VUNAU NI SORO 1
1
Na i Soro Kama
1A sa kacivi Mosese ko Jiova ka vosa vua mai na Vale ni Veitavaki, ka sa kaya vua, 2Mo vosa vei ira na Isireli ka tukuna vei ira oqo: Kevaka e dua vei kemuni sa kauta mai e dua na manumanu me i madrali vei Jiova, ia mo kauta mai e dua na nomu bulumakau, se na sipi, se na me.
3Kevaka e sa madrali me i soro kama na bulumakau, mo qai vakacabora na ka tagane sa sega ni dua na tikina e ca: mo cabora ena katuba ni Vale ni Veitavaki, me rawa ni ciqomi iko kina ko Jiova. 4Mo tabaka na ulu ni soro kama ena ligamu, ena qai vakadonui me i soro ni nomu i valavala ca. 5Mo vakamatea na luve ni bulumakau tagane ena mata i Jiova; ka me ratou kauta na dra o ira na bete ena kawa i Eroni ka kureitaka wavoki ena tutu vava ni cabocabonisoro ka toka ena katuba ni Vale ni Veitavaki. 6Mo qai drudruga na i soro kama, ka musumusulaka na veitikina. 7O ira na bete na luve i Eroni me ra tuva vakavinaka na buka ena dela ni cabocabonisoro ka vakawaqara. 8Ni oti o ya, me ra qai tuva vakavinaka ena dela ni buka na veitiki ni madrali sa musu tu, ka okati vakakina na uluna kei na kena uro. 9E dodonu mo savata na kena gacagaca kei na yavana, ia na bete me qai vakama kece ena dela ni cabocabonisoro. Na i soro kama sa cabori ena bukawaqa oqo sa ka boi vinaka vei Jiova.
10Kevaka sai madrali ni soro kama na sipi se na me, ia me vakacabori na ka tagane sa sega ni dua na tikina e ca. 11Mo vakamatea ena yasa ni cabocabonisoro sa donuya na vualiku, ena mata i Jiova. O ira na bete me ra qai kureitaka na kena dra ena tutu vava ni cabocabonisoro. 12Ni o sa musumusuka oti, me qai vakama ena i cabocabonisoro o koya na bete na veitikina kece sara, e okati talega kina na uluna kei na kena uro. 13E dodonu mo savata na kena gacagaca kei na yavana, ia na bete me qai vakama kece ena dela ni cabocabonisoro. Na i soro kama sa cabori ena bukawaqa oqo sa ka boi vinaka vei Jiova.
14Kevaka sa nona i madrali na manumanu vuka me i soro kama vei Jiova, me qai vakacabora o koya na soqe, se na luve ni ruve me nona i madrali. 15Na bete me qai kauta ki na i cabocabonisoro, ka muloca na domona me mate, ka vakama na uluna ena i cabocabonisoro. A kena dra me na qai vakadrodroi tani yani ena yasa ni cabocabonisoro. 16E dodonu me qai kauta laivi na kato ni kena kei na vutina, ka biuta ki na yasa ni cabocabonisoro sa donuya na tokalau, ena tikina sa biu kina na dravusa. 17Me qai taura na bete na tabana ruarua ka basuka me dolava na lewe ni manumanu, ia me kakua ga ni basuka laivi na tabana ni bera ni qai vakama ena i cabocabonisoro. Na i soro kama sa cabori ena bukawaqa oqo sa ka boi vinaka vei Jiova.
Currently Selected:
VUNAU NI SORO 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.