YouVersion Logo
Search Icon

1 Timoteo 1

1
Apóstol Pablo napakunqan
1Noqa Pablum Jesucristupa apostolnin kä. Apostolnin kanäpaqmi salvakuq Teyta Dios y markäkushqantsik Señornintsik Jesucristo churamashqa. 2Timoteo,#Hech. 16.1-3. Jesucristuman markäkur kuyë tsurïnö kaptikim kë cartata cartakëkämü. Yayantsik Teyta Dios y Señornintsik Jesucristo ankupäshurniki alli kawanëkipaq yanapëkulläshï.
Llutan yachatsikuqkunata michäyänanpaq käyitsinqan
3Macedonia provinciaman ewkurmi Éfeso markachö jaqirqaq llutan yachatsikuqkunata michänëkipaq. 4Tsë llutan yachatsikuqkunaqa kikinkunapa yarpëninkunallapita yachatsikurmi unë tiempu imanöpis kashqanta y unë castankuna pï kayashqanta yachatsikuyan. Tsëkunata yachatsiyaptinmi Teyta Diosman markäkuyänanpa rantin manakaqkunapita liryakur këkäyan.
5Wawqikuna y panikuna liryakuyänanpa rantin kuyanakuyänanpaqmi tsë llutan yachatsikuqkunata michänëkipaq nikaq. Tsënö kuyanakuyänanpaqqa limpiu shonquyuq kayätsun, alli concienciayuq kayätsun y llapan shonqunkunawan Teyta Diosman markäkuyätsun.
6Tsë llutan yachatsikuqkunaqa kuyanakuyänanpa rantinmi manakaqkunapita liryakur kakuyan. 7Teyta Diospa leyninkunata alläpa yachaq kayashqanta yarparpis imata parlayanqantapis manam musyayantsu ni mäkuyantsu.
8Musyantsikmi Teyta Dios munashqannö kawayänanpaq yachatsishqaqa leyninkuna alli kashqanta. 9Manam jutsannaq nunakunapaqtsu leyninkunata Teyta Dios qorqan, sinöqa jutsa ruraqkunapaqmi. Tsëmi leyninkunaqa këkan mana cäsukuqkunapaq, aksë nunakunapaq, jutsasapakunapaq, Teyta Diosta mana respetaqkunapaq, mamäninta y tëtanta maqaqkunapaq y nuna mayinta wanutsiqkunapaq. 10Tsënöllam këkan mansibädukunapaq, ollqupura kakuqkunapaq, warmipura kakuqkunapaq, nuna mayinta rantikuqkunapaq, ulikuqkunapaq, manakaqta tumpar nuna mayinpa contran shäriqkunapaq y alli yachatsikïta mana cäsukur jutsa ruraqkunapaq. 11Tsëtam yachatsikun alabashqa Teyta Diospa alli willakïninchö. Tsë willakïninta willakunäpaqmi Teyta Dios kachamashqa.
Pabluta Teyta Dios ankupanqan
12Señornintsik Jesucristutam payllä nï willakïninta willakunäpaq yanapamashqanpita. Jina payllä nïmi noqaman markäkamar willakïninta willakur purinäpaq churamashqanpita. 13Nöpataqa Jesucristuta manakaqmanmi churarqä. Pëman markäkuqkunatapis ashi ashïkurmi carcelman llawitsirqä.#Hech. 8.3; 9.4-5. Mana musyar tsëkunata rurakïkaptïmi Teyta Dios ankupämar perdonamashqa. 14Perdonamarmi käyitsimashqa Jesucristuman markäkur pïmëtapis ankupänäpaq.
15Jutsasapa nunakunata salvananpaqmi kë patsaman Jesucristo shamushqa. Tsëta pïmëpis creyiyätsun. Noqallätapis wakin nunakunapita mas jutsasapa këkaptïmi 16ankupämar salvëkamashqa. Tsënö salvamashqa Jesucristo ankupäkuq kashqanta wakin nunakunapis käyikur pëman markäkuyänanpaqmi y tsënöpa wiñë kawëta tariyänanpaqmi. 17¡Teyta Diosmi imëyaqpis rey, wiñëpa kawaq y mana rikakuq! Pë japallanmi Dios këkan. [Manam pipis pënö yachaq kantsu.] ¡Imëyaqpis alabashqa këkullätsun! ¡Tsënö katsun!
Jesucristupa willakïninta imëpis willakunanpaq käyitsinqan
18Kuyë Timoteo, tsurï cuenta kaptikim Teyta Diospa shutinchö wawqikuna niyäshushqëkillata noqapis niq: Mana mantsakushpa soldädu pelyashqannö qampis mana mantsakushpa Jesucristupa willakïninta willakï. 19Tsënö willakur Jesucristuman imëpis markäkur Teyta Dios munashqannö kawë.
Wakin nunakunaqa Teyta Dios munashqannö manana kawarmi Jesucristuman markäkuyannatsu. 20Alejandruwan Himeneum tsënö këkäyan. Pëkunatam Satanáspa munëninman jaqirirqü. Tsënöpa itsa llutanta parlayanqanta käyikur Jesucristuman markäkuyanman.

Currently Selected:

1 Timoteo 1: qwhB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy