YouVersion Logo
Search Icon

2 Timoteo 1

1
Apóstol Pablo napakunqan
1Noqa Pablutam Jesucristupa apostolnin kanäpaq Teyta Dios churamashqa. Jesucristuta chaskikurmi Teyta Dios änikushqannö wiñë kawëta tarirqü. 2Timoteo,#Hech. 16.1-3. kuyë tsurïnö kaptikim kë cartata cartakëkämü. Yayantsik Teyta Dios y Señornintsik Jesucristo ankupäshurniki alli kawanëkipaq yanapëkulläshï.
Mana penqakushpa willakunanpaq käyitsinqan
3Unë castäkuna sirwiyashqan y noqapis sirwishqä Teyta Diosta cada mañakurmi paqaspa y junaqpa qampaq payllä nikü. 4Waqëkar quedamushqëkita yarpararmi yapë rikänakurir kushikunantsikpaq kutimïta munëkä.
5Noqa musyämi Teyta Diosman markäkur pë munashqannö kawëkashqëkita. Tsënö kawëkanki awilëki Loida y mamëki Eunice Teyta Diosman markäkur kawayashqannömi. 6Tsënö kawëkarqa mana mantsakushpa Teyta Diosta imëpis sirwi. Pëta sirwinëkipaqmi Teyta Dios churashurqunki makïta peqëkiman churëkur qampaq mañakushqä höra. 7Manam mantsakunantsikpaqtsu Teyta Dios churamarquntsik, sinöqa mana mantsakushpa willakunantsikpaqmi, pïmëtapis kuyanantsikpaqmi y shumaq käyikur imatapis ruranantsikpaqmi churamarquntsik.
8Tsënö këkaptinqa mana penqakushpa Jesucristupa willakïninta willakï. Jina ama penqakïtsu alli willakïninta willakushqäpita prësu llawirätsiyämaptinpis. Imëkata jiparpis alli willakïninta willakï. Tsënö willakunëkipaqmi Teyta Dios yanapëkäshunki.
Teyta Dios salvamanqantsikta Pablo willakunqan
9Teyta Diosmi salvamarnintsik qayamarquntsik pë munashqannö santu kanantsikpaq. Manam imatapis allita rurashqantsikpitatsu salvamarquntsik, sinöqa jutsayuq këkashqapis kuyamarnintsikmi salvamarquntsik. Tsënö kuyamarquntsik kë patsata manaraq kamar Jesucristuman churamarnintsikmi. 10Ankupämashqantsikta musyatsimarquntsik salvamaqnintsik Jesucristuta kë patsaman kachamurmi. Pëmi willakïninchö nishqannö wanïta vencirir wiñë kawëta qomarquntsik.
11Alli willakïninta [mana Israel nunakunata] willapänäpaq Teyta Dios churamashqa kaptinmi apostolnin kar yachëkätsï. 12Tsënö willakushqäpita carcelchö jiparpis Jesucristumanmi markäkïkä. Pëmi ëllukamänan junaqyaq poderninwan yanapamanqa. Tsëmi carcelchö llawirarpis penqakütsu.
13Timoteo, Jesucristupa willakïninta yachatsishqänölla qampis yachatsi. Jesucristo kuyashushqëkinölla pëman markäkur pïmëwanpis kuyanakur kawakï. 14Jesucristupa willakïninta pipis llutanta yachatsiptinqa mana chaskiyänanpaq wawqikunata y panikunata käyitsi. Tsënö käyitsinëkipaqqa Espíritu Santum yanapashunki. Pëmi noqantsikwan imëpis këkan yanapamänantsikpaq.
Pabluta Onesíforo alli yanapanqan
15Musyashqëkinöpis Asia provinciachö täraq wawqikuna y panikunaqa llapanmi jaqiramar ewkuyashqa. Tsënöllam Figeluwan Hermógenespis ewkuyashqa.
16Onesíforuta y castankunatapis Señornintsik Jesucristo yanapëkullätsun. Carcelchö prësu këkaptïpis mana penqakushpam imëpis watukamar yanapamashqa. 17Tsënöllam Romaman chëkamur tarimashqanyaq ashimarqan. 18Musyashqëkinöpis Éfeso markachö shumaqmi yanapamarquntsik. Nunakunata juzganan junaq Señornintsik Jesucristo pëta ankupëkullätsun.

Currently Selected:

2 Timoteo 1: qwhB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy