VAKARUA 1
1
Vakananumi Lesu na Veika ka Yaco mai Saineai
1Na i vola oqo sa koto kina na veika sa tukuna o Mosese vei ira na Isireli ena gauna era a tiko kina mai na vanua lala ena tokalau ni Uciwai na Joritani. Era a tiko ena Buca na Joritani e volekati Sufi, ena veimama ni koro o Perani ena dua na tai ni uciwai, kei na veikoro o Tofeli, o Lepani, o Eseroci kei Tisaapi ena tai kadua. 2(E taura e tinikadua na siga na i lakolako mai na Ulunivanua o Saineai#1.2 Se Orepi ki Katesi Banea, ni ia na muri mai na vanua veidelana kei Itomi.) 3Ena i matai ni siga ni katinikadua ni vula ena i ka vasagavulu ni yabaki ni oti na nodra a biuti Ijipita mai, a tukuna o Mosese vei ira na tamata na veika kece a vakarota vua ko Jiova me tukuna vei ira. 4A yaco ni a qai oti koto ga na nona vakadrukai Tui Sioni kei Tui Oki ko Jiova.#1.4 ko Jiova; se o Mosese. O Sioni na nodra tui na Amoraiti, ka veiliutaki ena koro o Esiponi. O Oki na tui Pasani o koya sa lewa na koro o Aseteroci kei Etirei.#Tiko 21.21-35 5Ni ra se tiko ga na Isireli ena tokalau ni Joritani ena vanua o Moapi, a sa vakatekivu me vakamacalataka o Mosese na lawa ni Kalou kei na nona i vakavuvuli.
A sa kaya, 6“Ena gauna eda a se tiko voli ga kina mai na Ulunivanua o Saineai,#1.6 Se Orepi a tukuna kina vei keda na Kalou oqo: ‘Sa rui dede na nomuni tiko ena ulunivanua oqo. 7Ni biuta na vanua oqo ka lako yani ena nomuni lakolako; mo ni lako yani ki na nodra vanua veidelana na Amoraiti kei na veivanua vakavolivolita — ki na Buca na Joritani, ki na veidelana kei na vanua lolovira, ena vanua vaka ki na ceva kei na vanua baravi ni Meditereni. Ni lako yani ki na nodra vanua na kai Kenani kei Lepanoni, ka me la'ki yaco sara ki na uciwai levu na Uferetisi. 8Raica, oqo na vanua au a yalataka oi au ko Jiova me'u solia vei ira na nomuni qase, vei Epara-ama, Aisake kei Jekope kei ira na nodratou kawa. Mo ni lako mo ni lai tawana ka taukena.”
Digitaki o Ira Me Ra Veiliutaki
(Lako 18.13-27)
9A sa tukuna vei ira na tamata o Mosese, “Ena gauna eda se tiko ga kina mai na Ulunivanua o Saineai,#1.9 Se Orepi au a tukuna vei kemuni, ‘E sa dua dina na i colacola bibi vei au na liutaki kemuni voli, ka'u sa sega ni rawata taudua vakataki au. 10Sa vakalewevuqataki kemuni ko Jiova na nomuni Kalou me vaka na kalokalo ni lomalagi. 11Me vakalewevuqataki kemuni vakalevu sara ko Jiova na nodra Kalou na nomuni qase, ka vakalougatataki kemuni me vaka sa yalataka vei kemuni. 12Ena rawa vakacava vei au me'u colata taudua na i tavi bibi me'u qaravi kemuni ena kena wali na nomuni dauveisei? 13Ni digitaka eso na tamata yalomatua, ka kila-ka, ka ra tamata dokai mai na nomuni veimataqali yadua, ka'u na qai lesi ira me ra veiliutaki ena vukumuni.’ 14O ni a qai vakadonuya ni vinaka me caka na ka oqo. 15Au a qai kauti ira na i liuliu yalomatua ka kila-ka oqo mai na nomuni veimataqali ka lesi ira me ra liutaki kemuni. Eso me ra liutaka e dua na udolu na tamata, eso me ra liutaka e dua na drau, eso me ra liutaka e limasagavulu ka so me ra liutaka e ya tini. Au sa lesia talega eso me ra vakailesilesi ena nomuni veimataqali taucoko sara.
16“Au a vakaroti ira ena gauna o ya ena veika oqo: ‘Mo ni vakarogoca na veileti ka yaco vei ira na nomuni tamata, ka me dodonu ka savasava na nomuni vakatulewa ena vuku ni veileti kecega, ka veitalia ga ke ra kai nomu se ra kai tani ka tiko vata kei kemuni. 17Me kakua na veivakaduiduitaki ena nomuni vakataulewa. Me dua ga na i vakarau mo ni veilewai kina veitalia ga se o cei o koya. Ni kakua ni rerevaka e dua na tamata, ka ni sa lako mai vua na Kalou na nomuni lewa. Kevaka e dua na ka e dredre vei kemuni, ni kauta mai vei au, au na qai vakatulewa kina. 18Au a solia talega vei kemuni ena gauna o ya na veivakasala me baleta na veika kece mo ni cakava.”
Talai Yani mai Katesi Banea o Ira na Yamata Vuni
(Tiko 13.1-33)
19Eda a qai biuta na Ulunivanua o Saineai#1.19 Se Orepi ka lakova yani na loma ni vanua lala ka rerevaki ena sala ki na vanua veidelana nodra na Amoraiti me vaka sa vakarota vei keda ko Jiova, me yacova ni da sa yaco ki Katesi Banea.
