YouVersion Logo
Search Icon

Filemón 1

1
Pablo chzoje' carten'
1Neda' Pablo dia' ḻižya nga da' chyix̱jue'eda' xtiža' Cristo Jesúsen'. Chzoja' le' Filemón, na' txen len beṉe' ḻježcho Timoteon' chguapto' le' tiox. Chaqueto' le' da' naccho txen choncho xšin Diosen'. 2Na' ḻecze chguapto' tiox beṉe' ca' chesedop chesežague' chesonxene' Jesucriston' ližo'. Na' le' Apia, naco' ca beṉe' zanto', na' le' Arquipo, chono' neto' txen choncho xšin Diosen', ḻecze chguapto' le'e tiox. 3Chṉabeto' X̱acho Diosen' na' X̱ancho Jesucriston' yesaclenšque' le'e na' yesone' cont soa cuezle binḻo len xbab c̱helen'.
Filemónṉa' chejnilaže' Jesucriston' na' chacde' beṉe' ḻježe'
4Na' le' Filemón, yogo' ṉi'a cate' chjayze'eda' le' šlac choḻ güiža' Diosen', choa' yeḻa' chox̱clen c̱he' can' ba chono'. 5Ba benda' diža' can' chejnilažo' X̱ancho Jesucriston' na' can' chacdo' ḻježcho beṉe' ḻecze chesejnilaže' Jesucriston'. 6Na' chṉaba' gaclen Diosen' beṉe' ca' ba gosejnilaže' Jesucriston' lagüe be'leno' ḻegaque' diža' can' chejnilažo'ne'. Chṉaba' gaclene' ḻegaque' cont yesacbe'ede' yogo' da' güen juisyw da' chon Diosen' ḻo' yic̱hjlaždao' chio' chejnilaže'chone'. 7Beṉe' migw, ḻeca chbeda' na' chac c̱hac̱h laža' ṉezda' chacchgüedo' beṉe' ḻježcho ca' chesejnilaže' Jesucriston', ḻe chacleno' ḻegaque' cont ṉita'che' mbalaz.
Gwṉabe' yezi'xen Filemónṉa' c̱he Onésimo
8-9Dan' chacdo' Criston' na' chacdo' beṉe' ḻježo' ca', da'nan' chṉeyoeda' le' gono' to da' chaclaža' gono'. Da' naca' postlw c̱he Criston' guac gona' byen gono' da' gwžia' bia' gono' šaca' žan gwc̱hina' yeḻa' chnabia' da' yo'o ḻo na'. Perw bi žan gona' ca'. Neda' Pablo ba naca' beṉe' gole na' ḻecze ṉa'a ba dia' ḻižya nga da' chyix̱jue'eda' xtiža' Jesucriston'. 10Na' chṉaba' goclen laguon' par Onésimo ben' ba nona' ca xi'iṉa'. Ḻe šlac dia' ḻižya nga bsed blo'eda'ne' cont chejnilaže' Jesucriston'.
11Cana' bi goque' mos güen c̱hio', san ṉa'a ba naque' mos güen c̱hio' na' ḻecze ca' c̱hia' neda'. 12Ba chezseḻa'ne' laguo', na' chṉeyoeda' le' yolebo'ne' na' yezi'xeno' c̱he', ḻe ḻeca chacda'ne'. 13Zelaža' yega'aṉlene' neda' cont gaclene' neda', gone' da' cheyaḻa' gono' šlac dia' ḻižya nga da' chyix̱jue'eda' xtiža' Jesucriston'. 14Perw bi chaclaža' ṉabda'ne' bi gone', ḻe naquen c̱hio' le' ṉao' nac gone', cont do lažo' gono' bi da' güen da' gono' na' gague gonc̱hi'on. 15Diosen' be'e latje beza' Onésimon' ližon' šlož cont soale txen toḻi tocaṉe. 16Na' ṉa'a bich naque' mos c̱hio' na'ze san naque' ca beṉe' bišo' da' naque' txen len chio' chejnilaže'cho X̱ancho Jesucriston'. Ḻeca chacda'ne', na' le' cheyaḻa' gacchdo'ne', gague con ca chacdo' note'teze beṉac̱h, san can' chacdo' beṉe' ḻježo' chesejnilaže' X̱anchon'.
17Da'nan' še da' ḻi naccho txen chejnilaže'cho Jesucriston', yolebo'ne' cacze chlebo' neda' cate' chedeṉa'a le'e. 18Na' še bi da' mal bende' le' o še bi da' chaḻe' c̱hio', neda' c̱hixjuan'. 19Cuincza' neda' Pablo chzoja' da' nga, neda' c̱hixjua' bi da' chaḻe'. Na' bibi chnia' c̱he da' chaḻo' le' c̱hia' neda' da' ba de yeḻa' mban c̱hio' toḻi tocaṉe. 20Beṉe' migw, da' chaquecho X̱ancho Jesucriston' chaclaža' gono' dan' chṉaba' nga ca to goclen c̱hia'. Benšca ca soa' mbalaz, ḻe naccho txen len Criston'.
21Zoa' lez gwzenago' c̱hia' na' goncho' güen clel ca dan' žia' le', da'nan' chzoja' le'. 22Na' yeto da' chṉaba', chaclaža' yedesoa' ližon' cate' yida' gan' zoalen'. Ḻe zoa' lez yob gac yedyeṉa'a le'e can' chṉable lao Diosen' cate' choḻ güižlene'.
Beṉe' ca' nita' len Pablon' chosoguape' Filemónṉa' tiox
23Epafras die' ḻižya nga txen len neda' da' chyix̱jue'ede' xtiža' Cristo Jesúsen'. Na' ḻe' chguape' le'e tiox. 24Na' ḻecz ca' beṉe' ca' chesaclene' neda' len xšin Diosen' nga, Marcos, na' Aristarco, na' Demas, na' Lucas, chosoguape' le'e tiox.
25X̱ancho Jesucriston' soašque' len le' gaclenšcacze' le'. Da' na'zen' chzoja'.

Currently Selected:

Filemón 1: zpq

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy