SAN JUAN 20
20
Are xechon Jesús
(Mt. 28.1‑10; Mr. 16.1‑8; Lc. 24.1‑12)
1Ngain nchanho domingo María Magdalena cjoi ngain cueva mé atto ndoyo are ẍa naxion xehe, co vicon que icoha tti ẍo que vejé cueva mé. 2Cottimeja coinga sacjoi tti vehe Simón Pedro co iná de tti chojni que vacao Jesús, tti chojni que Jesús anto joinao, co ndac̈ho ngain na:
―Sadijicaoxin na de ngain cueva cuerpoe Jesús, co noaha na ttinó coín na cuerpo.
3Cottimeja Simón Pedro co tti iná chojni vac̈hje na co cjoi na ngain cueva mé. 4Cayoixin na tettinga na nataonxin, pero tti iná icha coinga que Pedro, co jehe mé tti icha saho joiji ngain cueva mé. 5Visé tsjehe co vicon jeho venda tate nttiha, pero jehe joixinha. 6Cottimeja joiji Simón Pedro, co jehe vixinhi cueva mé. Jehe cai vicon jeho venda tate nttiha, 7co cai vicon tti manta que gonda para vesia já Jesús, ijiha manta conixin venda, jehe manta dixea manta co ndaha jí manta. 8Cottimeja vixinhi tti iná chojni cai, tti joiji icha saho ngain cueva mé, co vicon tti diconhe, co jehe vitticaon, 9masqui jehe na ẍa coinxinha na tti jitaxin Palabré Dios que Jesús chonda que rroxechon de ngayehe nindadiguenhe. 10Cottimeja cayoi chojni mé sacjan na para nchiandoha na.
Are Jesús ẍago ngain María Magdalena
(Mr. 16.9‑11)
11Pero María Magdalena nttiha vittohe ndoja ngaca cueva mé, co jitsjanga. Co are jitsjanga visé para tsjehe ngaxinhi cueva mé, 12co jehe vicon yó ángel que tengá lontto roa co tate tti vehe cuerpoe Jesús. Ná de jehe tají tti vehe já Jesús co iná tají tti vehe rotté Jesús. 13Co cayoi ángel mé joanchianguihi María co ndac̈ho:
―¿Quedonda rritsjanga?
Jehe María ndac̈ho:
―Ixin sajoicao na cuerpoe Jesús, co nonaha ttinó coín na.
14Are joexin ndac̈ho yá, cjoendoa já co vicon Jesús que nttiha tají pero jehe venoeha ixin jehe Jesús. 15Cottimeja Jesús joanchianguihi:
―¿Quedonda rritsjanga? ¿Quensen rrittjé?
Jehe María ẍaxaon que puede xí mé tti jinda nttattochjoin nttiha co ndac̈ho ngain:
―Si soixin sacjoiho cuerpo que vehe nttihi, ndachjenji na ttinó cointtohe cuerpo para que janha sirroá cuerpo co satsjinha cuerpo mé.
16Cottimeja ndac̈ho Jesús ngain:
―¡María!
Co jehe María cjan, co ndac̈ho ixin nguigoa hebreo ngain Jesús:
―¡Raboni!
Co raboni rroc̈ho Maestro.
17Jesús ndac̈ho:
―Tanc̈hjanda na ixin ẍa tajinha ngain tti jí Ndodana. Pero ttji co ndache cain chojni que vacjinha que janha tsajín ngain tti ttjen Ndodana co Ndodá jaha ra cai, tti Dios de janha co Dios de jaha ra.
18Cottimeja María Magdalena joiquetonhe cain chojni que vacao Jesús ixin jehe María vicon Jesús, co ixin jehe Jesús ndache María para ixin rrondac̈ho ngain na.
Jesús ẍago ngain chojni que vacao
(Mt. 28.16‑20; Mr. 16.14‑18; Lc. 24.36‑49)
19Ngain ẍajeho nchanho mé, tti nchanho domingo, are ottie, canxion chojni que vacao Jesús tate na ngain ná nchia co jian diquejé na puerté nchia mé ixin vaẍagoen na chojni judío. Co rato mé Jesús ẍago ngayé na, co jehe joanjo joajna ngain na, co ndac̈ho:
―Dayehe ra tti c̈hjoin que tsonohe ansean ra.
20Co are joexin ndac̈ho jihi, jehe cjoago ngain na rá jehe co nttanttacoin tti conihi. Co jehe na ché na ixin vicon na Jesús iná. 21Cottimeja Jesús cjan ndac̈ho ngain na:
―Dayehe ra tti c̈hjoin que tsonohe ansean ra. Inchin rroanha na Ndodana, jamé janha rrorroanha jaha ra cai.
22Cottimeja Jesús vanottetaon na co ndac̈ho ngain na:
―Dayehe ra Espíritu Santo. 23Cain chojni que jaha ra sinchetjañehe ra tti jianha que jehe joinchehe, jamé ndasitjañehe ixin cai Dios ndasinchetjañehe chojni mé; co cain chojni que jaha ra sinchetjañeha ra, jamé ẍa sitjañeha chojni mé ni de ngain Dios.
Tomás vicon ixin Jesús dixechon
24Pero Tomás, mé ná de tti tteyó chojni que vacao Jesús, tti vancheguinhi na Xancoata, jehe mé coha ngain na are cjoi Jesús. 25Pero tti icanxin chojni que vacao Jesús ndac̈ho na ngain:
―Janha na vicon na Jesús.
Pero jehe Tomás ndac̈ho ngain na:
―Si siconha janha ngá rá tti joidoho clavo, co rroẍanxinha dedona nttiha, co rroẍanxinha rana ngain nttanttacoin, janha c̈hoha sitticanho.
26Vatto jni nchanho de mé co cain chojni que vacao Jesús cjan na ngain nchia iná, co are mé nttiha vehe Tomás ngain na cai. Co masqui cain puerta tatejé jian, Jesús joixinhi, joiguehe ngayé na co joanjo joajna ngain na co ndac̈ho:
―Dayehe ra tti c̈hjoin que tsonohe ansean ra.
27Cottimeja ndac̈ho ngain Tomás:
―Tsjenxin rana, co ẍanxinhi dedoa nttihi; co ẍanxinhi rá ngain nttanttacoin na. Iẍaxaonha ixin ndoaha, pero ditticaon nganji na.
28Cottimeja Tomás ndac̈ho:
―¡Soixin tti chonda cain joachaxin, co soixin tti Dios de janha!
29Jesús ndac̈ho ngain:
―Tomás, janché ditticaon ixin vicon na. Icha c̈hjoin vidé tti chojni que diconha na janha co masqui jamé jehe na ditticaon na.
Quedonda Juan dicjin libro jihi
30Jesús joinchehe anto tsje señal que vicon chojni que vacao jehe, pero cainxinha señal mé jitaxin ngain libro jihi. 31Pero cain jihi jitaxin para que jaha ra sitticaon ra que Jesús mé tti Cristo que Dios rroanha, co jehe mé Xenhe Dios, co para que rrochonda ra iná vida naroaxin que ẍonhi tiempo tsjexin are sitticaon ra jehe.
Currently Selected:
SAN JUAN 20: plsNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.