San Lucas 1
1
Didzaꞌ rguꞌë San Lucas lu nëꞌë Teófilo
1Zian nup chglun bayúdx luzúj lu guich, gaz lu dzöꞌ yuguꞌ le naccz, le guc ga zoaruꞌ, 2catëz naꞌ gululuíꞌi rëꞌu nup niꞌ dza niꞌtë gulaleꞌi lei, len guluzë́ didzaꞌ qui. 3Runi nedaꞌ nac dxiꞌa uzujaꞌ quiuꞌ lu guich, gaz lu dzöꞌ yuguꞌ lë ni, Teófilo, bönniꞌ tsáhuiꞌdauꞌ, le chbuguiljaꞌ gazxj ga rëꞌ ca nac yúguꞌtë lë naꞌ guc dza niꞌtë. 4Ruzujaꞌ quiuꞌ lu guich ni quië gnöznuꞌ nac gdutë li lë naꞌ chnazëduꞌ.
Ruluꞌë gbaz laꞌy queëꞌ Dios ca ziꞌa galjëꞌ Juan, bönniꞌ uquilëꞌ bunách nis
5Dza niꞌtë catiꞌ gna bëꞌë luyú Judea Herodes, niꞌ zoëꞌ bxuz lëꞌ Zacarías. Nabáblenëꞌ cöꞌ bxuz, nazíꞌ lei Cöꞌ Queëꞌ Abías. Nacnu caꞌ zxiꞌn xsoëꞌ Aarón, bönniꞌ guquëꞌ bxuz blau ziꞌal, Elisabet, ngul queëꞌ Zacarías naꞌ. 6Nacquëꞌ tsahuiꞌ lahuëꞌ Dios Zacarías len Elisabet, len gdu ládxiꞌquëꞌ tunëꞌ ca rna xtidzëꞌë Dios len le rna bëꞌ zxba queëꞌ. Cni guc, nutu nu guc bi gnë quequëꞌ. 7Nutu nu zoa biꞌi quequëꞌ, le nacnu ngul huödx Elisabet, atiꞌ chnagulquëꞌ groptëꞌ.
8Bdxin dza gul‑laꞌ uláz qui cöꞌ naꞌ nabáblenëꞌ Zacarías lunëꞌ dxin lahuëꞌ Dios, lu yöl‑laꞌ bxuz quequëꞌ. 9Ca nalëbcnëꞌ tunëꞌ bxuz, gul‑laꞌ uláz queëꞌ Zacarías gyaziëꞌ lu latj laꞌy qui gdauꞌ quië uzéguiꞌë yal lahuëꞌ Xanruꞌ Dios. 10Tsal niꞌ ruzéguiꞌë yal Zacarías naꞌ, gulacuáꞌ niꞌl yúguꞌtë bunách, tuꞌlídz Dios. 11Laꞌ naꞌz buluíꞌ lahuëꞌ gbaz laꞌy queëꞌ Xanruꞌ ga zoëꞌ Zacarías naꞌ, zuinëꞌ tslaꞌa yubél bcugu laꞌy ga naꞌ regui yal. 12Catiꞌ bléꞌinëꞌ gbaz laꞌy naꞌ Zacarías, gröꞌë baguíꞌi len gudxi bdzöbnëꞌ. 13Niꞌr gudxëꞌ lëꞌ gbaz laꞌy naꞌ, gnëꞌ:
―Zacarías, cutu gádxinuꞌ, le chbyönnëꞌ Dios le rnabuꞌ lahuëꞌ, atiꞌ uzoanu‑biꞌ tubiꞌ biꞌi bö́nniꞌdauꞌ Elisabet, ngul quiuꞌ, atiꞌ guꞌu labiꞌ Juan. 14Gataꞌ quiuꞌ le uziꞌu xbey len udzijnuꞌ, atiꞌ zian nup ludziji ládxiꞌgac le guljbiꞌ biꞌidauꞌ naꞌ, 15le gáctscabiꞌ zxön lahuëꞌ Dios. Cutu guiꞌjbiꞌ xisi uva len clëg tu le rsudxi bunách, atiꞌ gdu sóalenëꞌ‑biꞌ Dios Böꞌ Laꞌy catiꞌ su lau ziꞌa galjbiꞌ. 16Gunëꞌ Juan ni ga luhuöác queëꞌ Xanruꞌ zian bunách Israel. 17Nörëꞌ Lëꞌ ca Xanruꞌ, atiꞌ laꞌcuaꞌlen lëꞌ Böꞌ naꞌ len yöl‑laꞌ huac naꞌ gulacuaꞌlen Elías, bönniꞌ bëꞌë didzaꞌ uláz queëꞌ Dios. Cni gunëꞌ quië unëꞌ tuz nup nacgac xuz len zxiꞌnquëꞌ, len uzéjniꞌnëꞌ nup taꞌdáꞌbagaꞌ quië lacquëꞌ tsahuiꞌ, len ucözëꞌ bunách lacquëꞌ sinaꞌ laꞌzíꞌ lu naꞌquëꞌ Xanruꞌ.
18Gnabnëꞌ gbaz laꞌy naꞌ Zacarías, rnëꞌ:
―¿Bizxa gac bëꞌ quië gnözdaꞌ lac lë ni? Chnagulaꞌ nedaꞌ len chnagulnu caꞌ ngul quiaꞌ.
19Bubiꞌë didzaꞌ gbaz laꞌy naꞌ, rnëꞌ:
―Nedaꞌ leaꞌ Gabriel. Runaꞌ dxin lahuëꞌ Dios. Lëczëꞌ bsölëꞌë nedaꞌ güíꞌlenaꞌ liꞌ didzaꞌ, len quíxjöiꞌdaꞌ liꞌ didzaꞌ dxiꞌa ni. 20Naꞌa, le cutu gyéjlëꞌu xtidzaꞌa, gcödzuꞌ len cutur gac gneuꞌ catiꞌ gacr lë ni. Yúguꞌtë lë ni udxín catiꞌ gdxin dza qui.
21Tsal niꞌ tac lë ni, nacuáꞌ niꞌl bunách, taꞌbözëꞌ Zacarías, atiꞌ tuꞌbannëꞌ le rdzeynëꞌ xtsey ga naꞌ zoëꞌ lu latj laꞌy. 22Catiꞌ burujëꞌ Zacarías, cutu guc güíꞌlenëꞌ lequëꞌ didzaꞌ, atiꞌ gláquibeꞌinëꞌ bléꞌinëꞌ tu le buluiꞌinëꞌ lëꞌ Dios lu latj laꞌy. Buláꞌ buluiꞌzëꞌ Zacarías, buzéjniꞌnëꞌ lequëꞌ, le curác gnëꞌ.
23Catiꞌ bzaꞌa yuguꞌ dza naꞌ ral‑laꞌ gunëꞌ dxin lahuëꞌ Dios Zacarías, niꞌr böjëꞌ lidxëꞌ. 24Gdöd yuguꞌ dza naꞌ biaꞌnu‑biꞌ lëꞌnu biꞌidauꞌ Elisabet, ngul queëꞌ Zacarías naꞌ, atiꞌ gdu gayuꞌ beoꞌ bugaꞌnznu yuꞌu. Gzaꞌ ládxiꞌnu, 25rnanu:
―Cni runëꞌ quiaꞌ Xanruꞌ. Ruzáꞌ ladxëꞌë quiaꞌ biꞌidauꞌ, len runëꞌ ga cutur utuiꞌdaꞌ laugac bunách.
Rguíxjöꞌë gbaz laꞌy ca ziꞌa galjbiꞌ Jesús
26Catiꞌ chguc xop beoꞌ, buluíꞌ lahuëꞌ gbaz laꞌy naꞌ, le bsölëꞌë lëczëꞌ Gabriel Dios, tsijëꞌ Nazaret, tu yödz luyú Galilea. 27Dios bsölëꞌë lëꞌ niꞌ tsajyúëꞌ‑biꞌ tubiꞌ biꞌi ngul raꞌbandauꞌ lëbiꞌ María. Chnazíꞌ lu naꞌbiꞌ María utság náꞌlenbiꞌ‑nëꞌ bönniꞌ lëꞌ José. Naquëꞌ José zxiꞌn xsoëꞌ David, bönniꞌ gna béꞌinëꞌ bunách Israel. 28Catiꞌ gyaziëꞌ Gabriel naꞌ ga zoabiꞌ María, gudxëꞌ‑biꞌ:
―Padiux. Dios ruzáꞌ ladxëꞌë quiuꞌ. Zóalenëꞌ liꞌ Xanruꞌ Dios. Lëczëꞌ benëꞌ ga nacruꞌ liꞌ bicaꞌ ba ca yúguꞌtë ngul.
