Efesios 1
1
GuelrgahpaDxiohs
1Naꞌh Pahblu, naan tuhbi pooxtla xteenn Jesucristu laasii ziꞌchi xclaaꞌdzi Dxiohs gaca. Pwihsi cagacaꞌhn dxihtsi riiꞌ loh tu bwiinn Efesu raꞌ nin baguyuuꞌ-guyaꞌzi guelriachiistoꞌ xchiꞌdxyi Jesucristu, neezaa loh raꞌ nin ruhnn ziga paꞌhca xclaaꞌdzi Ñiꞌh gaca. 2Gulguicaꞌha guelrahcanee cun guelrbwihdxyii stoꞌ xteenn Xtaada Dxiohs nuꞌh cun nee xteenn Daada Jesucristu.
Ruluuꞌyi Pahblu xcweenta guelrzaꞌcazii nin batiꞌdxiloh Jesucristu pur laꞌhnuꞌh
3Pwihsi gachiñiꞌzaꞌca nuꞌh lah Daada Dxiohs nin naa Xtaada Daada Jesucristu, nee ziga naa nuꞌh tuhsi cun Jesucristu nin nuu llaaꞌndxibaaꞌ niꞌchin nezchi riinloh garaaloh guelruhntaaꞌyi nin rahcanee Ñiꞌh laꞌhnuꞌh. 4Dxiohs gulii Ñiꞌh laꞌhnuꞌh pur xcweenta Jesucristu galohyi chin nagahdxi cwachixchih Dxiohs guidxyiyuh tin ziꞌchi loh si Ñiꞌh chuu nuꞌh guidiꞌhnn nuꞌh xtsiꞌn Ñiꞌh cun guelnayaa lastoꞌ xteenn nuꞌh nee laꞌh si Ñiꞌh gacaꞌhstoꞌ nuꞌh. 5Nee gucaꞌha Ñiꞌh laꞌhnuꞌh tin gaca nuꞌh ziga lliiꞌn dziꞌtsi paꞌca Ñiꞌh pur xcweenta Jesucristu, laasii ziꞌchi bwiꞌhnn Ñiꞌh lligaaba pur nin bayuuꞌn stoꞌ Ñiꞌh laꞌhnuꞌh. 6Pwihsi pur niꞌchin rachiñiꞌzaꞌca nuꞌh lah Dxiohs garaa dxyih pur ziga bayuuꞌn stoꞌ Ñiꞌh laꞌhnuꞌh, ya bwiꞌhnntaaꞌyi Ñiꞌh laꞌhnuꞌh pur nin naa nuꞌh tuhsi cun Lliiꞌn Ñiꞌh nin nadziiꞌhi Ñiꞌh. 7Ya ziga taantu nin guhca nadziiꞌhi Dxiohs laꞌhnuꞌh, baldaꞌh Ñiꞌh laꞌhnuꞌh loh duhlda pur xcweenta rihn nin guxiꞌhi Lliiꞌn Ñiꞌh. 8Dxiohs cagaluuꞌyi Ñiꞌh balaaca chiꞌh nin nadziiꞌhi Ñiꞌh laꞌhnuꞌh ziga caganiꞌhi Ñiꞌh guelnasiin cun guelrahcabwaꞌ laꞌhnuꞌh, 9nee cagaluuꞌyi za Ñiꞌh laꞌhnuꞌh dxyiꞌdxyi raꞌ nin nuugulaꞌn Ñiꞌh loh xigaaba Ñiꞌh nin ayi bwiꞌhnn Ñiꞌh para ñaꞌzidxiahga raꞌ bwiinn dez galohyi laasii bwiꞌhnn Ñiꞌh lligaaba nahpa guluuꞌyiloh dziꞌn raꞌ chi pur xcweenta Jesucristu, 10per nahpa zadzihn dxyih nin soobaa gariaꞌcaa gaca ziga lligaaba nin bwiꞌhnn Dxiohs, ya loh dxyih chi zutiaaꞌha Dxiohs garaatiiꞌ raꞌ cohsa nin nuu nez dxibaaꞌ cun nin rii loh guidxyiyuh tin gutiꞌdxi Ñiꞌh laꞌh raꞌn nezloh naa Jesucristu tin ziꞌchi guinabwaꞌ Jesucristu laꞌh raꞌn.
11Dxiohs rahca ruhnn Ñiꞌh xichiꞌhzi niꞌchin ayi guinagahn guunn Ñiꞌh ninchiꞌhzi nin guiclaaꞌdzi Ñiꞌh naa bwen guunn Ñiꞌh; gulii Ñiꞌh laꞌhnuꞌh tin naa nuꞌh tuhsi cun Jesucristu tin gachicaꞌha nuꞌh hereensi nin bwiꞌhnn Dxiohs lligaaba guniꞌhi Ñiꞌh laꞌhnuꞌh. 12Bwiꞌhnn Ñiꞌh bariaꞌcaa guhca squiiꞌ tin guiñiꞌzaꞌca raꞌ bwiinn ziga naa lah Ñiꞌh cun xquelrnabwaꞌ Ñiꞌh pur nin gwaꞌha raꞌ ba xa nazaꞌca naa Dxiohs cun laꞌhnuꞌh nin naa bwiinn raꞌ nin mwerdoꞌtiiꞌ gwachiistoꞌ raꞌñiꞌh xchiꞌdxyi Jesucristu. 13Ziꞌchiza laꞌh tu chin bihn tu dxyiꞌdxyi nin naa guchii, dxyiꞌdxyi nin rutaꞌh laꞌh bwiinn loh duhlda, ya ziꞌchi gwachiistoꞌ tu laꞌh Jesucristu cun guhcaza tu tuhsi cun laꞌh Ñiꞌh. Ya niꞌchin gucah tu bwaꞌ xteenn Spíritu Saantu xteenn Dxiohs laꞌn lastoꞌ tu nin biaꞌhan dxyiꞌdxyi Ñiꞌh gucaꞌha tu. 14Dxiohs baniꞌhi Ñiꞌh Spíritu Saantu xteenn Ñiꞌh lastoꞌ raꞌ nuꞌh tin guiduꞌhun guchiiza gachicaꞌha nuꞌh hereensi nin gudiꞌhi Dxiohs guicaꞌha raꞌ xpwiinn Ñiꞌh chin guzaꞌloh Ñiꞌh xtsiꞌn Ñiꞌh, ya squiiꞌ naa ziga gazaaꞌ ziga gutaꞌh Ñiꞌh laꞌh garaa raꞌ nin bacaꞌbwaꞌ Ñiꞌh gaca xpwiinn Ñiꞌh, tin guiñiꞌzaꞌca raꞌ ba lah Ñiꞌh cun xquelrnabwaꞌ Ñiꞌh.
Rbwihdxyi-rnaaba Pahblu loh Dxiohs tin guziaꞌñih Ñiꞌh loh xigaaba bwiinn raꞌ nin gwachiistoꞌ raꞌ xchiꞌdxyi Ñiꞌh
15Pwihsi ziga biindxiaagapaꞌhn xcweenta ziga riachiistoꞌ tu xchiꞌdxyi Jesucristu nee ziga nahpa za tu guelnadziiꞌhi lasaaꞌ lastoꞌ tu cun garaa raꞌ xpwiinn Jesucristu, 16pwihsi niꞌchin nin ayi radxahgaꞌhn rudiꞌhihn guelzuxchiilli nezloh Dxiohs pur xcweenta tu chin rbwihdxyi-rnaꞌbaꞌhn nezloh Ñiꞌh. 17Rbwiidxyi-rnaꞌbaꞌhn loh Dxiohs nin naa Xtaada Daada Jesucristu, Xtaada Dxiohs Ñiꞌh nin rnabwaꞌ llaaꞌndxibaaꞌ, tin guniꞌhi Ñiꞌh laꞌh tu tuhbi guelrahcabwaꞌrooꞌ nee cun tuhbi guelruluuꞌyiloh xteenn raꞌ lligaaba nin nuulaꞌn tin ziꞌchi gadzihn gacabwaꞌ ru tu xa naa xcweenta Yuꞌbi Dxiohs, 18nee cun rnaꞌbazahn tin guziaꞌñih Ñiꞌh loh xigaaba tu para gacabwaꞌ tu cuun niꞌca nin naa guelnazaꞌca nin naannloh tu zuniꞌhi Ñiꞌh laꞌh tu laasii gudihdxyi Ñiꞌh laꞌhtu pur nin riachiistoꞌ tu xchiꞌdxyi Ñiꞌh ya balaacachiꞌh lasahca guelñaꞌñihrooꞌ nin gudiꞌhi Ñiꞌh ziga hereensi laꞌh raꞌ xpwiinn Ñiꞌh, 19nee cun balaacachiꞌh guelrnabwaꞌ rooꞌ nin naꞌzuu guzuh hasta ayi riaꞌlohtiiꞌ loh hasta naꞌzuu xquelrnabwaꞌ Ñiꞌh nin nahpa naꞌzu caꞌha Ñiꞌh para laꞌh nuꞌh ziga naa nuꞌh bwiinn raꞌ nin ya gwachiistoꞌ xchiꞌdxyi Ñiꞌh. Guelrnabwaꞌ riiꞌ naa nin laꞌhgahca nin baluuꞌyi Dxiohs cun gaduhbi laꞌgaꞌtiiꞌ xjweersi Ñiꞌh nee cun gaduhbi guelnadxiipa xteenn Ñiꞌh 20chin bacwaꞌhn Ñiꞌh laꞌh Jesucristu, ya batiꞌdxi Ñiꞌh laꞌh Jesucristu tin guzohba Ñiꞌh xladu nanchii Daada Dxiohs nez dxibaaꞌ tin ziꞌchi ya naꞌzuu caꞌha Ñiꞌh guelrnabwaꞌ, 21pwihsi nahpa Ñiꞌh guelrnabwaꞌ loh cuunchiꞌhzi gubieerna, nee loh cuunchiꞌhzi guelrnabwaꞌ, nee loh cuunchiꞌhzi guelrdziꞌbaloh loh snuhn raꞌ bwiinn, loh chyu chiꞌhzi bwiinn nin rnabwaꞌ, nee cun cuunchiꞌhzi lah bwiinn nin rdziꞌbaloh ruzeꞌta bwiinn nin nuu raꞌ nnah tantu loh guidxyiyuh riiꞌ nee tantu ziga loh guidxyiyuh cuubi nin zeꞌ-yahlda dxiꞌ. 22Ya Dxiohs batsiiga garaatiiꞌ cohsa nez ñaaꞌ Jesucristu cun neezaa bazuh Dxiohs laꞌh Jesuhs tin naa Ñiꞌh nin rnabwaꞌ loh garaa raꞌ bwiinn nin naa xquidoꞌ Ñiꞌh, 23pwihsi xpwiinn guidoꞌ Ñiꞌh naa raꞌ ba ziga tihxi Ñiꞌh ya ziga rutiꞌdxi Dxiohs garaatiiꞌ nezloh Jesucristu, ziꞌchiza laꞌh Ñiꞌh rutiꞌdxi Ñiꞌh garaa raꞌ za cohsa nezloh raꞌ bwiinn nin naa xquidoꞌ Ñiꞌh.
Currently Selected:
Efesios 1: zpv
Highlight
Share
Copy
Want to have your highlights saved across all your devices? Sign up or sign in
© 1990, Wycliffe Bible Translators, Inc. All rights reserved.