COLOSENSES 1
1
1Pablo laca na' nu nscua na' quityi re. Ycui' Ndyosi ngulo cña 'na, bi' cha' ndya'a̱ na' nchcui' na' cha' ji'i̱ Jesucristo lo'o ngu' xa' quichi̱ ca tyijyu' la. Stu'ba ti ndi'i̱ na' ca nde lo'o yu Timoteo tya'a ngusñi na cha' ji'i̱ Cristo. 2Nda na' quityi re cha' ca̱a̱ ca slo cu'ma̱ ca quichi̱ Colosas jua, cu'ma̱ ngu' nu ntsu'u cha' ji'i̱ ma̱ lo'o ycui' Ndyosi, cu'ma̱ nu laca ma̱ ngu' tya'a na xqui'ya cha' cua ngusñi tso'o ma̱ cha' ji'i̱ Cristo.
Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱, ca su ndi'i̱ ma̱ ca jua.
Nchcui' Pablo lo'o ycui' Ndyosi cuentya ji'i̱ ngu' bi'
3Nu lo'o nchcui' ya lo'o ycui' Ndyosi Sti Jesucristo nu Xu'na na cuentya ji'i̱ cu'ma̱, lu'ba ti ndya ya xlya'be ji'i̱ ycui' Ndyosi xqui'ya cu'ma̱. 4Cua ngujui cha' ji'i̱ ya cha' tso'o tsa ngusñi ma̱ cha' ji'i̱ Jesucristo, lo'o jua'a̱ nacui̱ ngu' cha' ntsu'u tsa tyiquee ma̱ ña'a̱ ma̱ ji'i̱ lcaa ngu' tya'a ngusñi ma̱ cha' ji'i̱ ycui' Ndyosi. 5Tya clyo lo'o ndyuna ma̱ cha' tso'o bi', cha' nu nchcui' ji'i̱ ycui' Ndyosi nu chañi ca, li' ngua cuayá' ti' ma̱ cha' tya ntsu'u chaca cha' nu cua tlyu la nu nga'a̱ cha' tyacua ji'na tyempo nde loo la lo'o tyalaa na ca su ntucua ycui' Ndyosi. Ca bi' ntsu'u co'o cha' bi' cuentya ji'i̱ ma̱; bi' laca cha' nu tyacua ji'i̱ ma̱ ca tiya' la xqui'ya cha' ngusñi ma̱ cha' ji'i̱ Cristo, lo'o jua'a̱ tso'o tsa ntsu'u tyiquee ma̱ ña'a̱ ma̱ ji'i̱ xa' la tya'a ñati̱ ma̱. 6Cua lijya̱ ngañi la cha' tso'o ji'i̱ Jesús bi' tyucui ña'a̱ chalyuu, lo'o jua'a̱ lijya̱ ndyaca tso'o la cresiya ji'i̱ ñati̱ macala su nduna ngu' cha' bi'. La cui' jua'a̱ ndyaca tya lo'o ndyuna ma̱ cha' bi' tya clyo; tya li' cua ndyuna ma̱ cha' ndu'ni tsa ycui' Ndyosi cha' xlya'be lo'o ñati̱, li' ngua cuayá' ti' ma̱ cha' chañi tsa laca cha' bi'. 7Cua ngujui cha' bi' ji'i̱ ma̱ lo'o ngulu'u yu Epafras ji'i̱ ma̱; tso'o tsa tya'a ndya'a̱ ya cña laca yu bi'. Jlo ti' ya cha' tso'o tsa nchcui' yu cha' ji'i̱ Cristo lo'o ngu' lcaa su ndya'a̱ yu cuentya ji'i̱ ya. 8La cui' yu bi' laca nu nacui̱ ji'i̱ ya cha' ndu'ni Xtyi'i ycui' Ndyosi cha' ntsu'u tsa tyiquee ma̱ ña'a̱ ma̱ ji'i̱ xa' la ñati̱.
9Bi' cha' juani lu'ba ti nchcui' ya lo'o ycui' Ndyosi cuentya ji'i̱ cu'ma̱; tya lo'o ngujui cha' ji'i̱ ya cha' cua ngusñi ma̱ cha' bi', ndijña ya cha' ji'i̱ ycui' Ndyosi cha' ta Ni chacuayá' cha' caca cuayá' lyiji ti' ma̱ lcaa cha' ñi'ya̱ nu nti' Ni cha' cua'ni ma̱, cha' jua'a̱ taca culacua tso'o ti' ma̱, taca ca'ya cha' tso'o hique ma̱ xqui'ya Xtyi'i ycui' Ndyosi li'. 10Lo'o li' lcaa tsa̱ lo'o ndya'a̱ ma̱ chalyuu taca cua'ni ma̱ cña, cua ña'a̱ ca cña nu nti' ycui' Ndyosi cha' cua'ni ma̱; taca cua'ni ma̱ lcaa lo cña tso'o cuentya ji'i̱ ycui' Ndyosi li', lo'o jua'a̱ taca ca cuayá' la ti' ma̱ ñi'ya̱ ndyu'u lcaa cha' ji'i̱ Ni. 11Nguula tsa cña ndu'ni ycui' Ndyosi ca su tlyu ca su ntucua ycui' Ni; bi' cha' cua ndijña na' ji'i̱ Ni cha' ta Ni la cui' juersa bi' ji'i̱ ma̱, cha' caca tso'o ti tyiquee ma̱ talo ma̱ ji'i̱ cua ña'a̱ ca cha' cuxi nu tyacua ji'i̱ ma̱. 12Lo'o jua'a̱ tya ma̱ xlya'be ji'i̱ ycui' Ndyosi Sti ma̱ nu cua nda chacuayá' cha' tyacua cha' tso'o ji'i̱ ma̱, la cui' ti cha' nu cua nchco'o Ni cha' tyacua ji'i̱ ñati̱ ji'i̱ ycui' Ni, nu lo'o tyalaa ngu' ca su xee tsa ca su ntucua ycui' Ni. 13Na cua ngua'ni lyaá Ni ji'na, cua ngua'ni tye Ni ji'i̱ chalyuu talya su nguta'a̱ na, lo'o jua'a̱ cua ngulu'u Ni chaca tyucui̱i̱ ji'na nu tsaa ca chalyuu tso'o su laca Cristo loo ji'na. Sñi' ycui' Ndyosi laca Cristo, lo'o jua'a̱ tyaca'a tsa yu ji'i̱ ycui' Ni; 14xqui'ya Cristo cua ngulaá na ji'i̱ nu cuxi, xqui'ya Cristo cua ngüi'ya Ni cha' clyu ti' ji'na ji'i̱ qui'ya nu ntsu'u ji'na lo'o Ni.
Cua nguaala' cha' ji'i̱ ycui' Ndyosi lo'o ñati̱ chalyuu
15Ná nchca ña'a̱ na ji'i̱ ycui' Ndyosi tsiya' ti; pana nu lo'o ya̱a̱ Cristo Sñi' ycui' Ni chalyuu, li' ngujui ñi'ya̱ nu ña'a̱ na ji'i̱ ycui' Ni. La cui' yu bi' laca nu nguti'i̱ tya clyo la lo'o ycui' Ndyosi, la cui' jua'a̱ laca yu loo ji'i̱ lcaa lo na nu ngüiñá Ni chalyuu. 16Stu'ba ti ndu̱ yu bi' lo'o ycui' Ndyosi Sti yu lo'o ntucua quiya' ndya' chalyuu, masi lo'o ndya' tyucui ña'a̱ nde cua̱, masi lo'o ndya' tyucui ña'a̱ nde lo yuu. Cua ngüiñá Ni lcaa na nu nchca ña'a̱ na ji'i̱ nde lo yuu chalyuu; lo'o jua'a̱ cua ngüiñá Ni lcaa na nu ná nchca ña'a̱ na ji'i̱, ñi'ya̱ nti' lcaa cui'i̱ nu laca loo nde cua̱; jua'a̱ cua ngüiñá Ni lcaa lo xu'na nu culo cña ji'i̱ ngu', masi nde lo yuu chalyuu, masi nde cua̱. Stu'ba ti ndu̱ Cristo lo'o ycui' Ndyosi Sti yu nu lo'o ngüiñá Ni tyucui ña'a̱ chalyuu; la cui' jua'a̱ xqui'ya yu bi', bi' cha' ndya' lcaa lo na. 17Cua laca ntucua yu bi' lo'o tya lyiji tya' chalyuu, lo'o jua'a̱ lcaa tsa̱ ndu'ni yu cña cha' tyi'i̱ tso'o ti lcaa na nu ntsu'u lo yuu chalyuu. 18Ycui' yu laca yu loo ji'i̱ lcaa taju ñati̱ nu ndyu'ni tlyu ji'i̱ ycui' Ndyosi tsa tlyu ti, ycui' laca nu nda chalyuu ji'i̱ ngu' bi'. Tya clyo la cua ndyu'ú ycui' yu chaca quiya' lo'o cua ngujuii yu, cha' li' taca ji'i̱ yu tyucua yu ca su laca yu loo ji'i̱ lcaa lo cha'. 19Cua nacui̱ ycui' Ndyosi cha' caca Sñi' Ni ñi'ya̱ laca ycui' Ni tsiya' ti, 20cha' jua'a̱ ngua ti' Ni cua'ni Ni, cha' chaca quiya' caca Ni loo ji'i̱ tyucui ña'a̱ chalyuu xqui'ya yu bi'. Cua nguaala' cha' ji'i̱ ycui' Ndyosi lo'o ñati̱ chalyuu lo'o ngujuii Cristo lo crusi xqui'ya na; jua'a̱ ngua'ni yu cha' xa' caca tyucui ña'a̱ chalyuu cuentya ji'i̱ ycui' Ndyosi chaca quiya', masi nde lo yuu chalyuu, masi nde cua̱.
21Nu ngua cua tsubi' la, tyijyu' tsa nguta'a̱ ma̱ ji'i̱ ycui' Ndyosi; tya'a cusu̱u̱ ma̱ ji'i̱ ycui' Ndyosi ngua ma̱ tyempo bi' xqui'ya cha' cuxi nu cua ngulacua ti' ma̱, xqui'ya cha' cuxi nu cua ngua'ni ma̱. Pana juani cua ngua'ni Ni cha' taca cati̱ qui'ya nu ntsu'u ji'i̱ ma̱ lo'o ycui' Ni, 22xqui'ya cha' tyucui ña'a̱ ycui' Cristo Sñi' Ni, nchcube' tsa yu lo'o ndyujuii ngu' ji'i̱ lo crusi. Jua'a̱ ngua'ni Ni tya li' cha' taca caca ma̱ ñati̱ ji'i̱ ycui' Ni, ñati̱ nu nga'aa ntsu'u yabe' hichu̱' ma̱ tsiya' ti, cha' nga'aa caca sta ngu' qui'ya ji'i̱ ma̱ lo'o Ni, nu lo'o ca̱a̱ Ni ca̱qui'ya Ni ji'na cha' tsalo'o Ni ji'na ca su ntucua Ni. 23Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.
Ndyu'ni Pablo cña cuentya ji'i̱ ñati̱ nu ngusñi cha' ji'i̱ ycui' Ni ca lcaa quichi̱
24Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo. 25Ycui' Ndyosi laca nu cua nda cña bi' 'na, cha' caca na' cña ji'i̱ ca ta'a ñati̱ nu ngusñi cha' ji'i̱ Ni lcaa quichi̱, cha' nguula la caca tyiquee ma̱. Nga'a̱ cha' ña'a̱ ti tya ta la na' cha' ji'i̱ Cristo lo'o xa' ñati̱ ña'a̱ cuayá' nu tye cuna ngu' cha' bi'. 26Tyucui tyempo nu ngua sa'ni la, ná ngujui ñi'ya̱ nu caca cuayá' ti' ngu' cha' bi'; cua ntsu'u yacu̱' ti cha'. Pana juani cua ngulu'u ycui' Ndyosi cha' bi' ji'i̱ lcaa ñati̱ nu ntsu'u cuentya ji'i̱ Ni. 27Sca cha' tlyu nu tso'o tsa laca cha' bi', sca cha' nu caja ji'i̱ lcaa lo ñati̱ chalyuu laca cha' ji'i̱ ycui' Ndyosi bi'; pana ná ngujui chacuayá' cha' caca cuayá' ti' ñati̱ ji'i̱ ycui' Ndyosi cha' bi' nu ngua cua sa'ni la. Ndi'ya̱ ndyu'u cha' bi', cha' nu bilya cuna ngu': Taca tyi'i̱ Cristo lo'o na nde chalyuu, masi juani ti; lo'o jua'a̱ tiya' la li' taca tyu'u cha' ji'na lo'o ycui' Ndyosi ca su tlyu su xee tsa ca su ntucua ycui' Ni.
28Bi' cha' lye tsa nchcui' ya cha' ji'i̱ Cristo lo'o lcaa ñati̱; tso'o ti, qui'i ti nclyu'u ya cha' bi' ji'i̱ ngu', ndacane ya ji'i̱ ngu' cha' nga'aa cua'ni ngu' cha' cuxi. Cua nti' tsa ya cha' tso'o tsa caca tyucui ti' tyiquee scaa ngu' cuentya ji'i̱ Cristo nu lo'o tyalaa ngu' ca slo ycui' Ni. 29Bi' cha' lye tsa ndyu'ni na' cña cuentya ji'i̱ cha' bi'; nguula tsa cña ndyu'ni na', lo'o jua'a̱ tlyu tsa juersa nda ycui' Cristo 'na cha' tyu'ú ne' cresiya 'na, cha' talo na' cua'ni na' cña bi'.
Currently Selected:
COLOSENSES 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.