2 PITA 1
1
1Mai vei Saimoni Pita, na dauveiqaravi kei na i apositolo i Jisu Karisito.
Kivei ira sa vakaivotavota vata kei keitou ena vakabauta uasivi sa taukeni rawa ena vuku ni yalododonu ni noda Kalou ka noda i vakabula ko Jisu Karisito:
2Me nomuni na lolomasavu kei na vakacegu ena nomuni sa kila na Kalou kei Jisu na noda Turaga.
Na Kaci ni Kalou kei na Nona Veidigitaki
3Sa solia vei keda na Kalou ena nona kaukauwa na veika kece sara eda gadreva me baleta na noda bula kei na i tovo vakalou ena vuku ni noda kilai koya sa kacivi keda me da vakaivotavota ena nona lagilagi kei na nona vinaka. 4Ena ka oqo sa solia kina o koya vei keda na i solisoli talei eso sa yalataka me rawa kina vei kemuni mo ni dro tani rawa mai na veigagadre ca sa dauveivakarusai era sa tu oqo e vuravura, ka mo ni vakaivotavota ena i tovo ni Kalou. 5Ena vuku ni veika oqo, ni gumatua sara kina mo ni vakaikuritaka na nomuni vakabauta ena i valavala vinaka, kei na nomuni i valavala vinaka ena kila-ka, 6na kila-ka ena i valavala malua; kei na i valavala malua ena dauvosota, kei na dauvosota ena i tovo vakalou, 7kei na i tovo vakalou ena veilomani vakaveitacini, kei na veilomani vakaveitacini ena loloma. 8Oqo na i valavala eso o ni gadreva, ia kevaka sa tu vakalevu sara vei kemuni na veika oqo, era na vukei kemuni mo ni tamata gugumatua ka vuavuai ena nomuni kila na noda Turaga ko Jisu Karisito. 9Ni o ira vakayadua sa sega vei ira na i valavala vakaoqo sa lekaleka ga na nodra rai ka mataboko, ka guilecava ni ra sa vakasavasavataki oti mai na nodra i valavala ca eliu.
10O koya oqo oi kemuni na wekaqu, ni gumatua sara kina ka vakataudeitaka na veikacivi kei na veidigitaki ni Kalou ena nomuni bula; ni kevaka o ni vakayacora na veika oqo, o ni na sega sara ni tarabe ka bale. 11Mai na sala oqo ena soli kina vei kemuni na dodonu taucoko sara mo ni curu kina ki na matanitu tawamudu ni noda Turaga ka i Vakabula ko Jisu Karisito.
12O koya oqo ka'u na vakananumi kemuni tikoga kina ena veika oqo, ka veitalia ga kevaka o ni sa kilai ira vinaka tiko ka sa vakataudeitaki ena i vakavuvuli dina sa tu vei kemuni. 13Au nanuma ni sa dodonu ga me'u vakauqeti kemuni tiko mo ni dau nanuma na veika oqo ni'u se bula tiko, 14ni'u sa kila ni sa voleka mai na gauna me'u luvata tani kina na yago qele oqo me vaka sa vakaraitaka vakamatata vei au na noda Turaga ko Jisu Karisito. 15Ia ka'u na tovolea ena noqu i gu taucoko me'u vakarautaka e dua na sala mo ni dau nanuma tikoga kina na veika oqo ni'u sa mate.
Na i Vakadinadina ni Lagilagi i Karisito
16Keitou sa sega ni vakararavi ki na i talanoa buli eso ena neitou vakaraitaka vei kemuni na veika me baleta na lako mai ni noda Turaga ko Jisu Karisito ena nona kaukauwa, ia keitou a vakadinadinataka ena mata i keitou na nona lagilagi. 17#Maciu 17.1-5; Mari 9.2-7; Luke 9.28-35Keitou a tiko e kea ena gauna sa vakacerecerei ka vakalagilagi koya kina na Kalou na Tamana, ni sa rogo kina vua e dua na domo mai na i Serau Lagilagi, ka vaka, “Oqo na Luvequ e duabau ga, o koya ka'u sa dau vinakata vakalevu!” 18Keitou a tiko vata kei Jisu ena ulunivanua tabu ka rogoca na domo oqo ni voqa sobu mai lomalagi.
19Ena veika oqo, keitou sa vakabauta vakalevu cake sara kina na nodra i tukutuku na parofita. O koya oqo mo ni wanonova vinaka sara kina na nodra i tukutuku, me vaka na nomuni wanonova toka e dua na cina sa caudre tiko ena dua na vanua butobuto. Ia mo ni wanonova tikoga me yacova na gauna sa kida cake kina na rarama ni mataka vou ka cabe mai na kalokalo i volasiga ena yalomuni. 20Ia na ka bibi mo ni kila oqo: ni sa sega ni dua na tamata ena rawa ni vakamacalataka ga vakai koya na parofisai era tu ena i Vola Tabu. 21Ni sa sega ni vu na parofisai ena lewa vakatamata, ia era sa tukuna ga na nona i tukutuku na Kalou o ira na tamata era sa tiko ena ruku ni veiliutaki ni Yalo Tabu.
Currently Selected:
2 PITA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.