YouVersion Logo
Search Icon

Luke 20

20
How Jesus Get Da Right Fo Do Wat He Do
(Matthew 21:23-27; Mark 11:27-33)
1One time Jesus go inside da open lanai fo da Temple, an teach da peopo da Good Stuff From God. Da Main Pries guys, da teachas dat teach da Rules From God, an da older leadas fo da peopo go by him. 2Dey tell um, “Wat right you get fo do dis kine stuff? Who tell you can do um?”
3Jesus tell um, “I like aks you guys one question too. 4John Da Baptiza, wen he wen baptize da peopo, wea he get da right fo do dat? God in da sky, he give um da right? O da peopo, dey give um da right?”
5Da Main Pries dem start fo squawk wit each odda bout dat, an tell, “If we tell, ‘Was God in da sky wen give John da right,’ den Jesus goin tell, ‘How come you guys neva stay shua az fo real kine wat John tell, den?’ 6But if us tell, ‘Da peopo give um da right,’ den all da peopo goin throw stones fo kill us, cuz dey figga fo shua dat John wen talk fo God.” 7So da Main Pries dem tell, “We donno wea John wen get da right fo baptize.”
8Jesus tell um, “Kay den, I no goin tell you guys from wea I get da right fo do dis kine stuff.”
Da Guys Dat Work Inside Da Grape Farm
(Matthew 21:33-46; Mark 12:1-12)
9 # Isa 5:1 Jesus tell da peopo anodda story fo teach um. He tell, “One guy wen plant grapes inside one grape farm, an he rent um to some farma guys. Den he go way long time. 10Wen da time come fo harves da grapes, he sen one worka guy by da guys dat rent his farm, fo dem give him some grapes. But da guys dat rent da farm bus up da worka guy an sen um away wit notting. 11He sen anodda worka guy, an dey bus him up too, an dey no shame fo make any kine to him, an sen um away wit notting. 12Den he sen anodda guy. Dey bus him up an make um bleed, an throw um outside. 13Den da boss fo da grape farm tell, ‘Wat I goin do? Eh, I know wat! I goin sen my ony boy, da one I love. Fo shua, dey goin show respeck fo him!’ 14But wen da guys dat rent da farm spock him, dey tell each odda, ‘Eh, dis da owna boy. He da guy goin own da farm bumbye. Go come, we go kill him. Den eryting he get goin come ouas!’ 15So dey throw him outside da grape farm an kill um.”
Den Jesus tell, “Wat you guys figga da guy dat own da grape farm goin do to da guys dat rent da farm? 16Fo shua he goin come wipe um out, an rent da grape farm to odda guys.”
Wen da peopo hear dat, dey tell, “Nah! Fo shua no goin happen lidat!”
17 # Songs 118:22 Jesus look dem in da eye an tell, “Den wat dis mean inside da Bible dat tell,
“ ‘Had one big stone,
Da builda guys neva like use um,
An dey tell dis rock, no good!
But dat stone,
Dass da corna block
Dat make da building strong.’
18“Anybody dat trip an fall down on top dat stone, da stone goin broke dem. If dat stone fall down on top somebody, dat stone goin make um jalike dus. An dat stone, dass me!”
Pay Da Tax
(Matthew 22:15-22; Mark 12:13-17)
19Da teachas dat teach da Rules From God an da Main Pries guys like sen da police guys fo bus Jesus right den an dea, cuz dey know dat he tell dat story fo teach bout dem. But dey sked da peopo. 20So dey look fo da right time fo do um. Dey sen some secret guys fo watch him. Dem guys wen ack jalike dey good guys. Dey like trick Jesus wit wat he tell, fo dem bus him an turn him ova to da leada guys an to da govna, da one dat get da powa. 21Az why da guys dat stay watch him tell him, “Eh, Teacha, we know dat you talk fo real kine an wat you tell an teach stay true. You do da same to erybody, an you teach God way fo real kine. 22So, wat? We still gotta pay tax to Cesar, da king fo da Rome peopo, o wat?”
