SAN JUAN 13
13
Jesús joinchetsinda rotté cain chojni que vacao
1Ná nchanho saho de tti quiai dinhi pascua Jesús ovenohe que ojitonchian tiempo que jehe satsjixin de ngataha nontte nttihi co satsji para ngain Ndodé. Jehe cainxin tiempo joinao chojní jehe nttihi ngataha nontte, co nchanho mé jehe cjoagoe na que jehe anto rinao na.
2-4Inchínji joincheẍaxaon Judas Iscariote, xitsihi ná tti vinhi Simón, para que jehe ẍaxaon queẍén sinchehe para sicjagoe chojni que ningaconhe Jesús ttinó jí Jesús para rrotse na. Jesús ovenohe que jehe joixin de ngain Dios, co ixin rrocjan satsji ngain Dios iná, co venohe que jehe Ndodé joanjo Ndo cainxin joachaxin; mexinxin are tejine na, Jesús vingattjen de ngain mesa, co joantsje lonttoe jingá, tti lontto jidattexin co coiaxin nttachajnoe conixin ná toalla. 5Cottimeja coequia jinda ná chiavandejachjan co coexinhi joinchetsinda rotté cain chojni que vacao jehe, co joinchexemanxin rotté na conixin tti toalla que jidicaoxin ngain nttachajnoe.
6Co are jehe coexinhi joinchetsinda rotté Simón Pedro, jehe jihi ndac̈ho:
―¿Asoixin sinchetsinda rottena?
7Jesús ndac̈ho:
―Jai jaha ttinxinha tti rrinttaha janha, pero después jaha tsinxin.
8Pero Pedro ndac̈ho ngain:
―Janha ẍonhi tiempo rrochjaha joachaxin para sinchetsinda rottena.
Jesús ndac̈ho ngain:
―Si janha sinttatsindaha rottea, jaha jeha chojnina.
9Simón Pedro ndac̈ho:
―Jeoha rottena sinchetsinda na remé; cai sinchetsinda rana co jana.
10Pero Jesús ndac̈ho ngain:
―Tti chojni que nandá ditsinda irrogondaha rrotsinda icha, jeho rotté ixin ngoixin cuerpoe oroa. Jaha ra oroa ansean ra masqui jeha cainxin ra.
11Jehe ndac̈ho: “Jeha cainxin ra roa ra”, ixin jehe ovenohe quexehe tti rrondache chojni queẍén para rrotse na Jesús.
12Are joexin joinchetsinda rotté cain na, jehe cjan vengá lonttoe, tti lontto jidattexin, co tavehe ngain mesa iná co ndac̈ho ngain na:
―¿Attinxin jaha ra tti jointtaha janha nganji ra? 13Jaha ra ncheguinhi ni ra janha Maestro co tti chonda cain joachaxin para ixin jaha ra, co nchao ndac̈ho ra jañá ixin janha ndoa jañá na. 14Janha Maestro na co chonda joachaxin para ixin jaha ra, pero masqui jamé janha jointtatsinda rottea ra, mexinxin cai jaha ra ẍaxaonha ra ixin anto importante ra; chonda ra que sinchetsindehe chó rottea ra naná ra. 15Janha jointtaha jihi para chjaha jaha ra ná ejemplo para que jaha ra sinchehe ra ẍajeho tti janha jointtaha. 16Janha rrindattjo ra ndoa que ni ná tti nchehe ẍa c̈hoha rrochonda icha joachaxin que xinajní, co ni ná tti dicao ná joajna c̈hoha rrochonda icha joachaxin que jehe tti rroanha joajna mé. 17Si ttinxin ra cosa jihi, co jañá sinchehe ra, jaha ra atto c̈hjoin sintte ra.
18’Janha rrinichjaha de cainxin jaha ra ixin janha nona quecá ra ẍo coinchiaha ra. Pero chonda que tsonhe inchin jitaxin Palabré Dios: “Tti chojni que jinequinha, mé tti rroningaconna.” 19Janha ndattjo jaha ra jihi jai para que are siconhe, jaha ra sitticaon ni ra janha que janha ndoa tti Cristo na inchin ndac̈hjan. 20Janha rrindattjo ra ndoa que tti chojni que sayé quexeho chojni que janha rrorroanha, cai chojni mé sayé na janha; co tti chojni que sayé na janha, cai sayé na tti rroanha na.
Jesús ndac̈ho ixin Judas tsjago queẍén rrotse na Jesús
(Mt. 26.20‑25; Mr. 14.17‑21; Lc. 22.21‑23)
21Are joexin ndac̈ho Jesús jihi, jehe conohe ngain ansén ná joachjaon anto soji, co ndac̈ho claro:
―Janha rrindattjo ra ndoa que ná de jaha ra tti rrondache chojni queẍén para rrotse na na janha.
22Cottimeja cain chojni que vacao Jesús coexinhi na tsjehe chó na pero noeha na quexehe de jehe na tti ndac̈ho Jesús. 23Ná de tti tteyó chojni que vacao Jesús, tti Jesús anto joinao, jehe mé tajine ngaca Jesús, 24co Simón Pedro joinchehe seña ngain mé para que jehe mé sanchiangui ngain Jesús de ixin quensen tti ndac̈ho Jesús. 25Cottimeja jehe mé icha conchienhe ngain Jesús para joanchiangui co ndac̈ho:
―Ndachjenji na soixin quensen mé.
26Jesús ndac̈ho:
―Janha sinttatjao rioho niottja, co tti rrochjaha nio, jehe mé.
Jamé, joinchetjao rioho niottja co joanjo nio ngain Judas Iscariote, tti xitsihi ná tti vinhi Simón. 27Co are vayé Judas niottja mé, inchínji joixinhi ngain ansén. Cottimeja Jesús ndac̈ho ngain:
―Tti sinchehe, jaicoa nchehe.
28Pero ni ná de tti nitejine ngain mesa nttiha coinxinha na ixin quedonda ndac̈ho Jesús yá ngain Judas. 29Judas tti vehe tesoreroe tti chojni que vacao Jesús, mexinxin canxion na ẍaxaon na que Jesús ndache yá para que Judas rroquehna c̈hoan cosa que rrogonda para ngain quiai, o rroganjo nchin tomi ngain chojni noa. 30Are joexin vayé Judas niottja mé, jehe vac̈hjexin de nttiha. Co rato mé ottie.
Cosa naroaxin que Jesús coetonha
31Are Judas ovac̈hje, Jesús ndac̈ho:
―Jai rroẍago tti joachaxin que chonda janha, tti Xí que joixin de ngajni, co joachaxín Dios rroẍagoxin de nganji na, 32ixin si janha, tti Xí que joixin de ngajni, tjago joachaxín Dios, cai Dios tsjago que janha chonda joachaxin, co jehe otoin sinchehe. 33Jaha ra inchin xannchinnchinchjanhna co janha ndattjo ra ixin isariha tsje tiempo nganji ra. Jaha ra tsjé ni ra, pero ẍajeho inchin ndattjan chojni judío rrondattjo jaha ra jai: Jaha ra c̈hoha tsji ra tti satsji janha. 34Janha rrittetonha jaha ra ná cosa naroaxin jihi: rinao chó ra. Janhi inchin janha rinaho jaha ra, jaha ra chonda ra que sinao chó ra. 35Si sinao chó ra, cainxin chojni ngoixin nontte tsonohe na que jaha ra ndoa ditticaon ni ra janha.
Jesús ndac̈ho que Pedro rrondac̈ho ixin jehe chonxinha Jesús
(Mt. 26.31‑35; Mr. 14.27‑31; Lc. 22.31‑34)
36Simón Pedro joanchianguihi Jesús co ndac̈ho:
―¿Quettinó satsji soixin?
Co Jesús ndac̈ho ngain:
―Tti janha satsji, jaha ic̈hoha rrorroehna jai, pero rrorroehna después.
37Cottimeja ndac̈ho Pedro ngain:
―¿Quedonda c̈hoha rrorroaha soixin jai? Janha nchao sanjo vidana para ixin soixin.
38Jesús ndac̈ho ngain:
―¿Aco ndoa jaha sanjo vidá para ixin janha? Janha rrindattjo ndoa que saho de rrotsje conttaxichia, jaha orrondac̈ho ninxin nttiha que chonxinha na janha.
Currently Selected:
SAN JUAN 13: plsNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.