San Juan 12
12
Tub biñ mñaa pcoom asecy zguul gyiꞌ Jesuuz
1Jesuuz guam Betania shuup ruꞌ dzi anzir nu chuꞌ saꞌ ni Pas. Betania zeꞌ nu pcyiiñ Lázaro, yu nu bicy mi nu byabañ zeꞌ. 2Orzeꞌ de mbecy nu yuꞌ zeꞌ bzu ye dey tub che nu gow nuy mi. Zeꞌ Mart psaañ gyaꞌn. Nunu gazaꞌ Lázaro riy lat de yu nu nguaa lo mez nu gyicy che zeꞌ. 3Orzeꞌ Li bruꞌña nuñ chon gaynal gram tub lo asecy zguul nu la nardo nu tonaꞌ la ñgyup sac. Orzeꞌ pcooñ ndeꞌ gyiꞌ Jesuuz. Orzeꞌ pcuiigy ñi asecy zeꞌ nu gyich ic ñi. Orzeꞌ bzu laa nu zguul dutuub la nañ yuꞌ zeꞌ. 4Zeꞌ zu Judas Iscariote, tub yu nu rsyaꞌ lom. Laab yu zeꞌ yu nu bguꞌ Jesuuz yaa de yu nu rzi lagy lom. 5Orzeꞌ nay:
―¿Lagu wansaꞌy asecy zguul re nu sac i mbecy ni chon gaynal dzi? Gun orzeꞌ gad tiñ nu gric na ni de mbecy zi ―nay.
6Tees Judas ni mniiy, gun nac yu gubaan walab par nu nac nu rcay de mbecy zi. Nunu bzuy riiñ nu ri yaay nerbid nu rguꞌ dey tiñ ni dey. Nunu yuꞌ nu rboo dzey tiñ zeꞌ par ub ziꞌl yu. 7Orzeꞌ na Jesuuz:
―Cueꞌ gyicy zeed ru fiñ ii, gun bi bzu lily ñii asecy ii par nu duzu cuerp ne̱ par ornu shuub dzi nu cach dey ya̱. 8Ya̱ walab nu tuñ cyiiña̱ lat der, tees de mbecy zi zaab yuꞌ la dey lat der ―nam.
Nu bzaꞌ lo dey nu cut yu Lázaro
9Zigy de mbecy nu zu riiñ ni de mbecy Israeel güeñ dey nu zu Jesuuz Betania. Orzeꞌ gua dey zeꞌ walab tub lo ziꞌl nu za güii dey mi sinu niꞌ ziꞌl par nu za güii dey Lázaro, yu nu bicy mi nu byabañ zeꞌ. 10Orzeꞌ de yu zub lo ni de uz bzaꞌ lo dey nu niꞌ cut dey Lázaro, 11gun par nu nac yu zeꞌ zigy de mbecy Israeel druu chu dey lo de uz par nu ricy cup dey consuel lo Jesuuz.
Guꞌ Jesuuz ruꞌ gyedz Jerusaleeng
12Orzeꞌ tuubaꞌ dzi de mbecy zigy nu gua saꞌ ni Pas güeñ dey nu bi yeed Jesuuz par Jerusaleeng. 13Orzeꞌ blag dey de yaa ya gyiñ. Orzeꞌ za cheel dey mi. Nunu rbish ti dey. Orzeꞌ na dey:
―¡Dzi ga zily nac Ñgyoozh! ¡Ñgyoozh nac num ru, biñ nu bzuu nez mi! ¡Ñgyoozh nac num ru, biñ nu nac rey ni de ub na, mbecy Israeel! ―na dey.
14Orzeꞌ guud tub bur miꞌ ni Jesuuz. Orzeꞌ byub mi ma gal nu rniiñ lat de riidz ni Ñgyoozh. Rniiñ:
15Cueꞌ dzib der, mbecy nu yuꞌ gyedz Sión.
Güii der. Re yad rey ni der.
Riib mi tub bur miꞌ,
rniiñ.
16Tiem zeꞌ de yu nu rsyaꞌ lom wangyet lag dey cuen de nu ndeꞌ. Tees ornu Jesuuz bish cyam lo gyel lily nim, orzeꞌ byezaꞌ lagy dey nu de riidz ni Ñgyoozh mniiñ nu ni zac mi nunu mniiñ nu ni gyicy nu mbecy mi.
17Na gazaꞌ de mbecy nu bzaac ornu Jesuuz bredz mi Lázaro nu ruuy gyerbaa niy nunu bicy mi nu byabañ yu, de yu zeꞌ mnii dey lo mbecy coz nu bzaac yu. 18Ndeꞌ nu zigy mbecy gua cheel dey mi, gun güeñ dey nu bicy mi nusuriidz zeꞌ. 19Orzeꞌ na de mbecy fariseo rab dey losaꞌy:
―Na bi bzaac der nu rila wadaꞌ mod ni den. Güii der. Dela mbecy za ca dey ich yu ―na dey.
La be mbecy griego rlagy dey go nuy Jesuuz riidz
20Na lat de mbecy nu gua Jerusaleeng nu briib zily dey Ñgyoozh lat saꞌ, lat de yu zeꞌ ri la be mbecy griego. 21Orzeꞌ de yu zeꞌ bechaꞌ dey lo Lip. Yu zeꞌ nac yu tub mbecy Betsaida, tub gyedz nu ri lo yu ni Galilea. Orzeꞌ na dey rab yuy:
―De̱ ya̱ rlagy de̱ ne̱e̱ du̱ Jesuuz ―na dey.
22Orzeꞌ Lip gua niiy lo Ndrees. Orzeꞌ rup laa dey gua nii dey lo Jesuuz. 23Orzeꞌ nam rab mi dey:
―Bi rshuub tiem nu ya̱, biñ nu byac mbecy, gri̱ lo gyel lily ne̱. 24Ya̱ rishli rne̱e̱ lo der nu benu tub mbigy trig wayet lag ñi lo yu nu nit loñ, orzeꞌ laab tub ziꞌl mbigy nac ñii. Tees benu nit loñ, orzeꞌ cuic ñi zañ cosech. 25Yu nu rash shcab nu ricy ñi presis nu cui mbañ gyishlombecy ii, yu zeꞌ gat yu. Tees yu nu rash shcab nu a̱ꞌ ricy ñi presis nu cui mbañ gyishlombecy ii, yu zeꞌ gad nu cui mbañ yu tub la. 26Gun benu ca na tub mbecy rlagy yu nu gyicy yu gal nu rne̱e̱, orzeꞌ rlagy ñi nu cyid cay icha̱. Orzeꞌ zeꞌ nu ya̱ zu̱, laabaꞌ zeꞌ gzuy. Nunu Ñgyoozh, uza̱, gyicy mi nu gya gzuy.
Jesuuz rniim lo dey nu gat mi
27’¡Na deet rac nañ lardo̱o̱! ¿Per la ñuu coz ne̱e̱? ¿A gne̱e̱: “Uza̱, bloo chu de coz nu gzaca̱ na”? ¡Tees laab par gyiꞌ ndeꞌ nu yapa̱ gyishlombecy ii! 28Uza̱ bicy nu gyed gyel mbecy nir ―nam.
Orzeꞌ zaab tiꞌ nu mnii Ñgyoozh gashtal gyibaa. Orzeꞌ nam:
―Bi bicya̱ nu bruu zac gyel mbecy ne̱, nunu gyicya̱ nu gruu zac zir ñi par lo ―nam.
29Orzeꞌ de mbecy zigy nu yuꞌ zeꞌ güeñ dey nu zaab tiꞌ zeꞌ. Orzeꞌ yuꞌ dey nu rniiy nu ndeꞌ guzii. Zeꞌ yuꞌ gaꞌ dey nu mniiy nu ndeꞌ tub anc nu mnii nuy Jesuuz.
30Orzeꞌ Jesuuz nam rab mi dey:
―Walab nu nac ya̱ ndeꞌ nu zaab tiꞌ rnii sinu par nu nac de ru. 31Na bi pshuub tiem nu gyuꞌ bee nu dzi a̱ꞌ nap de mbecy nu yuꞌ gyishlombecy ii. Nunu na Ñgyoozh gyicy mi gan nuras, yu nu riib ic gyishlombecy ii. 32Tees ornu caa dey ya̱ lo cruuz, orzeꞌ laab ya̱ gyicya̱ nu gyechaꞌ dela mbecy lo̱ ―nam.
33Ni mod mniim par nu briic mi nu gad lagy dey nu lac mod gat mi. 34Orzeꞌ na de mbecy zigy zeꞌ rab yum:
―De ub na rad lagy na nu lat de riidz ni leey ni den rniiñ nu Mesías, biñ nu ca lo cuen nu co mbañ mbecy, cui mbañ mi tub la, rniiñ. Benu ni, orzeꞌ ¿lagu rniir nu ru, biñ nu byac mbecy, caa dey ru lo cruuz, rniir? Orzeꞌ ¿ca na biñ nu byac mbecy nac ru beni? ―na de mbecy zeꞌ.
35Orzeꞌ na gaꞌ Jesuuz rab mi dey:
―Ya̱, biñ nu rlyuu yaa, gabee chesa̱ ru̱ꞌ sñuu la be dzi lat der. Orzeꞌ zaab za la der lat nu gabee yuꞌ yaa gun orzeꞌ cueꞌ gyet cow ni der. Gun de mbecy nu rded zeꞌ nu cow wagad lagy dey ca par gash yu. 36Orzeꞌ bicy cup der consuel lo ya̱, biñ nu rlyuu yaa, lat nu gabee rdeda̱ lat der, gun orzeꞌ nac der mbecy nu rded zeꞌ nu yuꞌ yaa ―nam.
Na ornu blazh mniim de riidz zeꞌ, bruum lat dey nunu guam pcach lom ni dey.
De mbecy wangyicy cup dey consuel lo Jesuuz
37Mas Jesuuz bicy mi zañ nusuriidz ily lo dey, tees wangyicy cup dey consuel lom, 38gun orzeꞌ byuꞌ niñ gal nu pcaa Isaías, yu nu mnii por cuen ni Ñgyoozh. Orzeꞌ nay:
Ñgyoozh, ¿cyu guña lagy ni de riidz nu mne̱e̱?
Nunu ¿Cyu gac gyet lag cuen de coz ily nu gac gyicy ru?
na Isaías.
39Ndeꞌ nu wangac ñgyeña lagy dey, gun niꞌ ziꞌl pcaa Isaías:
40Ñgyoozh nam: “Ya̱ psowa̱ urlo dey.
Gun orzeꞌ cueꞌ gac zac dey nu urloy.
Nunu bicya̱ nu guton shcab ni dey.
Gun orzeꞌ cueꞌ gac gyet lag dey cuen,
nis cush cya dey lo̱.
Orzeꞌ gyicy napa̱ dey”, na Ñgyoozh.
41De riidz ii mnii Isaías gun bzaac yu gyel lily ni Jesuuz nunu laab mi zeꞌ bzat yu lat de riidz nu bzeeñ yu.
42Mas ni tees zigy de mbecy zub lo ni de mbecy Israeel bicy cup dey consuel lo Jesuuz. Tees wangyicy dey nu ñgyad lagy de losaꞌy gun rdzib dey lo de mbecy fariseo gun dzi ga cyuu nu dey yu nañ yuꞌ nu rsyaꞌ dey riidz ni Ñgyoozh. 43Gun dzi zir yet lagy dey nu grib zily mbecy dey gazeꞌ nu grib zily Ñgyoozh yu.
Jesuuz rniiñ nu lac na de mbecy
44Orzeꞌ Jesuuz ye la mniim. Orzeꞌ nam:
―Cyu ziꞌl mbecy nu ricy cup consuel lo ya̱, walab ti lo ya̱ ziꞌl ricy cup yu consuel, sinu niꞌ ziꞌl ricy cup yu consuel lo Ñgyoozh, uza̱, biñ nu bzuu nez ya̱. 45Nunu mbecy nu rzac ya̱, niꞌ ziꞌl rad lagy yu la na biñ nu bzuu nez ya̱. 46Ya̱ yapa̱ gyishlombecy ii par nu lyu̱u̱ yaa, gun orzeꞌ dela mbecy nu gyicy cup consuel lo̱, de yu zeꞌ wagyiyeeñ yu zeꞌ nu cow. 47Tees cyu ziꞌl mbecy nu gyeñ de riidz nu rne̱e̱, zeꞌ wazuub gyidag yuñ, walab ya̱ ne̱e̱ nu yuꞌ falt niy. Gun walab nu yapa̱ nu ne̱e̱ nu yuꞌ falt ni de mbecy ni gyishlombecy, sinu yapa̱ par nu gloo mbaña̱ dey. 48Yu nu walagy gac nu ya̱, nunu yu nu wayicy cuen de riidz nu rne̱e̱, de yu zeꞌ bi zu tub coz nu gyicy ñi nu gyuꞌ bee nu yuꞌ falt ni dey. Gun de riidz nu ya̱ mne̱e̱, ndeꞌ gyicy ñi nu gyuꞌ bee nu yuꞌ falt ni dey ornu shuub dzi nu gyaꞌ lo gyishlombecy. 49Gun ya̱ walab nu rne̱e̱ por cuen ni uba̱, sinu rne̱e̱ de riidz nu mnii Ñgyoozh, uza̱, biñ nu bzuu nez ya̱ nu gne̱e̱, nunu gne̱e̱ ñii mod nu mniim lo̱. 50Nunu rad lagya̱ nu de coz nu rnii Ñgyoozh, uza̱, ndeꞌ gyicy ñi nu cui mbañ mbecy tub la. Bi güeñ der beni nu de coz nu mne̱e̱, mne̱e̱ ñii lo der gal nu pcaam ya̱ nu ne̱e̱.
Currently Selected:
San Juan 12: zpz
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.