TIKO VOLI MAI NA LEKUTU 1
1
1Ena i matai ni siga ni karua ni vula ena i karua ni yabaki ni nodra lako tani mai na vanua o Ijipita o ira na Isireli, a sa vosa vei Mosese ko Jiova ena loma ni Vale ni Veitavaki mai na vanua lala ka dravuisiga o Saineai, ka kaya,#Tiko 26.1-51 2“O iko kei Eroni mo drau wiliki ira mada na lewenivanua e Isireli. Mo drau wiliki ira vakamataqali kei na veivuvale ni nodra qase, ka mo drau wilika yadua na yacadra na tagane kecega; 3oqo o ira era yabaki ruasagavulu se sivia, ka rawa ni ra lako ki na i valu. Mo drau wiliki ira vakaiwasewase ni nodra mataivalu. 4Me na tiko kei kemudrau e dua na turaga ni mataqali mai na mataqali yadua me vukei kemudrau. 5Sai koya oqo na yacadra na turaga ni mataqali me ra veiqaravi kei kemudrau. Mai vei ira na Rupeni, o Ilisuri na luve i Siteuri; 6mai vei ira na Simione, o Silimueli na luve i Surisatai; 7mai vei ira na Juta, o Nasoni na luve i Amenatave; 8mai vei ira na Isakari, o Nacanieli na luve i Suari; 9mai vei ira na Sevuloni, o Iliavi na luve i Eloni; 10mai vei ira na Ifereimi, oqo o ira na luve i Josefa, me o Ilisama na luve i Amiute; kei Kamelieli na luve i Pitasuri mai vei ira na Manasa; 11mai vei ira na Penijamini, o Epitani na luve i Kitioni; 12mai vei ira na Tani, o Eieseri na luve i Amisatai; 13mai vei ira na Aseri, o Pakieli na luve i Okirani; 14mai vei ira na Kata, o Eliasafi na luve i Tiueli; 15mai vei ira na Navitalai, o Eira na luve i Enani.” 16Sai ira oqo era a digitaki mai vei ira na lewenivanua, era turaga mai vei ira na kawa ni nodra qase, ka i liuliu ni veimataqali e Isireli.
17A sa kauti ira yani na tamata yadua sa cavuti na yacadra o Mosese kei Eroni, 18ka vakasoqoni ira vata na lewenivanua taucoko, ena i matai ni siga ni karua ni vula, ka volai ira vakavuvale ena nodra mataqali ni nodra qase; a sa wiliki na yacadra yadua era sa yabaki ruasagavulu ka lako cake, 19me vaka sa vakarota vei Mosese ko Jiova. A sa wiliki ira vakakina o koya ena vanua lala mai Saineai.
20O ira na kawa i Rupeni, na ulumatua i Isireli, na i taba tamata o ya na nodra veimataqali, ena veivuvale ni nodra qase, me vaka na i wiliwili ni yacadra yadua na tagane kecega sa yabaki ruasagavulu ka lako cake, o ira ka na rawa ni lako ki na i valu; 21na kedra i wiliwili na mataqali Rupeni e 46,500.
22Vei ira na kawa i Simione, ena i tabatamata o ya na nodra veimataqali, kei na veivuvale ni nodra qase, o ira sa volai vei ira me vaka na kedra i wiliwili ni yacadra na tagane yadua ka sa yabaki ruasagavulu na nona bula ka lako cake, ka rawa ni lako ki na i valu: 23na kedra i wiliwili na mataqali Simione e 59,300.
24Vei ira na kawa i Kata, ena i tabatamata o ya, na nodra veivuvale kei na veitokatoka ni nodra qase, me vaka na i wiliwili ni yacadra yadua, o ira ka vakatekivu mai na yabaki ruasagavulu na nodra bula ka lako cake, o ira kecega ka lako rawa ki na i valu: 25na kedra i wiliwili na mataqali Kata e 45,650. 26Vei ira na kawa i Juta, ena i tabatamata o ya, na nodra veimataqali, kei na veivuvale ni nodra qase, me vaka na i wiliwili ni yacadra yadua, o ira ka sa ruasagavulu na nodra yabaki ni bula ka lako cake, o ira na tagane kecega ka lako rawa ki na i valu: 27na kedra i wiliwili ena mataqali Juta, era sa lewe 74,600.
28Vei ira na kawa i Isakari, ena i tabatamata o ya na nodra veimataqali, kei na veivuvale ni nodra qase, me vaka na i wiliwili ni yacadra, o ira sa yabaki ruasagavulu na nodra bula ka lako cake, o ira na tagane kecega ka rawa ni lako ki na i valu: 29na kedra i wiliwili na mataqali Isakari, era sa lewe 54,400.
30Vei ira na kawa i Sevuloni, ena i tabatamata o ya na nodra veimataqali, kei na veivuvale ni nodra qase, me vaka na i wiliwili ni yacadra, o ira sa yabaki ruasagavulu na nodra bula ka lako cake, o ira na tagane kecega sa rawa ni lako ki na i valu: 31na kedra i wiliwili ena mataqali Sevuloni era sa lewe 57,400.
32Vei ira na kawa i Josefa, o ya o ira na kawa i Ifereimi, ena i tabatamata o ya, kei na nodra veivuvale kei na veitokatoka ni nodra qase, me vaka na i wiliwili ni yacadra, o ira sa yabaki ruasagavulu ka lako cake, o ira na tagane kecega sa rawa ni lako ki na i valu: 33na kedra i wiliwili ena mataqali Ifereimi, era sa lewe 40,500.
34Vei ira na kawa i Manasa, ena i tabatamata o ya na nodra veivuvale kei na veitokatoka ni nodra qase, me vaka na i wiliwili ni yacadra, o ira sa ruasagavulu na nodra yabaki ni bula ka lako cake, o ira kecega na tagane sa rawa ni lako ki na i valu: 35na kedra i wiliwili ena mataqali Manasa, era sa lewe 32,200.
36Vei ira na kawa i Penijamini, ena i taba tamata o ya na nodra veivuvale kei na veitokatoka ni nodra qase, me vaka na i wiliwili ni yacadra, o ira sa ruasagavulu na nodra yabaki ni bula ka lako cake, o ira na tagane kecega ka lako rawa ki na i valu: 37na kedra i wiliwili ena mataqali Penijamini, era sa lewe 35,400. 38Vei ira na kawa i Tani, ena i tabatamata o ya na nodra veivuvale kei na veitokatoka ni nodra qase, me vaka na i wiliwili ni yacadra, o ira sa ruasagavulu na nodra yabaki ni bula ka lako cake, o ira na tagane kecega sa rawa ni lako ki na i valu: 39na kedra i wiliwili na mataqali Tani, era sa lewe 62,700. 40Vei ira na kawa i Aseri, ena i taba tamata o ya na nodra veivuvale kei na veitokatoka ni nodra qase, me vaka na i wiliwili ni yacadra, o ira na tagane kecega sa rawa ni lako ki na i valu: 41na kedra i wiliwili ena mataqali Aseri, era sa lewe 41,500. 42Vei ira na kawa i Navitalai, ena i tabatamata o ya na nodra veivuvale kei na veitokatoka ni nodra qase, me vaka na i wiliwili ni yacadra, o ira sa ruasagavulu na nodra yabaki ni bula ka lako cake, o ira na tagane kecega sa lako rawa ki na i valu: 43na kedra i wiliwili ena mataqali Navitalai, era sa lewe 53,400.
44Sai ira oqo ka wiliki ira o Mosese kei Eroni, ka ra vukei rau kina era lewe tinikarua na turaga dauveiliutaki, ka ra dui matataka mai na veivuvale ni nodra qase. 45Ia na kedra i wiliwili taucoko na lewe i Isireli ena veivuvale ni nodra qase, ka ra sa ruasagavulu na nodra yabaki ni bula ka lako cake, o ira na tagane yadua ka ra lako rawa ki na i valu e Isireli, 46era sa lewe 603,550.
47E a sega ni wili vata kei ira o ira na kawa i Livai ena mataqali i tamadra. 48Sa qai vosa vei Mosese ko Jiova, ka kaya, 49“Ia na mataqali taudua ga i Livai mo kakua ni wilika, ka mo kakua ni okati ira vata ena wiliki ni lewenivanua e Isireli; 50ia mo lesi ira ga na Livai me ra liutaka na raici ni cakacaka ena vale tabu, kei na kena veiyaya kecega. Me ra dau kauta voli kei na kena i yaya, ka veiqaravi e loma, ka birika na nodra valelaca me volita na vale tabu. 51Ni sa vakarau me cavu na vale tabu, me ra cavuta ga ka birika tale ki na dua na vanua vou o ira na Livai. Kevaka e dua tani tale e toro volekata yani, ena vakamatei. 52O ira na Isireli me ra qai dui tara na nodra veivalelaca ka tiko vakaiwasewase ena nodra i tikotiko, na tamata yadua me voleka ki na nona drotini. 53Ia na nodra valelaca na Livai me tara volita na vale tabu sa tu kina na i vunau.” 54Era sa kitaka vakakina na Isireli me vaka na ka kecega sa vakarota vei Mosese ko Jiova.
Currently Selected:
TIKO VOLI MAI NA LEKUTU 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.