SAN JUAN 4
4
Jesús jin'²in sɨɨ'²¹ɨ jaain²¹ tsamɨ́² cwáain¹ júu³ tya' Dios
1Galiñii¹ 'in tsá² fariseos 'e fúu¹mo tsá² gangalíin² coon'¹³ Jesús lagɨ Wó³. La joon jon fúu¹mo 'in saai¹ jmɨɨ²¹ lagɨ Wó³. 2Pe tsei'² jo saai¹ Jesús tsá² jmɨɨ²¹ jiin'¹³ 'in ngɨ¹ coon'¹³o 'in saai¹ tsá² jmɨɨ²¹. 3Joon mo galiñii¹i Jesús 'elo joon gacwo'ɨ́ɨ¹ɨ fu lɨ sii²¹ Judea joon itsee'¹³i fu lɨ sii²¹ Galilea.
4-8Joon fu lɨ ngangɨ́ɨ¹i 'ná¹ ngɨ́ɨ¹i coon²¹ lɨ sii²¹ Samaria. Joon náa¹ coon²¹ fuu²¹ sii²¹ Sicar. Joon co' joon roon¹on coon²¹ sii'¹³ 'wó² 'e gacwo'¹ 'lɨɨ²¹² Jacob jóon¹on 'lɨɨ²¹² Sé² calɨɨ. Joon nityí³ coon²¹ too²¹ lɨ nisá² jmɨɨ²¹ 'e sii²¹ la sii²¹ Jacob. Jesús tyaliin¹ coon'¹³ tsá² tya'a 'in ngɨɨ¹ɨ coon'¹³ 'e lɨ tyí³ too²¹ do mo tɨ́² tyiiañi'¹ joon ni'woo'²¹‑o 'áai¹. Joon tsá² tya'a do nilíin² 'e fuu²¹ ni náa¹ tyan' do ningalá¹ 'e idø'¹ø. Joon gacwó² Jesús caai² lɨ tyí³ too²¹ do. La 'ɨɨ²¹² tyíin¹in joon tyía¹ jaan²¹ tsamɨ́² seein²¹ Samaria tsacoon¹ jmɨɨ²¹ 'e tsi too²¹ do. Joon gajin'² Jesús:
―Cwoo'¹³xʉ jna jmɨ́ɨ¹³'ɨ.
9Joon 'in tsamɨ́² do nigajin'²in sɨɨ'²¹ɨ Jesús:
―¿Xiiala 'e mɨɨ'¹³ 'nʉ jna jmɨɨ²¹, tsʉ tsá² seein²¹ Israel 'nʉ joon jnagɨ 'in seein²¹ fu Samaria?
(Joon gajin'²o la joon tsʉ jo tyʉ́² seein¹ coon'¹³ 'in tsá² seein²¹ fuu²¹ do.) 10Joon gañii¹i Jesús:
―Waxʉ' lɨ 'nʉ ñi²'i jilaa'²¹ 'e cwo¹ Dios joon 'iin 'in mɨ¹ jmɨɨ²¹ lɨ́ɨ²u, 'nʉ‑ʉ nogɨ mɨ́ɨ¹²'ɨ jna‑a joon jnagɨɨ icwo'²oo 'nʉ jmɨɨ²¹ 'e jiin'¹in.
11Joon gañii¹i 'in tsamɨ́² do sɨɨ'²¹ɨ Jesús:
―Tsañʉʉ'¹ jo ñi²'i xiiala søø'¹³'ø jmɨɨ²¹ 'e tsi too²¹ no jiin'¹³ 'nii²¹² jo tyan²'an tsʉ 'o'²o 'e tsi too²¹ no. ¿Xiiala icwo'²'o jna² jmɨɨ²¹ 'e jiin'¹? 12'Lɨɨ²¹² tsacøøi'¹³ tyi' 'in ningɨɨ¹i Jacob 'in gasáa¹a 'e too²¹ sá² jmɨɨ²¹ no tyi jna'a. Tsʉ 'e jmɨɨ²¹ sá² noo jon ga'un'¹un 'ña'a coon'¹³ jóon¹on joongɨ coon'¹³ joo'núu³ tya'a. ¿Tɨ joon lɨ́ɨ²u 'e feei'¹gɨ 'nʉ lagɨ 'ii?
13Joon gajin'²in Jesús:
―Jileei'²¹ 'in 'uun'²¹ 'e jmɨɨ²¹ no 'in 'yá² 'unjmɨɨ²¹mo 'i tún¹. 14Pe jileei'²¹ 'in 'uun'²¹ 'e jmɨɨ²¹ cwóo³ jna jo jmɨɨ²¹² 'ya'²gɨ 'unjmɨ́ɨ¹i. Tsʉ jmɨɨ²¹ 'e cwóo³ jna lɨ lawa coon²¹ lɨ nii'¹³ jmɨɨ²¹ 'e lɨ tsi alma tya'a. Joon 'e jmɨɨ²¹ 'e nii'¹³ do icwoo¹o juncwii²¹ tya'a 'e seein²¹ coon²¹ tøø²mo.
15Joon gajin'²in 'in tsamɨ́² do:
―Tsañʉʉ'¹, sɨ cwoo'¹³ jna 'e jmɨɨ²¹ no tsʉ joon jo 'yá²gɨɨ unjmɨɨ²¹na. Joon jo 'ná²gɨɨ yatyíin³aan jmɨɨ²¹ 'e lɨ tyí³ too²¹ lo.
16Joon gajin'²in Jesús:
―Cwooi'², cwotee²'e ñʉʉ'¹ tyi'i. Joon ñiliin¹naa' fu lo.
17Joon ganii¹ 'in tsamɨ́² do:
―Jo seein²¹ ñʉʉ'¹ tyiia.
Joon gajin'²in Jesús:
―Jo'¹o júu³ tyi'i 'e foo'²¹'o jo nʉʉ'¹ tyi'i seein²¹. 18Tsʉ nigacu'²mo cwoo¹'o 'ñá² naa'¹³, joon 'in coon'¹³on la no jon'¹ ñʉʉ'¹ tyi'i 'i. 'E nija'²mo 'e foo'²¹'o.
19Mo ganúu²un 'in tsamɨ́² 'e júu³ do joon gajin'²in:
―Tsañʉʉ'¹, 'ɨ¹‑tsii 'e lɨ́ɨ¹u'u jaain²¹ tsá² 'in cwo¹ júu³ tyʉ́² tya' Dios. 20'Lɨɨ²¹² tsacøøi'¹³ tyii'i 'in galiseein²¹ Samaria gaun'goo²¹o Dios 'e moo'²¹ lo. Pe 'naa', tsá² seein²¹ Israel, foo'²¹ 'naa' 'e jiin'¹³ fuu²¹ lɨ sii²¹ Jerusalén lɨ lí² un'goo²¹o tsá² Dios.
21Joon gañii¹ Jesús:
―Jo'¹ cwolii¹un jna, yá³, 'e nijatyéen¹mo tyan'²an 'e un'goo²oo' Ña'ñʉ'¹ʉ' jo tyiin² ñilíin²naa' 'e moo'²¹ lo jogɨ tyiin² cwolíin²naa' fu Jerusalén. 22'Naa' tsá² seein²¹ Samaria, jo ñii²ii' 'naa' 'iin 'in un'goo²oo'. Pe jna'a né²oo'o 'iin 'in un'goo²¹o'o, tsʉ Dios gacwo'¹o jna'a tsá² saan²¹a'an Israel 'e júu³ tya' 'e tiin'¹³ tsá². 23Pe itɨ́²‑ɨ 'ii'²¹ joon 'ii'²¹ joongɨ tɨ́² la no wana 'e la jai'² 'e un'goo²¹o tsá² Ñʉ'¹ʉ' iun'goo²¹o 'ii jiin'¹³ coon'¹³ 'ii'²¹ tya' 'in Espíritu Tyʉ́² tya'a joongɨ coon'¹³ 'e la jai'². Tsʉ la joon 'iin²¹²in Ñʉ'¹ʉ' 'e un'goo²¹o tsá² 'ii. 24Tsʉ Dios 'in Espíritu Tyʉ́² joon tsʉ 'wii'¹³ joon 'in un'goo²¹o 'ii 'ná¹ un'goo²¹o coon'¹³ 'ii'²¹ tya' 'in Espíritu Tyʉ́² tya'a joongɨ coon'¹³ 'e la jai'².
25Joon gajin'²in 'in tsamɨ́² do:
―Jna niñi²oo ijó¹ Mesías ―'øøi'²¹‑tsi tsá² 'e Cristo do―; joon mi cwee¹i joongɨ ijin'²in sɨɨ'²¹ɨ jna' jilaa'²¹.
26Jesús‑gɨ gajin'²in:
―Jna‑a 'in fee'²ee 'nʉ, jnagɨɨ jon fuu²¹²uu 'nʉ. Jna‑a 'i.
27Tsifu joon gatyaliin¹ tsá² tya'a gani'goo²¹o‑tsi 'e Jesús do siin'¹³in fee'²¹i jaain²¹ tsamɨ́². Pe jiin'¹³ jaain²¹ jo tá²‑tsi wa 'e ungɨɨ¹ɨ 'ee 'iin²¹²in 'ido owa 'ee‑gɨ júu³ tyaa¹ 'ido. 28Joon 'in tsamɨ́² do, do‑o gatʉʉ¹ʉ tsʉ́ʉ¹ʉ joon gangaa'¹³mo fu 'e fuu²¹ 'ido‑o. Joon ganijmaa'¹³a tsá² júu³:
29―Ñijøø²¹²i duu' jaain²¹ tsañʉʉ'¹ 'in nigasɨɨ'²¹ɨ jna jilaa'²¹ 'e nigajmáa³aa. ¿Wa jon' 'ino‑o 'in Cristo?
30Joon ga'woo²¹i 'e fuu²¹ do joon ganilíin² lɨ siin'¹²in Jesús. 31La 'ɨɨ²¹² joon 'in ngɨ́¹ɨ coon'¹³ Jesús do gamɨɨ¹ɨ tyani 'ido, gajin'²in sɨɨ'²¹ɨ 'ido:
―Tɨfo'² tyii'i, cøø'²¹xʉ'ʉ.
32Pe joon 'ii gajin'²in:
―'Óo³oo 'e døø'¹³øø lɨ 'naa' jo ñí³oo'.
33Joon 'in ngɨ́¹ɨ coon'¹³ 'ido gacaain'¹³ 'wii²¹² unngɨɨ¹ɨ ruu'²¹i:
―¿Xʉfoo' seen²¹in 'in nijacon¹on 'e dø'²ø 'ino 'ee?
34Pe joon gajin'²in Jesús sɨɨ'²¹ɨ 'ido:
―Mi jmáa³aa jilaa'²¹ 'e 'iin²¹²in 'in gasii²¹in jna joongɨ 'e tyee²¹ to² tya'a 'e joon lawa unñi² tyiia. 35'Naa' foo²¹oo': “'Ná²gɨ tyúuin² sɨɨ'²¹ 'e joongɨ ilee²¹e' jilaa'²¹ 'e garoo²¹”; pe jna fuu²¹²uu 'naa': tyán²duu' cwáain¹ lɨ sɨjna² la gatón¹ náa² nilii²¹² coon¹on tsá². 36Joon jileei'²¹ 'in jmoo¹o to² joon coon¹o jilaa'²¹ 'e garoo¹o do 'e joon 'e nicɨ́² tya'a. Joon 'e garoo¹o do 'e coon¹on 'in tsá² do lɨ la lɨ́ɨ¹i 'in tsá² 'in 'ii'²¹ juncwii²¹ tya'a 'e taa'²¹ coon²¹ tøø²mo mo jai'² lɨ́ɨi² 'e júu³ tya' Dios. Joon coon²¹ la joon jløø'³mo coon²¹ caan²¹mo 'in gajñí²i coon'¹³ 'in gacón¹on do. 37Tsʉ júu³ ja'²mo 'e gasɨɨ'²¹ɨ tsá²: “In gajní²i do jmai'² tyiin²mo coon'¹³ 'in gacón¹on do.” 38Jna‑a gasɨ́ɨ²na 'naa' 'e cwotyiin²aan' 'e do lɨ jo 'e gajñí²ii' do. In xee'²¹mo gajmaa¹a to² do joon 'naa'gɨɨ' coon'²¹ tyatyiin²¹oo' 'e to² nijmaa¹a 'ido ―jin'² Jesús do.
39Joon fúu¹mo 'in tsá² seen²¹in 'e fuu²¹ do lɨ tyʉ'² to² Samaria jo'¹o galɨ́ɨ²i Jesús 'wii'¹³ 'e júu³ gatya¹ 'in tsamɨ́² do mo gajin'²in: “'In tsañʉʉ'¹ no gajin'²in jilaa'²¹ 'e nigajmáa³aa.” 40Joon mo gajalíin² 'in tsá² seen²¹in Samaria do gamɨɨ¹ɨ tyani Jesús wa iján²an 'ido coon'¹³on. Joon Jesús gajaan¹an tún² jmɨɨ²¹² coon'¹³ 'ido. 41Joon fúui¹ lɨ́¹ lɨ́ɨ¹gɨ 'in jo'¹ galɨ́ɨ²i mo ganúu²un jilaa'²¹ 'e jin'² Jesús. 42Joon jin'²in 'in tsá² do sɨɨ'²¹ɨ 'in tsamɨ́² do:
―Nogɨ jo'¹o nilɨ́ɨ²i jna'a jon' wa'a jiin'¹³ júu³ 'e ni tya'³ 'nʉ pe jna'a ninʉ́³oo'o júu³ tya'a joon nee²oo'o 'e ja'²mo Cristo 'ii 'in jmoo¹o tiin'¹³ tsá² taan²¹²in juncwii²¹.
'Un'láai² Jesús jóon¹ jaain²¹ tsá² 'in 'oo¹o to²
43Mo gangɨ́ɨ¹i tún² jmɨɨ²¹² joon gacwo'ɨ́ɨ¹ Jesús lɨ sii²¹ Samaria joon gangóo¹‑o fu¹ 'yúu²i fu lɨ sii²¹ Galilea. 44Jo gajaan¹an fuu²¹ lɨ sii²¹ Nazaret la lɨ 'e nigajin'²in 'ña'a Jesús, “Jaain²¹ 'in tsacwo¹o júu³ tyʉ́² jo 'ii'²¹i tsagoo¹o 'ii.” 45Joon mo gatyíi¹a lɨ sii²¹ Galilea joon 'in tsá² seen²¹in joon ga'ii'²¹mo 'ido 'e tyʉ́²‑ʉ. Tsʉ 'in tsá² do ni' nilíin²mo lɨ tɨ jmɨɨ²¹² pascua fu Jerusalén. Joon do‑o niganii²¹i jilaa'²¹ 'e nijmaa¹a Jesús lɨ tɨ jmɨɨ²¹² do.
46Joon gacɨɨ'¹³ɨ Jesús, gangaa'¹³i tún¹ fuu²¹ Caná náa¹ lɨ sii²¹ Galilea. Fuu²¹ joon lɨ nijmaa¹a jmɨɨ²¹ 'e galɨ́ɨ¹ vino. Joon tyíin¹in fuu²¹ Capernaum jaain²¹ 'in ni'oo¹o to² fee'¹ tyani² rǿøi¹³. Joon seen²¹in jaain²¹ jóon¹on 'in nitsaa'¹³. 47Joon mo ganúu²un 'in tsá² 'oo¹o to² do 'e nityía¹ Jesús fu Galilea, jaa'¹³i fu lɨ sii²¹i Judea, joon gangó¹o 'in tsá² do gangamɨɨ¹ɨ tyani Jesús wa 'ii'²¹i 'ido itsáa¹a fu tya' 'in tsañʉʉ'¹ do tsajmaa¹a mɨ́¹ tya' jóon¹on 'ido. Tsʉ tɨ li ijúun¹mo 'ido. 48Joon Jesús do gajin'²in gasɨɨ'²¹ɨ 'ido:
―'Naa' jo jo'¹ lɨ́ɨ²naa' wa jo jéei¹³ gañii²ii' li² coon'¹³ jilaa'²¹ milagros.
49Pe 'in tsá² 'oo¹o to² do gajin'²in:
―Laa'¹³xʉ'ʉ góo³oo, lɨ́ɨ³na tɨ jo jmaa²'a feei'¹‑'o'o 'wii²¹² tyiia wa'a tsá²a' cwojmaa'¹³'a mɨ́¹ tya' yʉʉn²¹ tyiia la nʉ'gɨ ijúun²in.
50Joon gajin'²in Jesús:
―Cwooi'¹³ fu tyi'i tsʉ yʉʉn²¹ tyi'i nityú¹mo.
Joon 'in tsañʉʉ'¹ do jo'¹o lɨ́ɨ²i júu³ tya' Jesús joon ganga'²mo. 51Joon ngóo¹o gatye'²mo tya'a mo ga'wooi²¹ tsa'leei'¹³ tya'a gangaunjiin'¹ 'ii. Joon gajin'²in 'in tsa'leei'¹³ tya'a do:
―Nityú¹mo yʉʉn²¹ tyi'i do.
52Joon gaunngɨɨ¹ɨ 'ee 'ii'²¹ 'e ga'láa²i 'in jóon¹on do. Joon gajin'²in 'in tsa'leei'¹³ do:
―Ca mo tyíia² la ngó¹o 'iin² coon²¹ gacwó² tyíi².
53Joon galili'³ jmii²¹ 'in xuui²¹² do 'e 'ii'²¹ joon mo gajin'² Jesús do: “Cwooi'¹³ fu tyi'i tsʉ yʉʉn²¹ tyi'i nityú¹mo.” Joon 'ña'a 'in tsá² 'oo¹o to² do jo'¹o lɨ́ɨ²i Jesús coon'¹³ 'in tsá² seein²¹ inʉʉ tya'a.
54'Elo galɨ́² tɨ tún² milagro 'e gajmaa¹a Jesús mo tyee'¹³i Galilea jaa'¹³i Judea.
Currently Selected:
SAN JUAN 4: chq
Highlight
Share
Copy
Want to have your highlights saved across all your devices? Sign up or sign in
© 1983, Wycliffe Bible Translators, Inc. All rights reserved.