20Au a qai tukuna vei kemuni, “O ni sa yaco mai ki na nodra vanua na Amoraiti, na vanua sa solia vei keda ko Jiova na noda Kalou. 21Ni raica, sai koya oqo na vanua sa solia vei kemuni ko Jiova na nodra Kalou na nomuni qase: mo ni lako ka la'ki tawana. Ni kakua ni rere se yalolailai.”
22Ia o ni a qai lako mai vei au ka kaya, “Me da tala mada yani eso na tamata me ra la'ki vakaraica mai na vanua ka me ra mai tukuna vei keda na sala vinaka me da muria kina, se era veikoro vakacava era tu kina.”
23“E a vaka me daumaka vei au na i vakasala o ya, ka'u digitaka sara e tinikarua na tamata, me yadua mai na veimataqali. 24Era a lako yani ki na vanua veidelana me yaco sara ki na Buca o Esikoli, ka la'ki vakadikeva mai. 25E ratou a qai tauca mai eso na vuanikau mai kea, ka ratou kauta mai na kena i tukutuku ni, “sa dua na vanua bulabula na vanua sa solia vei keda ko Jiova na noda Kalou.
26“Ia o ni a qai saqata na i vakaro i Jiova na noda Kalou ka bese ni lako yani kina.#Vrua 9.23; Ipe 3.16 27O ni a qai vosa kudrukudru ena nomuni valelaca ka kaya, “Sa cati keda ko Jiova ka kauti keda tani wale ga mai Ijipita me soli keda yani vei ira na Amoraiti me ra vakamatei keda. 28Na cava me keimami lako kina i kea? Keimami sa rere. O ira na tamata eda a talai ira yani era tukuna ni o ira na tiko mai kina era tamata kaukauwa cake ka ra balabalavu cake mai vei keda. Sa levu cake sara na nodra koro ka sa yaco sara i lomalagi na kena bai. Era a raica mai kea na tuwawa!’ ”
29“Au a qai kaya vei kemuni, ‘Ni kakua ni rerevaki ira na tamata o ya. 30Ena liutaki kemuni ko Jiova na nomuni Kalou ka na vala ena vukumuni, me vaka na nomuni a raica na nona vala ena vukumuni mai Ijipita 31ka vakakina ena vanua lala. O ni a raica na nona maroroi kemuni mai na Kalou me yaco sara mai ki na vanua oqo, me vaka e dua na tama ni gone e keveta voli na luvena.’#Caka 13.18 32Ia ka veitalia ga na veika oqori, o ni a sega ni via vakadinati Jiova,#Ipe 3.19 33ka dina ga ni sa dau liu voli yani vei kemuni o koya me raica na vanua mo ni tara keba kina. Sa dau liutaki kemuni ena duru bukawaqa ena bogi kei na duru o ena siga me vakaraitaka na gaunisala vei kemuni.
Totogitaki Isireli na Kalou
(Tiko 14.20-35)
34A rogoca ko Jiova na nomuni vosa kudrukudru ka sa cudru sara, ka yalataka ka kaya,#Ipe 3.18 35“Ena sega sara ni dua vei kemuni na i tabatamata ca oqo ena curu ki na vanua au a yalataka vei ira na nomuni qase. 36O Kelevi taudua ga na luve i Jifune ena curu kina. Sa yalodina tikoga vei au o koya, ka'u na solia vua kei ira na nona kawa na vanua ka la'ki raica mai.” 37E a cudruvi au talega ko Jiova ena vukumuni ka kaya, “O iko sara mada ga Mosese o na sega ni curu kina. 38Vakayaloqaqataki Josua na luve i Nuni na nomu i vukevuke ni na liutaki ira na Isireli, o koya, me ra la'ki taukena na vanua.’
39Sa vosa vei keda kece ko Jiova ka kaya, “O ira kece sara na luvemuni o ni a kaya ni ra na vesuki mai vei ira na kemuni meca, sai ira na gone oqo era se lecava na ka vinaka mai na ca, era na yaco ki na vanua o ya. Au na solia vei ira na vanua o ya me ra taukena. 40Ia o kemuni, mo ni saumaki ka gole yani ki na vanua lala ena sala vaka ki na Wasa Damudamu.”
Vakadrukai nei Isireli mai Orima
(Tiko 14.39-45)
41Ia o ni a qai kaya, “Mosese, keimami sai valavala ca vei Jiova.” Ia oqo keimami na lako cake ka vala, me vaka ka vakarota vei keimami ko Jiova. O ni sa qai vakarau o kemuni mo ni vala, ka nanuma ni na rawarawa na nomuni ravuta na vanua veidelana.
42“Ia sa kaya vei au ko Jiova, “Vakaroti ira me ra kakua ni lako cake ki vala, ni'u na sega ni tiko kei ira, ka ra na vakadrukai ira o ira na kedra meca.” 43E dina ga ni'u a tukuna vei kemuni na ka a kaya ko Jiova, o ni a sega ni via rogoca, o ni a qai vorata nona lewa ka lako cake ga ena qaciqacia ki na vanua veidelana. 44Era a qai lako vakaivalu vei kemuni na Amoraiti era tiko ena veidelana o ya me vaka na qele ni oni. Era a qai vakasavi kemuni ka vakadrukai kemuni mai Sia ka yaco yani ki Orima. 45O ni qai lesu mai ka tagi ena mata i Jiova me vukei kemuni, ka sa sega ni via rogoci kemuni se kauwaitaki kemuni o koya. 46Kemuni a qai tiko mai Katesi me bogi vuqa, me vaka na veibogi o ni a tiko mai kina.
Currently Selected:
VAKARUA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.