29Catiꞌ bléꞌibiꞌ gbaz laꞌy naꞌ María, gröꞌbiꞌ baguíꞌi niꞌa qui didzaꞌ naꞌ bëꞌë, len rubani ládxiꞌbiꞌ nacx rna didzaꞌ naꞌ bulidzëꞌ‑biꞌ gbaz laꞌy naꞌ. 30Niꞌr gudxëꞌ‑biꞌ gbaz laꞌy naꞌ, rnëꞌ:
―María, cutu gádxinuꞌ, le chbdél‑liꞌnuꞌ le ruzáꞌ ladxëꞌë quiuꞌ Dios. 31Naꞌa, tsuꞌubiꞌ lëꞌu tubiꞌ biꞌidauꞌ, atiꞌ uzúꞌ‑biꞌ tubiꞌ biꞌi bö́nniꞌdauꞌ, atiꞌ guꞌu labiꞌ Jesús. 32Jesús ni gáctërëꞌ blau, len siꞌ Lëꞌ Zxiꞌnëꞌ Dios, Nu nactër blau. Xanruꞌ Dios gunëꞌ ga gna bëꞌë ca naꞌ gna bëꞌë David, xuz gul gdöd queëꞌ. 33Jesús naꞌ gna béꞌitecznëꞌ bunách Israel, atiꞌ le gna bëꞌë Lëꞌ gatga udx qui.
34Niꞌr gnábibiꞌ gbaz laꞌy naꞌ María, rnabiꞌ:
―¿Nacxcz gac lë ni, le cutu zóalenaꞌ bönniꞌ?
35Bubiꞌë didzaꞌ gbaz laꞌy naꞌ, rëꞌ‑biꞌ:
―Gdxinëꞌ ga zuꞌ Dios Böꞌ Laꞌy, atiꞌ soalen liꞌ yöl‑laꞌ huac queëꞌ Dios, Nu nactër blau, le gac ga zuꞌ ca tu zxul rguꞌu böaj. Qui lë ni naꞌ biꞌi bö́nniꞌdauꞌ naꞌ ral‑laꞌ galjbiꞌ, tsuꞌubiꞌ lu nëꞌë Dios, atiꞌ siꞌ labiꞌ Zxiꞌnëꞌ Dios. 36Yetú caꞌ, Elisabet, ngul diꞌa dza quiuꞌ, chnuaꞌnu‑biꞌ caꞌ lëꞌnu tubiꞌ biꞌi bö́nniꞌdauꞌ zal‑laꞌ chnagulnu. Gulanë́ꞌ queënu: “Nacnu ngul huödx”, san chzeaj xop beoꞌ nuaꞌnu‑biꞌ lëꞌnu biꞌidauꞌ naꞌ. 37Cutu bi zoa le cusáquiꞌnëꞌ Dios.
38Niꞌr María gnabiꞌ:
―Ni zoaꞌ. Tsaz nacaꞌ huen dxin queëꞌ Xanruꞌ. Gac quiaꞌ ca naꞌ chgnauꞌ.
Niꞌr laꞌ buzaꞌtëꞌ gbaz laꞌy naꞌ ga zoabiꞌ María.
María zajyubiꞌ‑nu Elisabet
39Laꞌ dza niꞌz gyuꞌubiꞌ nöz María, atiꞌ jaréluꞌbiꞌ gyeajbiꞌ ga nac guíꞌadauꞌ, bdxinbiꞌ tu yödz luyú Judea. 40Niꞌ gyazbiꞌ lidxëꞌ Zacarías len gudxbiꞌ‑nu Elisabet:
―Padiux.
41Catiꞌ byö́ninu Elisabet didzaꞌ naꞌ bëꞌbiꞌ María, laꞌ butatë cuinbiꞌ biꞌi huëꞌndauꞌ naꞌ yuꞌubiꞌ lëꞌnu, atiꞌ dusóalenëꞌ‑nu Dios Böꞌ Laꞌy. 42Niꞌr bëꞌnu zidzj didzaꞌ Elizabet, rnanu:
―Chnunëꞌ Dios ga nacruꞌ liꞌ bicaꞌ ba ca yúguꞌtë ngul len chnunëꞌ caꞌ ga nacbiꞌ bicaꞌ ba biꞌidauꞌ naꞌ yuꞌubiꞌ lëꞌu. 43¿Núzxatë nedaꞌ, zaꞌnu quiaꞌ xnëꞌë Xanaꞌ? 44Catiꞌ byöndaꞌ didzaꞌ bëꞌu, bulidzuꞌ nedaꞌ, lu yöl‑laꞌ rudziji queëbiꞌ laꞌ butatë cuinbiꞌ biꞌi huëꞌndauꞌ ni yuꞌubiꞌ lëꞌa. 45Bicaꞌ bauꞌ liꞌ le gyéjlëꞌu xtidzëꞌë gbaz laꞌy, atiꞌ udxíncz lë naꞌ gudxëꞌ liꞌ uláz queëꞌ Xanruꞌ.
46Niꞌr gnabiꞌ María:
“Gdu ladxaꞌa runaꞌ Xanruꞌ zxön,
47Len rudziji ládxiꞌlenaꞌ‑nëꞌ Dios, Nu ruslá nedaꞌ.
48Dioscz buzáꞌ ladxëꞌë quiaꞌ nedaꞌ.
Yuꞌa lu nëꞌë, tsaz nacaꞌ huen dxin queëꞌ.
Naꞌa su lau, ca nac quiaꞌ laꞌná:
‘Bicaꞌ ba ngul naꞌ.’
49Zxöntër nac le benëꞌ quiaꞌ Dios uná bëꞌ.
Laꞌy nac lëꞌ.
50Lëꞌ ruhuechiꞌ ládxiꞌteczëꞌ bunách tadxi Lëꞌ
Naꞌa dza len dza ziꞌa zaꞌc.
51Yuguꞌ yöl‑laꞌ huac zxön chbenëꞌ Lëꞌ.
Buzötjëꞌ nup glun zxön yöl‑laꞌ rejniꞌi quegac.
52Bugǘëꞌ yöl‑laꞌ uná bëꞌ quegac nup glac blau,
Len benëꞌ ga glac blau nup glac nöxj ladxiꞌ.
53Benëꞌ ga guluhuö́lj guladzeꞌi nup guladún,
Len bucaꞌnëꞌ caꞌz nup gulaleꞌi yöl‑laꞌ tsahuiꞌ.
54Gúclenëꞌ bunách Israel, nup naꞌ tun xchinëꞌ,
Le yajneynëꞌ lequëꞌ len buechiꞌ ladxëꞌë lequëꞌ.
55Benëꞌ ca gzxiꞌ lu nëꞌë gunëꞌ quequëꞌ xuz xtauꞌruꞌ
Lencaꞌ queëꞌ Abraham len quegac zxiꞌn xsoëꞌ.”
56Bugáꞌnlenbiꞌ‑nu Elisabet María gdu ca tsonn beoꞌ, atiꞌ gdöd niꞌ böajbiꞌ lidxbiꞌ.
Le guc catiꞌ guljëꞌ Juan, bönniꞌ buquilëꞌ bunách nis
57Catiꞌ bdxin dza ral‑laꞌ soabiꞌ biꞌidauꞌ queënu Elisabet, buzoanu‑biꞌ tubiꞌ biꞌi bö́nniꞌdauꞌ. 58Gulayöni dzag yuꞌu queënu len yuguꞌ diꞌa dza queënu ca naꞌ guc, buechiꞌ ladxëꞌë‑nu Dios, atiꞌ guludzíjilen lënu. 59Catiꞌ chguc xunuꞌ dza zoabiꞌ biꞌidauꞌ naꞌ, guladxinëꞌ diꞌa dza queënu quië laꞌchuguëꞌ lu xpë́laꞌbiꞌ biꞌi bö́nniꞌdauꞌ naꞌ lë naꞌ gac bëꞌ náquibiꞌ queëꞌ Dios, atiꞌ tëꞌnnëꞌ luꞌë labiꞌ Zacarías ca naꞌ lëꞌ xuzbiꞌ. 60Niꞌr bubiꞌinu didzaꞌ Elisabet, xnaꞌbiꞌ, rnanu:
―Cutu. Juan siꞌ labiꞌ.
61Gulanabnëꞌ‑nu, taꞌnë́ꞌ:
―¿Bizx queë? Nutu nu diꞌa dza quiuꞌ lëꞌ Juan.
