JONI 15
15
Ko Jisu na Vaini Dina
1“Oi au na vaini dina, ka sa dauqarava na loganivaini ko Tamaqu. 2Sa dau kauta laivi na tabaqu kecega e sega ni vua o koya, ka samaka na tabaqu kecega e vua, me rawa ni ra vua vakalevu sara. 3Dou sa vakasavasavataki oti mai na i vakatavuvuli ka'u sa solia vei kemudou. 4Dou sema tikoga vei au, ka'u na sema tikoga vei kemudou. Me vaka ga ni na sega ni rawa ni vua vakai koya na taba ni vaini kevaka e sega ni semati tiko ki na vuni vaini, ena sega talega vakakina oi kemudou kevaka dou sa sega ni sema tiko vei au.
5“Oi au na vaini, oi kemudou na tabaqu. O ira kece sara sa sema tiko vei au, ka'u sa sema tiko vei ira oi au, era na vua vakalevu sara; ni kevaka dou sa tawase tani mai vei au, dou na sega ni rawata e dua na ka. 6Kevaka e sega ni sema tiko vei au e dua na tamata, ena biu laivi me vaka na taba ni vaini ka sa na malai mai; era na qai tomika na tamata ka biuta ki na bukawaqa me kama kina. 7Kevaka dou sa sema tikoga vei au ka sa tiko vei kemudou na noqu vosa, a veika kecega dou sa vinakata ka kerea, ena vakayacori oqo vei kemudou. 8Sa vakatakilai na lagilagi nei Tamaqu mai na nomudou vuavuai vakalevu; io, oqo na sala dou sa yaco kina mo dou noqu tisaipeli. 9Au sa lomani kemudou me vaka sa lomani au ko Tamaqu; mo dou tiko ga ena noqu loloma. 10Kevaka dou sa talairawarawa ki na noqu i vakaro, dou na tiko ga ena noqu loloma, me vaka na noqu sa talairawarawa ki na i vakaro i Tamaqu ka'u tiko ga ena nona loloma.
11“Au sa tukuna na veika oqo vei kemudou me rawa kina ni tiko kei kemudou na noqu reki ka me vakataucokotaki talega kina na nomudou reki. 12Oqo na noqu i vakaro: dou veilomani, me vaka ka'u sa lomani kemudou.#Joni 13.34; 15.17; 1Joni 3.23; 2Joni 5 13Na loloma cecere duadua e rawa ni solia e dua na tamata vei ira na wekana sai koya me solia na nona bula ena vukudra. 14Dou sa qai wekaqu dina kevaka dou sa dau cakava na veika au sa vakarota vei kemudou. 15Au sa sega ni vakatokai kemudou tale mo dou noqu bobula, baleta ni sa sega ni dau kila na bobula na ka e cakava tiko na nona turaga; ia ka'u sa vakatokai kemudou mo dou noqu i tokani voleka sara, baleta ni'u sa vakatakila vei kemudou na ka kecega au sa rogoca mai vei Tamaqu. 16Dou sa sega ni digitaki au, ia ka'u sa digitaki kemudou, ka'u sa lesi kemudou mo dou lako ka vuavuai vakalevu sara ena vuamudou sa tudei. Ena solia kina vei kemudou ko Tamaqu na ka kecega dou sa kerea vua ena yacaqu. 17Sa i koya oqo na ka au sa vakarota vei kemudou: mo dou veilomani.
Cati e Vuravura
18“Kevaka sa cati kemudou o vuravura, dou kila ni sa cati au taumada ni bera ni cati kemudou. 19Kevaka dou sa nei vuravura, ena lomani kemudou o vuravura me vaka na nona sa dau lomana na ka e nona. Ia ka'u sa digitaki kemudou mai na vuravura oqo, ni dou sa sega ni okati mo dou kai vuravura; o ya na vuna sa cati kemudou kina o vuravura. 20Dou nanuma tiko na vosa ka'u a tukuna vei kemudou, ‘E sega ni levu cake na bobula mai vua na nona turaga.’ Kevaka era sa vakacacani au na tamata, era na vakacacani kemudou talega; ni kevaka era sa muria na noqu vosa, era na muria talega na nomudou vosa.#Maciu 10.24; Luke 6.40; Joni 13.16 21Ia era na cakava na veika kecega oqo vei kemudou baleta ni dou sa noqu; ka ni ra sa sega ni kilai koya sa a talai au mai. 22Kevaka au a sega ni lako mai me'u vosa vei ira, ke ra a sega ni liaca na nodra i valavala ca: ia oqo, sa sega na i ulubale ni nodra i valavala ca. 23O koya sa cati au, sa cati Tamaqu talega. 24Era na sega ni liaca na nodra i valavala ca kevaka au sa sega ni mai vakayacora ena kedra maliwa na veicakacaka ka sega ni se vakayacora rawa e dua na tamata. Ia oqo era sa raica na veika ka'u sa vakayacora, ka ra sa cati keirau kei Tamaqu. 25Sa vakayacori sara kina na ka e volai tu ena nodra Lawa, ‘Era sa cati au, ia sa sega na vuna era sa cati au kina.’#Same 35.19; 69.4
26“Ena lako mai na Dauveivuke, o ya na Yalo Tabu, o koya sa mai vakatakila na veika dina me baleta na Kalou. Sa lako mai vei Tamaqu o koya. Io au na talai koya yani vei kemudou mai vei Tamaqu, ka na vosa ena vukuqu o koya. 27Oi kemudou talega dou na dau vosa ena vukuqu, baleta ni dou sa dau tiko vata kei au mai na i tekivu ni gauna.
Currently Selected:
JONI 15: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.