2 CORINTIOS 1
1
1Pablo laca na'. Se'i̱ ti ndi'i̱ na' ca nde lo'o Timoteo tya'a ngusñi na cha' ji'i̱ Cristo. Nscua ya quityi re cha' ca̱a̱ slo lcaa cu'ma̱ ca quichi̱ Corinto nu tsa tlyu ti ndyu'ni tlyu ma̱ ji'i̱ ycui' Ndyosi, lo'o jua'a̱ tyaa quityi re slo lcaa ñati̱ nu ntsu'u cha' ji'i̱ lo'o ycui' Ndyosi tyucui ña'a̱ loyuu su cuentya Acaya. Cua nda ycui' Ndyosi cña 'na cha' tsa'a na' chcui' na' lo'o ngu' xa' quichi̱ ca tyijyu' la, lcaa cha' nu ji'i̱ Jesucristo. 2Cua nti' tsa ya cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.
Nxtyucua tsa ycui' Ndyosi ji'na lo'o quiña'a̱ tsa cha' ti'í ndyacua ji'na
3Cua'ni tlyu na ji'i̱ ycui' Ndyosi nu laca Sti Jesucristo nu Xu'na na, xqui'ya cha' tya'na ti' Ni ña'a̱ Ni ji'na, lo'o jua'a̱ nxtyucua tsa Ni ji'na lo'o ndyacua cua ña'a̱ ca cha' ti'í ji'na. 4Nu nxtyucua Ni ji'na ni, jua'a̱ ndu'ni Ni cha' tiya' la taca xtyucua na ji'i̱ xa' ñati̱, nu lo'o tyacua cua ña'a̱ ca cha' ti'í ji'i̱ ngu'; ñi'ya̱ lo'o nguxtyucua ycui' Ndyosi ji'na, la cui' jua'a̱ taca xtyucua na ji'i̱ xa' ñati̱ li'. 5Ñi'ya̱ lo'o ngua'ni lya' ti' ñati̱ ji'i̱ Cristo tya sa'ni la, jua'a̱ nda ngu' quiña'a̱ tsa cha' ti'í ji'na juani, nu lo'o nchcui' na cha' ji'i̱ Cristo; pana ña'a̱ ti nxtyucua tsa Cristo ji'na, la cui' hora lo'o nchcube' na. 6Masi tyacua cha' ti'í ji'i̱ ya, masi lya' ti' ngu' ji'i̱ ya, xqui'ya cu'ma̱ laca cha' ti'í bi', cha' taca xtyucua la ycui' Ndyosi ji'i̱ ma̱ cha' caja ñi'ya̱ clyaá ma̱ ji'i̱ nu cuxi li'. Nu lo'o xtyucua Ni ji'i̱ ya ni, xqui'ya cu'ma̱ ndu'ni Ni jua'a̱ li', cha' caja ñi'ya̱ xtyucua ya ji'i̱ ma̱; jua'a̱ ta Ni juersa ji'i̱ ma̱ cha' lo'o cu'ma̱ talo ma̱ ji'i̱ cha' ti'í, la cui' ña'a̱ cha' ti'í nu ndyaca ji'i̱ ya. 7Ndyi'u tsa ti' ya ji'i̱ cu'ma̱. Jlo ti' ya cha' ñi'ya̱ ndyu'ni lya' ti' ngu' ji'i̱ ya, jua'a̱ cua'ni lya' ti' ngu' ji'i̱ ma̱; pana ñi'ya̱ nxtyucua Ni ji'i̱ ya, jua'a̱ xtyucua Ni ji'i̱ cu'ma̱.
8Cu'ma̱ tya'a ngusñi na cha' ji'i̱ Cristo, cua nti' ya cha' caca cuayá' ti' ma̱ ñi'ya̱ ngua lo'o ngujui cha' ti'í ji'i̱ ya ca quichi̱ su ndyaa ya ca loyuu su cuentya Asia, cha' tlyu tsa cha' cuxi nu ndyacua ji'i̱ ya nu ngua li'. Ná jlo ti' ya tsiya' ti ñi'ya̱ caca cha' tyiji̱loo ya ji'i̱ cha' cuxi bi' nquicha'; ngua ti' ya cha' nga'aa tyu'ú ya, 9cha' cua ndyalaa tyempo nu cua cajaa ti ya. Pana jua'a̱ ngua cha' tso'o la jlya ti' ya ji'i̱ sca ti ycui' Ndyosi, cha' nchca ji'i̱ Ni cua'ni Ni cha' tyu'ú ñati̱ chaca quiya' masi cua ngujuii ngu'; bi' cha' nchca ji'i̱ Ni cua'ni lyaá Ni ji'na, si'i na culacua ti' na cha' ycui' ca ti na ntsu'u cha' cua'ni na cha' clyaá na laja cha' cuxi bi'. 10Cua ngua'ni lyaá ycui' Ndyosi ji'i̱ ya tyempo bi', cha' ná ngujuii ya, masi cuxi tsa ngua cha' ca bi'; lo'o jua'a̱ tya cua'ni lyaá la Ni ji'i̱ ya ca nde loo la. Cua ngusñi ya cha' ji'i̱ ycui' Ndyosi, bi' cha' jlya ti' ya ji'i̱ ycui' Ni, cha' ña'a̱ ti tya cua'ni lyaá Ni ji'i̱ ya. 11Lo'o jua'a̱ taca xtyucua ma̱ ji'i̱ ya nu lo'o chcui' ma̱ lo'o ycui' Ndyosi cuentya ji'i̱ cuare. Tucuá Ni cha' nu chcui' ma̱ lo'o Ni, cha' tyu̱u̱ tya'a ma̱; li' cua'ni Ni cha' caca tso'o ji'i̱ ya. Lo'o li' tyu̱u̱ tya'a ma̱ taca tya ma̱ xlya'be ji'i̱ ycui' Ndyosi cuentya ji'i̱ ya, nu lo'o cua ngulaá ya ji'i̱ nu cuxi.
Ná ngua ji'i̱ Pablo tsaa nde Corinto
12Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱. 13-14Tsa lo cua ti cha' nguscua ya lo quityi nu ca̱a̱ slo ma̱, sca cha' nu taca chcui' cu'ma̱, sca cha' nu taca ca cuayá' ti' ma̱. Masi juani cua ngua cuayá' ti' ma̱ xi, pana cua nti' ya cha' tya caca cuayá' tso'o la ti' ma̱ cha' bi'. Lo'o tyalaa tsa̱ bi', nu lo'o ca̱a̱ Jesús nu Xu'na na chaca quiya', li' caca tso'o tyiquee ma̱ ña'a̱ ma̱ ji'i̱ ya; jua'a̱ cuare tso'o ca ti' ya ña'a̱ ya ji'i̱ ma̱ ca li'.
15Jua'a̱ ngua ti' na', bi' cha' ngulacua ti' na' tsa'a na' slo cu'ma̱ tya clyo. Ná tyiquee' tsaa na'a̱ na' ji'i̱ cu'ma̱ tucua quiya' ngua ti' na' nquicha', cha' ca tso'o cresiya ji'i̱ ma̱. 16Clyo ngua ti' na' tyeje tacui na' nde su ndi'i̱ ma̱ tyucui̱i̱ lo'o ndya'a na' ca Macedonia. Nu lo'o nguxtyu̱u̱ na' ndya'a na' ca Macedonia bi', tya̱a̱ na' ca su ndi'i̱ ma̱ chaca quiya', cha' caca xtyucua cu'ma̱ jna' tsa'a na' nde tyucui̱i̱ Judea, ngua ti' na'. 17Pana lo'o ná ya̱a̱ na' slo cu'ma̱ ni, li' ngua ti' ma̱ cha' ná ngulacua tso'o ti' na'. Ná tso'o cha' chcui' ma̱ cha' laca na' sca ñati̱ nu nchcui' tucua ti cha'; nu lo'o ngüiñi tyucui̱i̱ 'na tya clyo, ná nñilo'o na' ji'i̱ ni sca ñati̱. 18Cua jlo ti' ycui' Ndyosi cha' ná nchcui' ya tucua cha' lo'o cu'ma̱, ñi'ya̱ si nacui̱ ya cha' jua'a̱ laca, lo'o li' nacui̱ ya cha' si'i jua'a̱. Ná ndu'ni ya jua'a̱, 19cha' nu Jesucristo bi', nu sca ti Sñi' ycui' Ndyosi ni, si'i tucua cha' ntsu'u tyiquee Ni. Cua nchcui' ya cha' ji'i̱ Ni su ndi'i̱ cu'ma̱, lo'o na', lo'o Silvano, lo'o Timoteo, nchcui' cua cha' ji'i̱ Ni. Ná chcui' Ni cha' si'i jua'a̱ laca sca cha' si cua nchcui' Ni tsaca quiya' cha' jua'a̱ laca cha' bi'. Sca ti Cristo laca nu chañi cha' nchcui' Ni cha' liñi, 20sca ti nu Cristo bi' nu ndu'ni cha' chañi cha' tyu'u tucua lcaa cha' nu nda ycui' Ndyosi lo'o na; bi' cha' xqui'ya Jesucristo taca chcui' na: “Amén, jua'a̱ caca cha' lacua”. Jua'a̱ ñacui̱ na laja lo'o ndu'ni tlyu na ji'i̱ ycui' Ndyosi. 21Ycui' Ndyosi laca nu ngua'ni lo'o ya cha' ngusñi tso'o ya cha' ji'i̱ Cristo, lo'o jua'a̱ ngua'ni Ni lo'o cu'ma̱; na cua ngua'ni ycui' Ndyosi cha' laca na ñati̱ ji'i̱ Ni. 22Ndi'ya̱ laca ñi'ya̱ si ngusta ycui' Ni sca cuayá' nu ji'i̱ Ni hichu̱' na, nu lo'o nda Ni Xtyi'i ycui' Ni nu ndyanu ne' cresiya ji'na. Xtyi'i ycui' Ndyosi laca nu nda ycui' Ndyosi ji'na yala la, cha' caca cuayá' ti' na cha' chañi cha' cua'ni Ni lo'o na lcaa ña'a̱ cha' nu nacui̱ Ni cha' cua'ni Ni.
23Ná nguta'a̱ na' quichi̱ tyi ma̱ tu'ni, cha' ná nti' na' cha' caca ñasi̱' na' ji'i̱ cu'ma̱. Chañi cha' xqui'ya cha' bi' ti, bi' cha' ná ndya'a̱ na' ca slo ma̱ li'. Cua jlo ti' ycui' Ndyosi cha' bi'. Qui'ya ycui' Ndyosi cresiya 'na si ná chañi cha' nu nchcui' na' re. 24Pana tso'o la masi si'i xqui'ya cuare ti taquiya' ma̱ cha' ji'i̱ ycui' Ndyosi, cha' ne' tyiquee ycui' ca ma̱ cua ngusñi tso'o ma̱ cha' ji'i̱ Jesús. Na cua nti' ya xtyucua ya ji'i̱ ma̱ cha' ca chaa la ti' ma̱ laja lo'o ndyu'ni tlyu ycui' ca ma̱ ji'i̱ Jesús.
Currently Selected:
2 CORINTIOS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.