YouVersion Logo
Search Icon

FILIPAI 1

1
1 # Caka 16.12 Oqo na nodrau i vola o Paula kei Timoci na bobula i Jisu Karisito —
Ki vei ira kece mai Filipai era sa nona na Kalou ka ra sa tu vata kei Karisito Jisu, kei ira na qase ni lotu kei ira na tuirara.
2Me sobuti kemuni mada ga na loloma kei na vakacegu ni Kalou o Tamada kei na Turaga ko Jisu Karisito.
Na Masu i Paula Baleti Ira mai Filipai
3Au sa vakavinavinaka tikoga vua na Kalou ena veigauna kece au vakananumi kemuni kina. 4Ena veigauna kece au masulaki kemuni kina, au dau masulaki kemuni kece ena marau, 5ena vuku ni nomuni a vukei au ena cakacaka ni tukutuku vinaka mai na kena i vakatekivu me yacova mai oqo. 6Au sa vakadinata ni o koya na Kalou ka a tekivutaka na cakacaka vinaka oqo e lomamuni, ena kitaka tikoga me yacova sara ni sa oti, ena Siga sa na lesu tale mai kina ko Jisu Karisito. 7Au sa dau nanumi kemuni vakalevu! O koya oqo sa dodonu kina me vakaoqo na i vakarau ni yaloqu vei kemuni. Ni o ni sa vakaivotavota vata kei au ena lolomasavu ni Kalou ena noqu tiko e valeniveivesu kei na gauna talega au bula galala tu kina, ka me'u taqomaka ka vakadeitaka na kosipeli. 8Sa noqu i vakadinadina na Kalou me baleta na dina ni noqu i tukutuku, ni'u sa kaya vakaoqo ni kena titobu na noqu kauwaitaki kemuni sa vu ga mai vei Karisito Jisu.
9Au sa masulaka me na tubu cake tikoga na nomuni loloma ka me maucokona vinaka kina na nomuni kila-ka kei na nomuni rai, 10me rawa kina vei kemuni mo ni dau digitaka na veika e uasivi sara. O ni na qai galala kina mai na veika dukadukali kecega ka na sega ni beitaki ena Siga sa lako mai kina na Karisito. 11Ena vakasinaiti talega kina na nomuni bula ena veika vinaka sa cakava rawa duadua ga ko Jisu Karisito, ka me vakalagilagi ka vakacaucautaki kina na Kalou.
Na Vesu i Paula sa Toso Kina na Kosipeli
12Au gadreva mo ni kila na wekaqu ni veika e yaco vei au era sa vukea vakalevu sara na kena vakatetei na kosipeli. 13#Caka 28.30A sa yaco kina me ra kila kece na yadra e valenitui kei ira kece eke ni'u a biu ki na valeniveivesu baleta ni'u sa nona dauveiqaravi ko Karisito. 14Na noqu tiko ena valeniveivesu sa qai kaukauwa vakalevu cake ga kina na nodra yalo dina na veiwekani vua na Turaga, ka sa tubu cake vaka talega kina na nodra yalo doudou me ra vunautaka na i tukutuku vinaka ka sega ni rere.
15E dina ga ni so vei ira sa vunautaki Karisito baleta ni ra sa dauvuvu ka dauveileti, ia eso tale era sa vunau ena yalodra dina. 16Sa yavutaki ena loloma na nodra vunau o ira oqo, ni ra sa kila ni a solia vei au na Kalou na i tavi me'u tutaka ka taqomaka na kosipeli. 17Eso era sa sega ni vunautaki Karisito ena yalodra dina, ia ena yalo ga ni nanumi koya vakai koya. Era sa nanuma me ra vakalevutaka na noqu leqa ena gauna au tiko kina e valeniveivesu.
18Ia sa sega na betena o ya! Au sa marau ga ni sa vunautaki kina na Karisito, veitalia ga se caka ena yalodina se ena yalo e veivakaisini. Ia, au na marau tikoga 19ni'u sa kila ni sa rawa me'u sereki ena vuku ni nomuni masu kei na veivuke ni Yalo i Jisu Karisito. 20Na noqu gagadre kei na vakanuinui levu sai koya me'u kakua ni malumalumu vakadua ena vuku ni kena qaravi na noqu i tavi, ia me'u yaloqaqa ga ena veigauna kece, ka vakauasivi ena gauna oqo, me rawa kina ni vakacerecerei ga na Karisito ena yagoqu, se'u sa bula tiko se mate. 21Vei au, sai Karisito ka'u sa bula tiko kina, ia ke'u sa mate, sa na qai vinaka cake sara vakalevu vei au. 22Ia kevaka au bula tikoga, au na cakava tale kina e vuqa na ka vinaka, au sa na sega ni kila na ka me'u digitaka. 23Au sa dreti mai na rua na yasana. Au sa gadreva vakalevu sara me'u biuta na bula oqo ka la'ki tiko vata kei Karisito, ni sa uasivi cake sara o ya; 24ia ena vukumuni ga sa yaga vakalevu cake kina me'u se tei bula tiko mada ga. 25Au sa vakadinata ni na vakakina, ka'u sa kila kina ni'u na tiko ga vata kei kemuni ka vukei kemuni mo ni tubu cake tikoga ka reki ena vakabauta, 26ka me levu cake kina na nomuni cibitaka ena vukuqu na nomuni bula ni veiwekani kei Karisito Jisu ena gauna eda sa tiko vata tale kina.
27O koya oqo sa ka bibi kina me veidonui na nomuni i tovo ni bula vata kei na veika sa gadrevi ena kosipeli i Karisito, ka me na rawa kina vei au, ke'u mani lako yani se sega, me'u rogoca ni o ni sa tudei tikoga ena i naki e duabau kei na gagadre e duabau ka vala vata tiko ena vuku ni vakabauta ni kosipeli. 28Ni kakua ni rerevaki ira na nomuni meca; ni tamata yaloqaqa ga, ni oqo ena vakadinadinataka vei ira ni ra na druka o ira ka ni o ni na qaqa oi kemuni, baleta ni sai koya na Kalou ka sa solia vei kemuni na qaqa. 29Ni sa soli vei kemuni na i tutu dokai ena vuku i Karisito mo ni sega walega kina ni vakabauti koya, ia mo ni vosota talega na veika rarawa ena vukuna. 30#Caka 16.19-40Sa qai rawa kina oqo mo ni vakaitavi vata kei au ena i valu. Sa i koya ga oqo na i valu vata ga o ni a raica ni'u sa vala tiko kina mailiu, ka'u se ia tikoga oqo edaidai, me vaka na veika o ni sa rogoca.

Currently Selected:

FILIPAI 1: FNV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy