngu' li':
―Ycui' ca ma̱ yaa lo'o ma̱ ji'i̱ yu cha' cujui'i̱ ca'a̱ ma̱ ji'i̱ lo crusi ―nacui̱ Pilato ji'i̱ ngu'―. Cuentya jna' ná ntsu'u qui'ya ji'i̱ yu.
7Li' nguxacui̱ ngu' judío cha' ji'i̱ Pilato bi':
―Ntsu'u sca cha' ji'i̱ cuare ―nacui̱ ngu'―. Cuentya ji'i̱ ya ntsu'u qui'ya ji'i̱ yu, cha' nacui̱ yu cha' laca yu nu sca ti Sñi' ycui' Ndyosi; xqui'ya cha' bi' ntsu'u cha' cajaa yu.
8Lo'o ndyuna Pilato cha' bi', ndyutsi̱i̱ tsa yu li'. 9Xa' nguxtyu̱u̱ Pilato ndyaa nde ni'i̱ ji'i̱, nchcuane ji'i̱ Jesús:
―¿Macala ngutu'u nu'u̱ lijya̱?
Ná nguxacui̱ Jesús cha' ji'i̱ tsiya' ti li'.
10―¿Ni cha' laca ná nti' nu'u̱ chcui' lo'o na'? ―nacui̱ Pilato ji'i̱ Jesús―. Cua jlo ti' nu'u̱ cha' ntsu'u chacuayá' 'na cha' cua'ni lyaá na' jinu'u̱, lo'o jua'a̱ ntsu'u chacuayá' 'na cha' cujuii na' jinu'u̱ lo crusi.
11―Ná ntsu'u chacuayá' jinu'u̱ tsiya' ti cha' caca nu'u̱ loo jna' ―nacui̱ Jesús ji'i̱ Pilato―. Ycui' Ndyosi nu laca loo la, bi' laca nu ta chacuayá' ji'na; bi' cha' tlyu la qui'ya ntsu'u ji'i̱ yu nu cua ndyujui' cresiya 'na jinu'u̱.
12Li' nguxana ndyu'ni cña ti' Pilato, si caja ñi'ya̱ nu cua'ni lyaá yu ji'i̱ Jesús. Pana ña'a̱ ti ndu'ni nu ngu' judío bi', cui̱i̱ ngusi'ya lo'o ngu' ji'i̱ Pilato:
―Si cua'ni lyaá nu'u̱ ji'i̱ nu qui'yu jua ni, li' nga'aa tso'o nu'u̱ cuentya ji'i̱ César nu laca xu'na cu'ma̱ ngu' romano ―nacui̱ ngu'―. Cua nacui̱ nu qui'yu jua cha' sca rey laca yu, bi' cha' tya'a cusu̱u̱ yu ji'i̱ César nu laca xu'na ma̱.
13Lo'o ndyuna Pilato ñi'ya̱ nacui̱ ngu' judío bi', li' ndu'u yu ndyaa tucua yu ca su ndu'ni cuayá' yu ji'i̱ ngu'. Li' ngulo yu cña cha' ca̱a̱ lo'o ngu' ji'i̱ Jesús ca su ntucua yu, la cui' se'i̱ su ntsiya quee cuaja' nu ngua naa Gabata cha'cña ji'i̱ ngu' judío. 14Nde hora ngua bi', tsa̱ ta'a si̱i̱ ji'i̱ ta'a pascua. Lo'o li' nacui̱ Pilato ji'i̱ ngu' judío:
―Yu re laca rey nu laca loo ji'i̱ ma̱.
15Lye tsa nchcui' ngu' judío lo'o Pilato li':
―¡Yaa lo'o ma̱ ji'i̱ yu! ¡Yaa lo'o ma̱ ji'i̱ yu! Cujuii clya ma̱ ji'i̱ yu lo crusi.
