APAKUKI 1
1
1Oqo na i tukutuku sa vakaraitaka ko Jiova vei Apakuki na parofita.
Rarawataka na Lewa Cala o Apakuki
2I Jiova, ena vakacava soti beka na dede ni noqu kaci veivuke tiko ni bera ni o ni qai rogo mai, ni bera ni o ni vakabulai keimami mai na i valavala kaukauwa? 3A cava na vu ni nomuni vakaraitaka vei au na leqa kei na ca vakaoqo? Sa tu wavokiti au oqo na veivakarusai kei na i vakavala kaukauwa. Sa yaco tiko na veivala kei na veileti ena veivanua kecega. 4Sa malumalumu na lawa ka sa sega na betena. Sa sega ni vakayacori na lewa dodonu. Sa vakavevei na dodonu, ka ra sa vakamalumalumutaki ira na tamata vinaka o ira na tamata ca.
Na Kena i Sau mai vei Jiova
5 #
Caka 13.41
A sa qai kaya vei ira na nona tamata ko Jiova: “Ni raici ira mada na veivanua era tu wavokiti kemuni, o ni na qai kurabui ena veika o ni raica. Ia oqo, au sa na cakava mada e dua na ka o ni na sega ni vakabauta rawa ni o ni sa rogoca. 6#2Tui 24.2Au sa na laveti ira cake na kai Papiloni ki na i tutu ni kaukauwa, o ira na tamata rerevaki oqo ka ra sega ni dautiko dei. Era sa lako yani ki na veiyasa i vuravura me ra valuti na veivanua eso. 7Sa tete na rere kei na domobula ena vukudra, ka ra sa dui lawa ga vakai ira ena nodra dokadoka.
8“Sa totolo cake na nodra ose mai na cici ni leopate, era sa tamata rerevaki cake mai na olifa sa viakana voli. Na nodra mataivalu vodo ose era lako mai na veivanua yawa, ka ra kelikeliraka na qele na nodra ose. Era dui sorova mai me vaka ni ra sa vakaroro sobu vakatotolo na ikeli me ra tobo kedra.
9“Sa dau toso mai ka ravuravu vakaukauwa na nodra veimataivalu, era sa dau domobula na tamata kecega ni ra sa torovi yani. Na levu ni nodra bobula sa vaka na i wiliwili ni mata ni nuku. 10Era cakava na i tovo beci vei ira na tui ka ra veiwalitaki ira na vakailesilesi lelevu. E sega sara ni dua na koro vakabai e tarovi ira rawa - ni ra dau binia cake na qele ena yasa ni bainikoro, ka ra qai kabata ka taura na koro. 11Oti, era sa qai samuta na vanua me vaka na cagi, ka ra lako sara yani; io, oqo o ira na tamata era vakalou ga ki na nodra kaukauwa vakataki ira.”
Vakatukutuku Tale vei Jiova o Apakuki
12Oi kemuni Jiova, o ni sa Kalou dina ga mai na i vakatekivu. Oi kemuni na noqu Kalou; o ni yalosavasava vakaoti ka o ni sa bula ena veigauna kecega. Oi kemuni Jiova na noqu Kalou ka noqu i vakavakaruru, o ni sa digitaki ira oti na kai Papiloni ka vakaukauwataki ira me rawa kina ni ra vakanakuitataki keimami. 13E rawa saka vakacava vei kemuni mo ni vinakati ira na tamata ca ka dauveivakaisini oqo? Na matamuni e rui tabu ka savasava me raica na ka ca, ka sega ni rawa mo ni vosota na raici ira tiko na tamata daucaka ca. Ia na cava beka ga na vu ni nomuni vagagalu tiko ni ra sa vakarusai ira tiko na tamata era dodonu cake mai vei ira o ira na tamata oqo?
14E rawa vakacava mo ni vakayacori ira na tamata me vaka na ika se qele ni manumanu lalai sa sega na nodra i liuliu me liutaki ira? 15O ira na kai Papiloni era dautobo tamata ena bati ni siwa, me vaka na siwa ika. Era qai yarataki ira yani ena nodra lawa ka ra kaikaila ena nodra marautaka na ka era sa qoliva rawa! 16Era masuta talega na nodra lawa ka ra vakacaboisoro kina baleta na nodra lawa e solia vei ira na ka vinaka duadua ni veika kecega. 17Era sa na vakayagataka tiko beka ga na nodra i yaragi ka sega ni mudu rawa, era na vakarusai ira tiko na veivanua ka ra sega ni bau yalololoma rawa?
Currently Selected:
APAKUKI 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.