JONI 17
17
Na Masu ni Turaga
1Ni sa cavuta oti na vosa o ya ko Jisu, sa qai rai cake ki lomalagi ka kaya, “I Tamaqu, sa yaco mai oqo na gauna. Mo ni vakalagilagia na Luvemuni, me qai vakalagilagi kemuni talega kina na Luvemuni. 2Me vaka ni o ni sa solia vua na lewa me baleti ira na tamata kecega, sa rawa kina vua me solia na bula tawamudu vei ira yadua o ni sa solia vua. 3Sa i koya oqo na bula tawamudu, me ra kilai kemuni na Kalou dina duadua ga, kei Jisu Karisito, o koya o ni sa tala mai. 4Au sa vakalagilagi kemuni e vuravura, ka'u sa vakaotia na cakacaka o ni sa solia mai vei au me'u cakava. 5I Tamaqu!, Mo ni vakarokorokotaki au ena nomuni i serau ena gauna oqo, ena vakarokoroko vata ga ka'u a wasea vata kei kemuni ni se bera ni buli o vuravura.
6“Au sa vakatakila na yacamuni vei ira o ni sa soli ira kivei au mai vuravura. Era sa nomuni, ka o ni sa soli ira vei au; ka ra sa dau muria na nomuni vosa. 7Era sa qai kila ni sa taka dina ga mai vei kemuni na veika kece o ni sa solia vei au. 8Au sa solia vei ira na vosa o ni a solia mai vei au, ka ra sa vakabauta, ka ra sa kila dina sara ni'u sa lako mai vei kemuni, ka ra sa vakadinata ni o ni a talai au mai.
9“Au sa masulaki ira. Au sa sega ni masulaki vuravura, ia au sa masulaki ira ga o ni a soli ira mai vei au; ka ni ra sa nomuni. 10Sa nomuni talega na veika kecega e noqu, ka sa noqu na ka e nomuni, ka'u sa vakalagilagi ena vukudra. 11Au sa na lako yani vei kemuni oqo; ni ka'u sa sega tale ni tiko e vuravura, ia o ira ga oqo era sa tiko e vuravura. Tamaqu yalosavasava, ni maroroi ira ka taqomaki ira ena kaukauwa ni yacamuni, na yaca o ni sa solia vei au, me ra duabau kina me vaka ni daru sa duabau ga oi kedaru. 12Ni'u a sa tiko vata voli kei ira, au a dau maroroi ira ena kaukauwa ni yacamuni, o ira o ni a soli iratou vei au. Au sa taqomaki ira, ka a sega ni dua vei ira e yali, ia o koya ga ka sa dodonu me rusa, me vakayacori kina na i Vola Tabu.#Same 41.9; Joni 13.18 13Ia oqo au sa lako yani vei kemuni, ka'u sa cavuta na veika oqo e vuravura me rawa kina ni vakasinaiti sara na lomadra ena noqu marau. 14“Au sa solia vei ira na nomuni vosa; ka sa cati ira o vuravura, baleta ni ra sa sega ni kai vuravura, me vaka ni'u sa sega ni kai vuravura oi au. 15Au sega ni masulaka mo ni kauti iratou tani mai vuravura, ia mo ni maroroi iratou ga mai vua na vunica. 16E ratou sa sega ni vakavuravura, me vaka ni'u sa sega ni vakavuravura oi au. 17Mo ni vakatabui ira vei kemuni ena nomuni dina; sa ka dina na nomuni vosa. 18Me vaka na nomuni a talai au mai ki vuravura, au sa talai ira vaka talega kina ki vuravura. 19Ka'u sa vakatabui au oqo vei kemuni ena vukudra, ka me rawa kina ni ra vakatabui ira vakaidina vei kemuni.
20“Ia au sega ni masulaki ira walega oqo, au masulaki ira talega era na qai vakabauti au e muri ena vuku ni nodra vosa; 21me ra na qai duabau kecega. Me vaka o ni sa tiko vei au Tamaqu, ka'u sa tiko vei kemuni oi au; me ra na tiko talega vei kedaru o ira: me na qai vakabauta kina o vuravura ni o ni sa talai au mai. 22Au sa solia vei ira na lagilagi o ni a solia mai vei au; me ra duabau kina me vaka ga e daru sa duabau oi kedaru. 23Me'u tiko vei ira, ka mo ni tiko vei au, me qai taucoko kina na nodra duabau; me qai kila kina o vuravura ni o ni a talai au mai; ka ni o ni sa lomani ira me vaka o ni sa lomani au.
24“I Tamaqu, au vinakata me ra tiko talega kei au ena vanua au tiko kina o ira o ni sa solia vei au; me ra raica na noqu lagilagi, na lagilagi o ni sa solia vei au: ka ni o ni a lomani au ni sa sega ni tekivu o vuravura. 25I Tamaqu yalododonu, e sega ni kilai kemuni o vuravura, ia au sa kilai kemuni; ka ratou sa kila o iratou oqo ni o ni a talai au mai. 26Au sa vakatakila vei iratou na yacamuni, ka'u na vakatakila tikoga, me tiko kina vei iratou na loloma o ni a lomani au kina, ka me'u tiko talega vei iratou.”
Currently Selected:
JONI 17: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.