―¿Ha nti' ma̱ cha' cujuii ya ji'i̱ rey nu laca loo ji'i̱ ma̱? ―nacui̱ Pilato ji'i̱ ngu'.
―Nga'aa ntsu'u chaca rey nu laca loo ji'na ―nguxacui̱ ngu' ji'i̱―. Sca ti César laca loo ji'na.
16Bi' cha' jua'a̱ ngua li'. Ngulo Pilato cña ji'i̱ sendaru cha' cujuii ngu' ji'i̱ Jesús, cha' cujui'i̱ ca'a̱ ngu' ji'i̱ yu lo crusi li'.
Ngujui'i̱ ca'a̱ ngu' ji'i̱ Jesús lo crusi
17Li' ndaya' sendaru ji'i̱ Jesús, ndyaa lo'o ngu' ji'i̱ Jesús ca su cajaa yu. Ngüi'ya Jesús ji'i̱ crusi nu ji'i̱ ycui' ca yu, ndyaa yu li'. Ndyaa lo'o ngu' ji'i̱ yu nde su naa Gólgota cha'cña ji'i̱ ngu' judío, nu jua'a̱ nti' tyu'u cha'cña bi': Su nscua tyijya̱ hique jyo'o. 18Ca bi' ngujui'i̱ ca'a̱ ngu' ji'i̱ Jesús lo crusi, lo'o tya tyucuaa tya'a ñati̱ tya'a ndyujuii ngu' ji'i̱ lo'o Jesús; la'a tsu' cui̱ nguxtyu̱ ngu' crusi ji'i̱ tsaca yu, la'a tsu' coca nguxtyu̱ ngu' crusi ji'i̱ chaca yu li'. Crusi ji'i̱ Jesús nguxtyu̱ ngu' cla'be la. 19Li' ngulo Pilato cña cha' ndi'ya̱ scua sca cha' hique crusi bi': “Nu nde laca Jesús Nazaret, rey ji'i̱ ngu' judío”. Jua'a̱ cha' nguscua bi'. 20Quiña'a̱ tsa ngu' judío na'a̱ ji'i̱ cha' nu nscua hique crusi bi', cha' ná tyijyu', to' quichi̱ ti ngua su ndyujuii ngu' ji'i̱ Jesús lo crusi. Sna lo cha'cña ji'i̱ ngu' nscua cha' bi' hique crusi: cha'cña ji'i̱ ngu' judío nscua bi', cha'cña ji'i̱ ngu' latín nscua bi', lo'o cha'cña ji'i̱ ngu' griego nscua bi'. 21Bi' cha' ndyaa sti jo'ó nu laca loo ji'i̱ ngu' judío, ndyaa cacha' ngu' ji'i̱ Pilato:
―Ná tso'o cha' nguscua nu'u̱ cha' rey laca yu bi', cha' laca yu loo ji'i̱ cuare ngu' judío ―nacui̱ ngu'―. Tso'o la si scua nu'u̱ cha' ycui' yu nacui̱ yu cha' laca yu rey ji'i̱ ngu' judío.
22Li' nguxacui̱ Pilato cha' ji'i̱ ngu':
―Tyanu cha' bi' ñi'ya̱ nu nscua ti, na cua nscua juani ―nacui̱.
23Lo'o cua ngujui'i̱ ca'a̱ sendaru ji'i̱ Jesús lo crusi, li' ndaya' sendaru bi' ste' yu. Ndi'i̱ jacua tya'a sendaru ca bi' lo'o cua ngusa'be ngu' ste' Jesús cha' caja xi ndaca ji'i̱ ca ta'a jacua ngu'. Lo'o late' tyucui̱ ji'i̱ Jesús ndaya' ngu' ji'i̱. Ña'a̱ tsa cu' ti ngalya late' bi', ná ntsu'u su ngujyacua̱ late' bi'. 24Bi' cha' nacui̱ ngu' ji'i̱ tya'a ngu':
―Ná cusaa' na late' re. Quijya na lo'o tya'a na cha' quije cha' ji'na tilaca nu ca ji'i̱ late' re.
Lo'o jua'a̱ ngua cuayá' ti' na cha' chañi cha' nu nscua lo quityi cusu cua' sa'ni, nu nchcui' ndi'ya̱: “Cua ngusa'be ngu' ste' na' lo'o tya'a ngu', cua ngüijya ngu' lo'o tya'a ngu' cha' quije cha' ji'i̱ ngu' tilaca nu ca ji'i̱ late' bi'”. Jua'a̱ nacui̱ lo quityi bi', lo'o la cui' jua'a̱ ngua'ni ngu' sendaru bi' li'.
25Laja li' ndu̱ xtya'a̱ Jesús cacua ti su ngujui'i̱ ca'a̱ ngu' ji'i̱ yu lo crusi bi'. Ndu̱ lo'o sca nu cuna'a̱ tya'a ngula, lo'o María clyo'o Cleofas, lo'o María Magdalena. 26Na'a̱ Jesús ji'i̱ xtya'a̱ yu, lo'o jua'a̱ na'a̱ yu ji'i̱ sca nu qui'yu nu ndyaca tsa'a̱ ji'i̱ nu tyaca'a tsa ji'i̱ Jesús bi', na'a̱ yu cha' stu'ba ti ndu̱ ngu' cacua ti slo crusi. Li' nacui̱ Jesús ji'i̱ xtya'a̱ yu:
―Ma'a̱ ―nacui̱―, yu cua caca sñi' nu'u̱ juani.
27Lo'o jua'a̱ nchcui' Jesús lo'o nu qui'yu bi':
―Ma' cusu' cua caca xtya'a̱ nu'u̱ juani.
Li' ndyaa lo'o nu qui'yu bi' ji'i̱ xtya'a̱ Jesús, nda su tyi'i̱ ma' ca toni'i̱ ji'i̱ li'.
Ngujuii Jesús
28Jua'a̱ ngua lo'o cua ngua tii Jesús cha' cua ngua lcaa cha' nu ntsu'u cha' caca ji'i̱ ycui' yu, li' nacui̱ yu ñi'ya̱ nu nacui̱ sca cha' nu nscua lo quityi cusu':
―Nguityi tsa na' hitya ―nacui̱ yu.
29Nde jua ndu̱ sca te'í̱ vino tiye'. Li' ngujui'i̱ ngu' sca quiche ne' te'í̱ su ntsu'u vino bi', ña'a̱ cuayá' nu ngutsa' tso'o ti; ngusta ngu' quiche bi' si̱' chcua̱ cha, ngusicua̱ ngu' ji'i̱ quiche ña'a̱ cuayá' nu tyalaa ca su ntucua tu'ba Jesús. 30Lo'o cua nguxcui Jesús vino bi', li' nacui̱ yu:
―Cua ngua lcaa cha'.
Li' ngua'ya tacui hique yu, ngujuii yu li'.
Ndyojo' sendaru chcua̱ cha sii' Jesús
31Ta'a si̱i̱ pascua ngua, lo'o jua'a̱ ná nti' nu ngu' judío bi', cha' tyanu jyo'o lo crusi chaca tsa̱. Ndube tsa ti' ngu' cha' tacati tsa tsa̱ ta'a bi'; bi' cha' ndyaa ngu' slo Pilato, ngüijña ngu' cha' ji'i̱ nu cusu' cha' cula'a sendaru tyijya̱ quiya' ngu' nu ndacui lo crusi, cha' cajaa clya ngu' li'. Hasta li' caja ñi'ya̱ nu caca ta'ya ngu' ji'i̱ jyo'o bi' lo yuu. 32Bi' cha' ndyaa sendaru ca su ndu̱ crusi ji'i̱ tya'a ngujuii Jesús; ngula'a ngu' quiya' su ndyaa ngu' clyo, li' ngula'a ngu' quiya' nu chaca. 33Pana lo'o ndyaa ngu' ca su ndu̱ crusi ji'i̱ Jesús, li' na'a̱ ngu' cha' cua laca ngujuii yu, bi' cha' nga'aa ngula'a ngu' quiya' Jesús.
34Ña'a̱ cuayá' nu ndyojo' sca sendaru chcua̱ cha sii' Jesús, li' tsiya' ca ndyalú tañi nguxa' lo'o hitya lubii. 35Lo'o na' nu nscua̱ quityi re, Juan laca na', na'a̱ na' cha' jua'a̱ ña'a̱ ngua cha' bi'. Chañi cha' jlo ti' na', bi' cha' nchcui' na' cha' liñi lo'o cu'ma̱, cha' lo'o ma̱ taca jlya ti' ma̱ cha' bi'. 36Cua ngua jua'a̱, ñi'ya̱ nu nscua cha' lo quityi ji'i̱ ycui' Ndyosi ndi'ya̱: “Ná catsa ni tsaca tyijya̱ yu”. 37Lo'o ntsu'u chaca cha' nu nscua lo quityi bi' nu nchcui' ndi'ya̱: “Ndyojo' ñati̱ chcua̱ cha sii' yu, lo'o li' nguxña'a̱ ngu' bi' ji'i̱ nu quicha bi'”.
Nguatsi' jyo'o Jesús
38Nde ngusi̱i̱ la ndyaa tsaca yu nu naa José Arimatea slo nu Pilato bi'. La cui' ñati̱ nu ngua tsa'a̱ ji'i̱ Jesús laca bi', masi cuaana ti ndyaca tsa'a̱ nu José bi'. Ntsi̱i̱ yu si ca cuayá' ti' ngu' judío tya'a quichi̱ tyi yu cha' ndyaca tsa'a̱ yu ji'i̱ Jesús. Ndyaa yu ngüijña yu chacuayá' ji'i̱ Pilato cha' tsaa lo'o yu ji'i̱ jyo'o Jesús cha' tyatsi', lo'o li' nda Pilato chacuayá' tyaa lo'o yu ji'i̱. Li' ndyaa José ca su ndu̱ crusi, ndyaa ndyiqui'ya ji'i̱ jyo'o Jesús, cha' tsaa lo'o yu ji'i̱ ca to' cuaá. 39Lo'o Nicodemo nguxtyucua ji'i̱ yu, la cui' Nicodemo nu ndyaa slo Jesús talya tya sa'ni xi bi'. Ndyaa lo'o Nicodemo sca yu'ba styi' yaca nu tyixi xtyi'i; mirra naa sca lo styi' yaca bi', nguxa' lo'o chaca nu naa áloes. Calaa tyii kilo cuayá' ti'i̱ yu'ba bi'. 40Ngusta ngu' na tyixi xtyi'i bi' lo sca late' lati loo, li' ngüixi̱i̱ ngu' late' bi' tyucui ña'a̱ hichu̱' jyo'o Jesús, ñi'ya̱ nu ndu'ni ngu' judío nu lo'o nxatsi' ngu' ji'i̱ jyo'o nu ndyijii ji'i̱ ngu'. 41Ca su ngujui'i̱ ca'a̱ ngu' ji'i̱ ngu' lo crusi, ca bi' ntsu'u sca lo'o su ndi'i̱ yaca tyacala' ji'i̱ ngu'. Ne' lo'o bi' ntsu'u sca tyuquee nu ngulu ca ti ngu' sii' cua'a̱ cha' caca cuaá ji'i̱ ngu'. Bilya tyatsi' ngu' ne' cuaá bi'. 42Cacua ti ntucua tyuquee bi', bi' cha' ndacua ti nguxatsi' ngu' ji'i̱ jyo'o Jesús li', cha' cua ca talya ti ta'a si̱i̱ pascua, cuentya ji'i̱ ngu' judío.
Currently Selected:
SAN JUAN 19: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.