Mörcos 1
1
Xohuö Bautista tlanunutzaya
1Ejqueyi opie cuale tlamachestelestle de Jesucristo, tieConietzi Deus. 2Pos tlajcuelulpanca ipan ömatl tli oquejcuelo inu tlayulepante Isaías:
Xequejta. Naja nectitlanes notlatitlantle
ma cachto beya que taja para ma quixmana moojfe.
3Caquestec tlajtule de yeca tli tzajtzec ompa cöne nionöque chönte,
hua quejtoöya: “Xecyejyectlölicö tieojfe Tlöcatzintle.
Xecmelöhuacö tieojfe, pues ye miero axihuaqui”.
4Xohuö tlacuötiequiöya ipa locör cöne nionöque chönteya. Tlanunutzaya nele tlö giente moyulcuepasque para ma Deus ma quentlapojpolfelicö intlajtlacul yaja cuale quencuötiequis. 5Noche tlöca de estado de Judea hua noche de ciudad de Jerusalén quisaya ca itlac yaja. Mocuötiequiöya ca yaja ipan ötlactle itucö Jordán. Moyulcuitiöya ca Deus de intlajtlacul. 6Pos Xohuö motlaquentiöya ca tzotzomajtle de itojmeyo camello, hua ca sente cuetlaxpöxajtle ca motlajcoilpiöya. Quecuöya chapolte hua nectle de cormienajte de caltienco. 7Tlanunutzaya hua quejtoöya:
―Biloatz ocsie tlöcatl sötiepa de naja öque cache quepealo meyac checöhualestle que naja. Amo necmeresieroa nion para nopiechus para netiequextelis tiecacua. 8Naja de melöhuac onemiechcuötieque ca ötzintle, pero yejuatzi nemiechcuötiequisque ca Espíritu Sönto.
Xohuö Bautista tiecuötieque Jesús
9Omochi ipa niecate tunalte que Jesús hualiloac de puieblo itucö Nazaret de estado de Galilea, hua Xohuö tiecuötieque ipa ötlactle Jordán. 10Cuöc oquixoac de ötzintle, sa nima oquejtaque quiene ca hualmotlapo elfecac, hua quiene ca otemoac Espíritu de Deus quiename palumax tiepa yejuatzi. 11Pos ohuöla sente tlajtule de elfecac:
―Taja tenotlasojcöConie. Ica taja necpea meyac pöquelestle.
Amo Cuale Tlöcatl tieyulmajmötocac Jesús
12Nima Espíritu de Deus tiechihualtiluc ma biloa ipa locör cöne nionöque chönteya. 13Ompa iloaya cuarenta días ipa inu locör, hua tieyulmajmötocaya Satanás. Pos ompa iloaya inca yulcöme tiecuöneme, hua öngeles tietequepanoöya.
Jesús quepiehualtejque tequetihuaya ipa Galilea
14Cuöc ye oquetzajtzajque Xohuö, Jesús hualiloac ipa estado de Galilea. Hualtlanunutzalutöya de cuale tlamachestelestle tli tiechelfea de Deus. 15Oquejtojque:
―Ye aseco tunalte para Deus tlamandörurus nemotlac. Xomoyulcuepacö hua xomoneltocacö ica cuale tlamachestelestle.
Jesús quennutzque nöbe pescadurte
16Nejnemoöya Jesús itlac ötiescatl de Galilea. Oquejtaque Semu hua icni itucö Andrés quetlajcaleya tarröya ijtec ötzintle, pos yejua oyejyeya pescadurte. 17Pos oquemelfejque Jesús:
―Xeniechtocacö hua nemiechchihualtis nenyesque nenpescadurte de tlöca.
18Pos sa nima quecöjtiejque intarröya hua tietocaque.
19Opanoac tepetzi cache ca niepa. Oquejtaque Jacobo, iconie de Zebedeo, hua Xohuö, icni de Jacobo. Nuyejque yejua oyejyeya ipa börco queyejyectlöliöya intarröya ye tlajtlatzcotu. 20Pos nima quennutzque. Entunses yejua cualcöjtiejque intajtzi Zebedeo ipa börco ca tiehua tequetque hua tietocaque.
