JONI 14
14
Ko Jisu na Sala vei Tamada
1“Dou kakua ni lomaleqa. Dou vakabauta tikoga na Kalou, dou vakabauti au talega. 2E levu na tikina e lala tu ena vale nei Tamaqu. Ke sega, ke'u a sa tukuna oti vei kemudou. Au sa lako me'u la'ki vakarautaka e dua na tikina me nomudou. 3Ia ni'u sa la'ki vakarautaka oti na tikina me nomudou, au na lako tale mai ka mai kauti kemudou vei au, ka mo dou tiko talega ena vanua au sa tiko kina. 4Ia dou sa kila na vanua ka'u sa lako tiko kina, dou sa kila talega na kena sala.”
5Sa qai kaya vua o Tomasi, “Turaga, keitou sega ni kila na vanua o ni na tiko kina; keitou na qai kila vakacava na sala?”
6Sa qai kaya vua ko Jisu, “Oi au ga na sala, kei na dina, kei na bula; e sega ni torovi Tamaqu rawa e dua na tamata, ia ena vukuqu ga. 7Kevaka dou a sa kilai au, dou sa kilai Tamaqu talega. Ia, me tekivu oqo dou sa kilai koya ka raici koya.”
8Sa qai kaya vua o Filipe, “Turaga, ni vakatakilai Tamamuni vei keitou; keitou sa na qai vakacegu.”
9Sa qai kaya vua ko Jisu, “Ni'u sa mai tiko vakadede vakaoqo kei kemudou, o se sega tikoga ni kilai au Filipe? O koya ga sa raici au, sa raici Tamaqu; o qai kaya tu ga vakacava, ‘Vakatakilai Tamamuni vei keitou’? 10O sega li ni vakabauta ni'u sa tiko vei Tamaqu, ka sa tiko vei au ko Tamaqu? Na vosa au a dau cavuta vei kemudou e sega ni'u cavuta vaka i au ga. O Tamaqu ga, o koya sa tiko vei au, e cakava tiko na nona cakacaka. 11Dou vakabauti au ni'u sa tiko vei Tamaqu, ka sa tiko vei au ko Tamaqu: se dou vakabauti au ena vuku mada ga ni veicakacaka oqo. 12Au kaya vakadodonu sara vei kemudou, o koya sa vakabauti au ena cakava talega na veika au dau cakava, ka na cakava na veika e lelevu cake mai na veika o ya; baleta ni'u sa lako vei Tamaqu. 13Ia au na cakava na ka kecega dou na kerea ena yacaqu, me vakalagilagi kina na Tamaqu ena vuku ni Luvena. 14A ka kecega dou na kerea ena yacaqu, au na cakava.
Na Yalataki ni Yalo Tabu
15“Kevaka dou sa lomani au, dou na vakayacora na noqu i vakaro kecega. 16Au na qai masuti Tamaqu, ena qai solia vei kemudou o koya e dua tale na Dauveivuke, o koya me tiko vata kei kemudou ka tawamudu. 17Sa i koya na Yalo Tabu sa vakatakila na dina ni Kalou. E sega ni ciqomi koya rawa o vuravura, baleta ni sa sega ni rawa ni raici koya se kilai koya. Ia o kemudou ga sa kilai koya, baleta ni sa tiko vata kei kemudou o koya ka sa tiko e lomamudou.
18“Au na sega ni biuti kemudou tu mai mo dou luveniyali, au na lesu tale mai vei kemudou. 19Ena dede vakalailai ga sa na sega ni raici au tale o vuravura, ia dou na raici au tikoga. Ia me vaka ni'u sa bula, dou na bula talega. 20Ena siga o ya dou na qai kila ni'u sa tiko vei Tamaqu, ka ni dou sa tiko vei au oi kemudou, ka'u sa tiko vei kemudou oi au.
21“O koya sa ciqoma na noqu i vakaro kecega, ka vakayacori ira, sai koya oqori sa lomani au. O koya sa lomani au ena lomani koya ko Tamaqu, ka'u na lomani koya talega oi au, ka vakatakilai au vua.”
22Sa qai kaya o Jutasa, (e dua tani o Isikarioti), “Turaga, a cava na vuna o ni na vakatakilai kemuni kina vei keitou, ka segai ki vuravura?”
23A qai sauma ko Jisu ka kaya vua, “Kevaka sa lomani au e dua na tamata ena muria na noqu vosa: ka na lomani koya ko Tamaqu, ka keirau na lako mai vei koya, ka mai tiko vua. 24O koya e sega ni lomani au ena sega ga ni muria na noqu vosa. Na vosa talega dou sa rogoca tiko oqo e sega ni noqu, e nei Tamaqu ga, o koya ka talai au mai.
25“Au sa tukuna vei kemudou na veika oqo ni'u se tiko vata tiko kei kemudou. 26Ena qai vakatavulici kemudou ena ka kecega na Dauveivuke, na Yalo Tabu, o koya ena tala mai ko Tamaqu ena yacaqu, ka na vakananuma lesu talega vei kemudou o koya na veika kecega au sa dau tukuna vei kemudou.
27“Au sa laiva tu vei kemudou na vakacegu; a noqu vakacegu ga au sa solia vei kemudou: au sega ni solia vei kemudou me vaka e dau solia o vuravura. Dou kakua ni lomaleqa, ka kakua ni taqaya. 28Dou sa rogoca ni'u a kaya vei kemudou, ‘Au sa lako, ia au na talevi kemudou tale mai.’ Kevaka dou lomani au dina, dou na reki ni'u sa lako tiko vei Tamaqu, ni sa levu cake vei au o koya. 29Au sa tukuna rawa oqo vei kemudou ni se bera ni vakayacori, ka mo dou na vakadinata ena gauna sa vakayacori kina. 30Au na sega ni veivosaki vakabalavu tale kei kemudou, ni sa lako tiko mai na turaga ni vuravura oqo. E sega ni dua na nona kaukauwa vei au, 31ia me kila ga kina o vuravura ni'u sa lomani Tamaqu, ka'u sa dau kitaka kece sara na ka sa vakarota vei au ko Tamaqu.
“Dou tu cake, me tou sa lako yani.
Currently Selected:
JONI 14: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.