62Niꞌr gululáꞌ gululuiꞌznëꞌ, gulanabnëꞌ xuzbiꞌ nacx rëꞌnnëꞌ guꞌë labiꞌ. 63Gnabëꞌ tu blagdauꞌ Zacarías naꞌ, atiꞌ buzujëꞌ lahui cni: “Juan lëbiꞌ.” Gulubannëꞌ yúguꞌtëꞌ. 64Laꞌ niꞌz böaljtë ruꞌë Zacarías naꞌ len buguitjtë ludxëꞌë, atiꞌ bëꞌë didzaꞌ le gluꞌë Dios yöl‑laꞌ ba. 65Niꞌr gládxinëꞌ len gulubannëꞌ yúguꞌtë dzag yuꞌu quequëꞌ, atiꞌ yúguꞌtë yödzdauꞌ nacuáꞌ lu guíꞌadauꞌ luyú Judea, gzë didzaꞌ ca guc lë ni. 66Gulazáꞌ ládxiꞌgac yúguꞌtë nup gulayöni ca naꞌ guc, taꞌná:
―¿Nacxcz gacbiꞌ biꞌi bö́nniꞌdauꞌ ni? Le nactë zóalenëꞌ‑biꞌ Xanruꞌ.
Didzaꞌ bëꞌë Zacarías uláz queëꞌ Dios
67Niꞌr dusóalenëꞌ Zacarías, xuzbiꞌ Juan, Dios Böꞌ Laꞌy, atiꞌ bëꞌë didzaꞌ uláz queëꞌ Dios, rnëꞌ:
68“Yöl‑laꞌ ba Dios, Xangac bunách Israel
Le duyúëꞌ rëꞌu, bunách queëꞌ, len böaꞌuëꞌ rëꞌu.
69Bsölëꞌë queëruꞌ Nu uslá rëꞌu,
Len yöl‑laꞌ huac zxön qui,
Nu naꞌ gulj ladj zxiꞌn xsoëꞌ David,
Huen dxin queëꞌ Dios.
70Dza niꞌtë gzxiꞌ lu nëꞌë gunëꞌ cni,
Nac ca naꞌ gnëꞌ lu rúꞌaquëꞌ bönniꞌ gluꞌë didzaꞌ uláz queëꞌ.
71Gzxiꞌ lu nëꞌë uslë́ꞌ rëꞌu
Lu naꞌgac nup taꞌléy rëꞌu
Lencaꞌ lu naꞌgac nup cutaꞌleꞌi rëꞌu dxiꞌa.
72Gzxiꞌ lu nëꞌë huechiꞌ ladxëꞌë xuz xtauꞌruꞌ
Len tsajneynëꞌ le gzxiꞌ lu nëꞌë le nac laꞌy.
73Lë ni benëꞌ tsutsu xtidzëꞌë gzxiꞌ lu nëꞌë,
Le gunëꞌ queëꞌ Abraham, xuzruꞌ gul gdöd,
Le nac tu le ral‑laꞌ gunëꞌ queëruꞌ rëꞌu.
74Gzxiꞌ lu nëꞌë uslë́ꞌ rëꞌu
Lu naꞌgac nup cutaꞌleꞌi rëꞌu dxiꞌa
Quië cutur gádxiruꞌ gunruꞌ xchinëꞌ Lëꞌ,
75Len quië gacruꞌ baꞌa ladxiꞌ len gdu dxiꞌa
Lahuëꞌ Lëꞌ yúguꞌtë dza soaruꞌ gbanruꞌ.
76Liꞌ, zxíꞌnaꞌdauꞌ, siꞌ lauꞌ bönniꞌ ruꞌë didzaꞌ uláz queëꞌ Dios Nu nactër blau
Le tsajnöruꞌ ca Xanruꞌcz, upaꞌu nöz ga tödëꞌ.
77Gunuꞌ ga laꞌnözi bunách queëꞌ ca gac lulá
Len ca naꞌ unít lahuëꞌ Dios dul‑laꞌ nabágaꞌquëꞌ.
78Cni gac, le ruhuéchiꞌtsca ladxëꞌë rëꞌu Dios
Len runëꞌ ga tseníꞌ queëruꞌ Nu nac yeníꞌ gdu.
79Lei gunn yeníꞌ ga nacuáꞌ nup nacuáꞌ gap nac chul len gap nac lu zxul qui yöl‑laꞌ gut
Quië ugúꞌu rëꞌu nöz ga cöꞌ dxi ládxiꞌdauꞌruꞌ.”
80Gzxönbiꞌ biꞌi bö́nniꞌdauꞌ naꞌ len bdip ládxiꞌbiꞌ. Gzoazbiꞌ gap nac lu latj caꞌz catiꞌ bdxinr dza buluíꞌ laubiꞌ laugac bunách Israel.
Currently Selected:
San Lucas 1: zsr
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.