Sente tlöcatl quepeaya moxicoöne
21Ocajcalacoac ipa puieblo de Capernaum. Cuöquenu yejuatzi ocalacoac ipa teopanconetzi ipan söbron tunale cuöc mosiebea joriojte. Ompa tlamachtiloöya. 22Pos giente quetietzöbejtaya quiene ca tlamachtiloöya porque quenmachtiloöya ca checöhualestle hua amo quiename yejua tlamachtiöneme de teotlajtule tlamachtiöya. 23Pero oyeya ipa teopanconetzi sente tlöcatl tli ijtecopa quepeaya moxicoöne. Ini nönca otzajtzec. 24Oquejto:
―¡Ay! ¿Tli tecpea ca tejua, Jesús de puieblo de Nazaret? ¿Ye tehuöla tetiechxexetunico? Necmate öquenu taja; taja tetietlöcayectec de Deus.
25Pero Jesús cajajuaque. Oquelfejque:
―Xectzacua mocamac hua xequisa de ijtecopa yaja.
26Pos inu moxicoöne quechihualte tlöcatl ma mimeque. Otzajtzec checöhuac, hua oquis de yaja. 27Pos innochtie quetietzöbejque. Motlajtlaniöya sente ca ocsente. Quejtoöya:
―¿Tlininiji? Pos ica sente yancuec tlamachtelestle tli quepea meyac checöhualestle. Pos hasta moxicoöneme yaja quennahuatea hua yejua queneltoca.
28Sa nima ca nobeyo quecajque giente ipa noche estado de Galilea lo que tli oquechijque Jesús.
Jesús quepajtejque imontiesyo de Piero
29Oquejquixoac de ipan teopanconetzi. Obejbiloac ca inchö Semu hua Andrés. Ajaxihuato ca tiehua Jacobo hua Xohuö. 30Pos imontiesyo Semu betztotaya. Quepeaya totunealestle. Pos nima yejua tienunutzque de imontiesyo. 31Entunses axihuato yejuatzi. Ocönque ca imö hua cajcojque. Pos ayecmo quepeaya totunealestle, hua tieintlamacaya.
Jesús quenpajtejque meyactie cocoxcötzetzi
32Ye ixtlayohua oyeya. Hua san tequetl ocalac tunale, quenhualecaque tietlac noche tli mocojcocoöya, hua tli quepejpeaya demunios. 33Pos noche puieblo mosentlölejque ipan queyöhuatientle. 34Yejuatzi quenpajtejque meyactie tli mocojcocoöya de sösantle cocolestle. Quenquextejque meyactie demunios. Amo quencöjque demunios ma quejtucö canajyetla porque ye tieixomatque.
Jesús tlanunutzalutenemeya ca nobeyo pa estado de Galilea
35Lalebes cualco ca ise oneyehualuc, oc tlajtlayohua. Oquixoac hua obiloac ipan locör cöne nionöque chönteya. Ompa netlötlajtiluc. 36Cuöquenu tietiemojtenemeya Semu, ca noche tli oyejyeya ca yaja. 37Cuöc tieniextejque, otieyelfe:
―Noche giente metzmotiemolejteneme.
38Pos quemelfejque:
―Cache cuale teyabe ca niecate puieblos para nuyejque ompa netlanunutzas. Ipampaji nehuöla.
39Entunses hualtlanunutzalutöya ipa teopancucone de noche estado de Galilea, hua cualenquextilutöya demunios.
Jesús quepajtejque sente tlöcatl sa söhuayo
40Sente tlöcatl sa söhuayo ohuöla tietlac Jesús, tietlötlajtico. Motlancuöquetz hua otieyelfe:
―Mach tomonequitis cuale teniechmopajtelis.
41Pos tieyulcoco Jesús. Omösohualuc hua quemötocaque. Oquelfejque:
―Necneque. Xepajte.
42Cuöc oquejtojque inu, pos inu cocolestle de söhuame sa nima oquecö hua yaja opajtec. 43Yecuöquenu quenahuatejque ca meyac checöhualestle, hua nima quelfejque ma beya. 44Oquelfejque:
―Xequejta. Amo öque tli xequelfe, tlöcamo xebeya xomotieijtete ica teopexque. Ye techepöhuac. Xejcuetlabilte lo que tli Moisés otlanahuate, para ma quematecö yejua lo que tli omochi ca taja.
45Pero yaja oquis hua opie tlapoa lalebes. Ca nobeyo quepoaya noche tli omochi. Pos yaja ica Jesús abele calacoaya ixmantete ipa puieblo tlöcamo iloaya ipa inu locör cöne nionöque chönteya. Pero giente de ca nobeyo huölöya tieca.
Currently Selected:
Mörcos 1: nhg
Highlight
Share
Copy
Want to have your highlights saved across all your devices? Sign up or sign in
© 1980, Wycliffe Bible Translators, Inc. All rights reserved