1
Na Vosa ni Bula
1Ena i vakatekivu a sa bula tu kina na Vosa; a sa tiko vata kei na Kalou na Vosa, ka sa Kalou o koya na Vosa. 2Ena i vakatekivu e rau sa tiko vata kina o koya na Vosa kei na Kalou. 3A sa bulia ka vakatubura na Kalou na ka kecega ena vukuna; sa sega ni dua na ka e buli me a sega ni cakava o koya. 4Sa i vurevure ni bula na Vosa, ka sa kauta mai na rarama ki na tamata na bula oqo. 5Sa cilava na butobuto na rarama, ia sa sega ni tabonaka rawa na rarama o ya na butobuto.
6A sa tala mai na Kalou e dua na nona i talai, a yacana o Joni,#Maciu 3.1Mari 1.4Luke 3.12 7o koya sa lako mai me tukuna na rarama oqo vei ira na tamata, me rawa kina ni ra rogoca na i tukutuku ka vakabauta. 8O koya vakataki koya sa sega ni rarama o ya; ia sa mai kacivaka ga na rarama. 9Sa i koya ga oqo na rarama dina, na rarama sa lako mai ki vuravura ka sa cilava na tamata kecega.
10A sa tiko e vuravura na Vosa, ka dina ga ni sa bulia na vuravura na Kalou ena vukuna, ia sa sega ga ni kilai koya o vuravura. 11E a lako mai o koya ki na nona vanua, ia era a sega ni ciqomi koya o ira na kai nona. 12Ia eso vei ira sa ciqomi koya ka vakabauti koya; sa solia kina vei ira o koya na dodonu me ra yaco rawa me ra luve ni Kalou. 13Era sa sega ni yaco me ra luve ni Kalou ena sala vakatamata, o ya me ra sucu mai vei ira na nodra i tubutubu; ia mai vua ga na Kalou ni sa Tamadra o koya.
14A sa yaco me tamata na Vosa, sa sinai ena loloma-savu kei na dina, ka sa bula ena keda maliwa. Keitou a raica na nona i serau, na i serau ka ciqoma o koya me vaka ni sa Luvena duabau ga nei Tamana.
15Sa tukuni koya o Joni, ka sa kacivaka vakaoqo, “Sa i koya oqo au sa dau tukuna voli kina, ‘O koya sa muri au mai sa levu cake vei keirau, me vaka ni a sa bula tu o koya ni'u se bera ni sucu.’ ”
16Eda sa vakalougatataki kece sara mai na veika sa sinai tu vua, o ya mai na loloma-savu sa vakaikuritaki tikoga. 17Ni sai Mosese ka a solia mai kina na Kalou na nona Lawa, ia sa yaco mai na loloma-savu kei na dina mai vei Jisu Karisito. 18E sega ni dua na tamata e se bau raica na Kalou. Na Luvena e duabau ga, o koya ka a tubu mai vua, ka sa tiko sara ena lomasere i Tamana, sa mai vakatakilai koya.
Na i Tukutuku i Joni na Dauveipapitaisotaki
(Maciu 3.1-12; Mari 1.1-8; Luke 3.1-18)
19Sa i koya oqo na ka e tukuna o Joni ena gauna era a talai yani kina vua o ira na bete kei ira na kawa i Livai. Era a talai mai vei ira na nodra i liuliu na Jiu mai Jerusalemi, me ra la'ki kaya vua, “O cei beka o iko?”
20A sa sauma o Joni ka sega ni cakitaka, ka tusanaka ga vakadodonu, “Au sega ni Mesaia oi au.”
21Era sa qai taroga, “O cei beka ga o iko? O iko o Ilaijia?”
A sauma o Joni ka kaya, “E segai.”
Era sa tarogi koya tale, “Sa i iko beka o koya na Parofita?”
Sa qai sauma ka kaya, “E segai.”#Mala 4.5Vrua 18.1518Sr 48.1011
22Era sa qai kaya tale vua, “Ia o cei ga o iko? Me bau dua na ka me keimami la'ki tukuna vei ira sa talai keimami mai. A cava o sa kaya me baleti iko?”
23Sa qai kaya o Joni, “Oi au na domona e dua sa kacikaci voli ena vanua lala, ‘Cakava me dodonu na sala me muria na Turaga,’ me vaka sa kaya o Aisea na parofita.”#Aisea 40.3 (LXX)
24Ia o ira era sa talai mai vei ira na Farisi 25sa qai tarogi Joni, ka kaya vua, “A cava ga o veipapitaisotaki kina ni o sega ni o koya na Mesaia, se o Ilaijia, se o koya na Parofita?”
26A qai vosa vei ira o Joni, ka kaya, “Au sa veipapitaisotaki ena wai; ia sa tucake tu ena kemuni maliwa e dua o ni sa sega ni kila. 27O koya sa muri au tiko mai, ia sa sega ni ganiti au mada ga me'u sereka na wa ni nona i vava.”
28A yaco tiko na veika oqo mai Pecani ena tai kadua ni Joritani, na vanua e veipapitaisotaki tiko kina o Joni.
Na Lami ni Kalou
29Ena siga ka tarava, sa raici Jisu sara o Joni ni lako tiko yani vua, ka a kaya sara, “Raica na Lami ni Kalou, o koya sa kauta tani na nodra i valavala ca na kai vuravura! 30Sa i koya ga oqo au sa tukuna tiko kina, ‘Sa muri au tiko mai e dua na tamata, ia sa levu cake vei keirau o koya, baleta ni sa bula tu o koya ni'u se bera ni sucu.’ 31Au sega mada ni kila se o cei o koya; ia na vu ni noqu lako mai ka veipapitaisotaki ena wai o ya me rawa ni ra kilai koya kina o ira na Isireli.”
32Sa qai tukutuku tale o Joni, ka kaya, “Au a raica na Yalo Tabu ni sa lako sobu mai me vaka na ruve mai lomalagi, ka mai ro toka vua. 33Au a sega tiko ni kila ni sai koya ga oqo, ia na Kalou ka sa talai au mai me'u veipapitaisotaki ena wai, sa qai kaya vei au, ‘O koya o na raica ni lako sobu vua na Yalo Tabu ka la'ki ro toka vua; sai koya oqori ena veipapitaisotaki ena Yalo Tabu.’ 34Au sa raica oti, ka'u sa tukuna oqo ni sai koya ga na Luve ni Kalou.”
O Iratou na i Matai ni Tisaipeli i Jisu
35Ena siga ka tarava, sa tu tale e kea o Joni kei na rua na nona tisaipeli; 36ia ni sa raici Jisu ni lako tiko yani sa kaya sara, “Raica, na Lami ni Kalou!”
37E rau a rogoca na nona vosa oi rau na tisaipeli ka rau muri Jisu sara. 38A qai vuki o Jisu ka raici rau ni rau sa muri tiko yani, ka mani kaya vei rau, “A cava o drau vakasaqara?”
E rau a qai kaya vua, “Rapai,” (ka kena i balebale, Vakavuvuli,) “E vei na vanua o ni vakaitikotiko kina?”
39Sa qai kaya vei rau o koya, “Lako mai ka raica.” (Na gauna o ya e sa via rauta toka na va na kaloko ena yakavi.) E rau sa qai lako vata yani kei koya ka raica na vanua e tiko kina, ka rau mani tiko kaya voli ena vo ni siga o ya.
40E dua vei rau o Adriu, na taci Saimoni Pita. 41E a kunei Saimoni taumada, na tuakana, ka kaya vua, “Keirau sa kunea na Mesaia.” (Na vosa oqo e kena i balebale na “Karisito”.) 42Sa qai kauti koya sara vei Jisu.
E a vakaraici koya o Jisu, ka kaya vua, “O iko o Saimoni na luve i Jona; o na vakatokai o Kifa.” (A kena i balebale o Pita, se vatu.)
Sa Kacivi Filipe kei Nacanieli o Jisu
43Ena siga ka tarava, sa vinakata o Jisu me lako ki Kalili. E a mani kunei Filipe o koya, ka kaya vua, “Muri au mai!” 44(O Filipe oqo e kai Pecisaita, na koro nei Adriu kei Pita.) 45A qai kunei Nacanieli o Filipe, ka kaya vua, “Keitou sa kunei koya ka a vola o Mosese ena i vola ni Lawa ka ra tukuna talega na parofita ena nodra i vola, o ya o Jisu na kai Nasareci, na luve i Iosefo.”
46Sa qai kaya vua o Nacanieli, “E rawa li ni tubu mai Nasareci e dua na ka vinaka?”
A qai kaya vua o Filipe, “Lako mai mo raica.”
47Ia ni sa raici Nacanieli o Jisu ni sa lako tiko yani vua, sa qai kaya, “Raica, e dua na Isireli botoboto, ka sa sega vua na veivakaisini!” 48Sa qai kaya vua o Nacanieli, “O ni kilai au beka vaka cava?”
A sauma o Jisu, ka kaya vua, “Au a raici iko ena gauna o a tiko kina ena ruku ni lolo, ni sa bera ni kacivi iko o Filipe.”
49Sa qai kaya vua o Nacanieli, “Vakavuvuli, sai kemuni na Luve ni Kalou, sai kemuni na nodra Tui na Isireli!”
50A sauma o Jisu, ka kaya vua, “E baleta li ni'u a kaya vei iko, ‘Au a raici iko ena ruku ni lolo,’ o sa vakabauta kina? O na raica na veika lelevu cake mai na kena oqo.” 51Sa qai kaya tale vua o Jisu, “Au tukuna vakadodonu sara vei kemuni, ni o ni na raica ni tadola na lomalagi ka raici ira talega na agilosi ni Kalou ni ra kaba cake tiko ka siro sobu vua na Luve ni Tamata.”#Vteki 28.12
Loading reference in secondary version...