23Jesus know dey smart an trying fo trick him, so he tell um, 24“Show me one coin. Who dis guy on top da coin? An wass his name?”
25Dey tell, “Dass King Cesar.”
Jesus tell, “Kay den, give um to Cesar wat his, an give to God wat his!”
26Dey no can trick him wit wat he tell in front da peopo. Wat he tell blow dea mind, an dey no can say notting.
Da Saducee Guys Aks If Peopo Goin Come Back Alive One Mo Time
(Matthew 22:23-33; Mark 12:18-27)
27 # JGuys 23:8 Get Sadducee guys dat tell nobody can come back alive afta dey mahke. Some a dem Sadducee guys wen come by Jesus an go aks him, 28#Rules2 25:5“Eh, Teacha, Moses wen write fo us inside da Bible, dat if one guy braddah mahke an his widow stay, but no mo kids, da mahke guy braddah gotta marry da widow fo get kids fo his braddah. 29Kay den, had seven braddahs. Da firs braddah wen marry one wahine an den mahke, an no mo kids. 30Da numba two braddah marry da firs braddah widow, den he mahke, an no mo kids. 31An da numba three braddah same ting, an da oddas too, an no mo kids. 32Den afta dat, da wahine mahke too. 33So, dey all wen marry her. Bumbye, wen da time come wen all da peopo dat wen mahke goin come back alive, dat time, who goin be her husban?” 34Jesus tell um, “Da peopo in dis time marry an give dea girls fo marry. 35But God tell some peopo get um right wit him. Dey da ones, he goin make um come back alive inside da nex world, an give um da kine life dat goin stay to da max foeva! Dat time dem guys no goin marry o give dea girls fo marry. 36Dat time dey no can mahke, but dey goin stay jalike da angel guys. Cuz dey God kids, an dey goin come back alive. 37#Outa 3:6Now, long time befo time, wen Moses wen spock one bush dat stay burn, he wen talk to God ova dea. Moses wen use dis name fo Da One In Charge Up Dea Inside Da Sky—he call um ‘Da God fo Abraham, Isaac, an Jacob.’ Dass how Moses wen show proof dat da mahke peopo goin come back alive. 38Cuz God not da God fo da mahke peopo, but fo da peopo dat stay alive. Cuz erybody dat stay tight wit God, dey alive!”
39Some teachas dat teach da Rules From God tell, “Dass good wat you tell, Teacha!” 40An nobody aks him fo mo stuff no moa.
Da Spesho Guy God Sen
(Matthew 22:41-46; Mark 12:35-37; Songs 110:1)
41Jesus tell da teachas dat teach da Rules From God, “How come dey tell dat da Spesho Guy God Sen, he David boy? 42#Songs 110:1Cuz David, he tell dis inside da Songs Fo God Book:
“ ‘Da One In Charge Up Dea Inside Da Sky,
He tell Da One In Charge a me,
“Go come ova hea, sit down!
Dis da importan place by my right side.
43Bumbye I goin make da peopo dat go agains you
Go down in front you,
Fo show dat you da winna ova dem.” ’
44“Kay den, David call him ‘Da One In Charge a me,’ aah? Den how come dat guy can be David boy, same time?”
Jesus Tell Um Bout Da Teachas Dat Teach Da Rules From God
(Matthew 23:1-36; Mark 12:38-40; Luke 11:37-54)
45Da peopo stay lissen Jesus, an he tell his guys, 46“Watch out fo da teacha guys dat teach da Rules From God. Dey like go aroun an wear fancy kine religious kine clotheses. Dey like da peopo fo talk to dem wit respeck inside da open market. Dey like sit in da main place inside da Jew churches, an da main place at da luaus. 47But dey no shame fo rip off da widows an take away dea house. Same time dey make one big show an pray long time, ony fo make peopo tink dey do good kine stuff fo dem. Dese kine peopo, dey goin get it mo worse from God da Judge wen da time come!”

Currently Selected:

Luke 20: HPB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy