YouVersion Logo
Search Icon

VAKATAKILA 1

1
1Sa volai ena i vola oqo na i tukutuku ni veika sa vakatakila ko Jisu Karisito. Sa solia vua na Kalou na veika sa rairai mai oqo me vakaraitaka na veika sa voleka ni yaco mai vei ira na nona tamata. A sa vakaraitaka na Karisito na veika oqo ni sa tala yani na nona agilosi vua na nona dauveiqaravi o Joni, 2o koya ka sa tukuna na veika kecega sa raica. Sa i koya oqo na nona i tukutuku me baleta na vosa ni Kalou kei na dina sa vakatakila ko Jisu Karisito. 3Sa kalougata o koya sa wilika, kei ira era sa rogoca na vosa ni parofisai oqo ka vakabauta na veika sa volai kina! Sa voleka sara na gauna me ra na vakayacori kina na veika oqo.
Veikidavaki ki na Soqosoqo Lotu e Vitu
4 # Lako 3.14; Vtaki 4.5 Mai vei Joni kivei ira na i soqosoqo lotu e vitu mai Esia:
Me nomuni ga na loloma kei na vakacegu sa solia mai vei kemuni na Kalou, o koya sa bula tiko edaidai, a sa bula mai liu, ka na bula tikoga, ka sa solia talega mai o iratou na yalo e vitu ena mata ni nona i tikotiko vakaturaga, 5#Aisea 55.4; Same 89.27sa soli vakakina mai vei Jisu Karisito, o koya na dautukutuku yalodina, na ulumatua vei ira na tucake tale mai na mate, ka nodra daunilewa na tui kece sara ni vuravura oqo.
Sa lomani keda sara o koya, ka sa sereki keda mai na noda i valavala ca ena vuku ni nona mate, 6#Lako 19.6; Vtaki 5.10ka sa vakayacori keda me dua na matanitu ka matabete me veiqaravi vua na nona Kalou ka Tamana. Sa nei Jisu Karisito ga na lagilagi kei na kaukauwa ka sega ni mudu! Emeni.
7 # Tani 7.13; Maciu 24.30; Mari 13.26; Luke 21.27; 1Cesa 4.17; Saka 12.10; Joni 19.34,37; Saka 12.10; Maciu 24.30 Raica, sa lako mai o koya ena dela ni veio! Era na raici koya na mata kecega, o ira talega era a suaki koya. Era na tagicaki koya na veimatatamata kece sara e vuravura. Sa na yaco ga me vakaoqo! Emeni!
8 # Vtaki 22.13; Lako 3.14 “Oi au na Alifa kei na Omeka (na i vakatekivu kei na i vakataotioti),” sa kaya na Turaga na Kalou Kaukauwa, o koya sa bula tiko edaidai, a sa bula mai liu, ka na bula tikoga.
A Raivotu me Baleti Karisito
9Oi au o Joni na wekamuni, ka'u sa nomuni i tokani Vakarisito ena noda vosota vata tiko na veika rarawa sa yaco vei ira sa lewe ni nona matanitu. Au a la'ki biu ena yanuyanu o Patimo baleta ni'u a vunautaka na vosa ni Kalou kei na dina sa mai vakatakila ko Jisu. 10A sa liutaki au na Yalo Tabu ena siga ni Turaga, ka'u a qai rogoca ni voqa mai dakuqu e dua na domo sa rogo levu me vaka na davui, 11ka sa kaya vakaoqo “Mo vola na veika o sa raica ena dua na i vola, ka qai vakauta na i vola ki na i soqosoqo lotu e vitu: ki Efeso, kei Simurina, kei Perikamo, kei Caetaira, kei Sariti, kei Filadelafia, kei Leotisea.”
12Au a qai rai vuki me'u raici koya ka vosa tiko mai vei au, ka'u sa raica e vitu na i tutu-ni-cina koula, 13#Tani 7.13; Tani 10.5ia sa tiko ena kedra maliwa e dua ka sa vaka na i rairai ni tamata, a sa daramaka tu o koya e dua na i sulu vakatui ka sa yaco sara ki yavana na kena balavu, ka sa vau tu ki lomaserena na i vau koula. 14#Tani 7.9 #Tani 10.6Sa vulavula na uluna me vaka na vuti ni sipi vula, se na uca cevata; ka sa vaka na yameyame ni buka na yaloka ni matana; 15a sa tatalivaliva na yavana me vaka na parasa sa vakasavasavataki vinaka ka boroi vakamatau, kei na rorogo ni domona sa vaka na vadugu ni savu. 16A sa taura cake tu e ligana i matau e vitu na kalokalo, ka sa basika cake mai gusuna na i seleiwau gata ka batirua. Na matana e sa vaka na matanisiga ni sa solia taucoko na nona i serau. 17Ia ni'u sa raici koya, au a qai bale sobu ki yavana me vaka na tamata sa cibati koya. A sa tabaki au ena ligana i matau o koya, ka kaya, “Kakua ni o rere! Oi au na i Vakatekivu kei na i Vakataotioti.#Aisea 44.6; 48.12; Vtaki 2.8; 22.13 18Oi au o koya sa bula! Au a sa mate, ia oqo ka'u sa bula tikoga ka tawamudu. Sa tu talega vei au na kaukauwa ni kena lewai o mate kei na vuravura ni mate o etesi. 19Ia mo vola sara na veika o sa raica, na veika o sa raica tu oqo kei na veika ena yaco emuri. 20Sa vakaoqo na i balebale vuni ni kalokalo e vitu o sa raica e ligaqu i matau vata kei na i tutu-ni-cina koula e vitu: na kalokalo e vitu sai iratou na agilosi ni soqosoqo lotu e vitu, kei na i tutu-ni-cina e vitu sai iratou na i soqosoqo lotu e vitu.

Currently Selected:

VAKATAKILA 1: FNV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy